KANBIỌ 7
Nawẹ N’Sọgan Pehẹ Kọgbidinamẹ Zanhẹmẹ Tọn Gbọn?
ETẸWẸ A NA WÀ?
Pọ́n nujijọ ehe: E ma ko hugan osun awe he Heather jẹ Mike mọ ji, ṣigba e mọdọ e taidi dọ emi ko yọ́n nulẹpo gandego. Yé nọ kanwehlan yede whẹwhẹ, yé nọ dọho na gànhiho susu to alokan ji to whedelẹnu, podọ e taidi dọ yé ko nọ yọ́n nuhe mẹdopodopo jlo na dọ dote wẹ nkọ! Ṣigba todin, Mike jlo nudevo hugan hodọdopọ poun.
To osun awe lọ lẹ gblamẹ, Mike po Heather po ma nọ yinukọn zẹ̀ alọ go hinhẹn na yede po nùdonùgo kleun kleun lẹ po go. Heather ma jlo na yinukọn humọ. Mọdopolọ e ma jlo dọ Mike ni jo emi do. Onú mẹde tọn ma nọ jẹ etọn ji sọ Mike tọn. E nọ dọna ede dọ, ‘Gbọnvona enẹ, yẹn po Mike po yiwanna míde . . .’
Eyin a ko tindo owhe họntọnmẹninọ tọn bo to ninọmẹ Heather tọn mẹ, etẹwẹ a na wà bọdego?
YIAGBỌJI BO LẸNNUPỌN!
Nunina de wẹ zanhẹmẹ yin sọn Jiwheyẹwhe dè na alọwlemẹ lẹ kẹdẹ. Nunina lọ ṣiṣizan wẹ zanhẹmẹ jẹnukọnna alọwle yin. E taidi avọ̀ dagbedagbe he mẹde na we yiyizan nado súnsún dihó nkọ
Eyin a gbà osẹ́n jọwamọ tọn de taidi osẹ́n nudọnwado tọn bo lọ́n sọn họta he yiaga taun de ji, a na jiya kọdetọn etọn lẹ tọn. Nudopolọ wẹ gando osẹ́n walọ dagbe tọn lẹ go, taidi dehe dọmọ: “Nọla na fẹnnuwiwa zanhẹmẹ tọn.”—1 Tẹsalonikanu lẹ 4:3.
Eyin a vẹtolina gbedide enẹ, etẹwẹ na yin kọdetọn lọ lẹ? Biblu dọmọ: “Mẹdepope he nọ doalọ to fẹnnuwiwa zanhẹmẹ tọn mẹ to ylando wà do agbasa etọn titi go.” (1 Kọlintinu lẹ 6:18) Nawẹ enẹ yin nugbo gbọn?
Dodinnanutọ lẹ doayi e go dọ susu jọja he nọ tindo zanhẹmẹ jẹnukọnna alọwle lẹ tọn wẹ nọ jiya dopo to kọdetọn he bọdego lẹ mẹ tọn kavi humọ.
-
AYIMAJAI. Suhugan jọja he nọ tindo kọndopọ zanhẹmẹ tọn jẹnukọnna alọwle lẹ tọn wẹ nọ wá dọ to godo mẹ dọ nuhe yé wà vẹna yé.
-
JIMADEDOMẸGO. To kọndopọ zanhẹmẹ tọn godo, mẹdopodopo nọ jẹ kinkanse ede ji dọ, ‘Mẹdevo tẹwẹ e na ko zanhẹ pọ́n?’
-
FLUMẸJIJẸ. To paa mẹ, awhli susu wẹ na jlo mẹde he na basi hihọ́na yé bo ma na tafu yé. Podọ dẹpẹ susu wẹ masọ nọ do ojlo na awhli he yé ko zanhẹ lẹ ba.
-
To bladopọ mẹ: Eyin a tindo kọndopọ zanhẹmẹ tọn jẹnukọnna alọwle, a na yí dewe do hòkọ́ gbọn nuhọakuẹ de hinhẹngú dali. (Lomunu lẹ 1:24) Agbasa towe họakuẹ taun nado yin hinhẹngú!
Dohia dọ a pé dewe ji bo nọ “nọla na fẹnnuwiwa zanhẹmẹ tọn.” (1 Tẹsalonikanu lẹ 4:3) Eyin a wá wlealọ to gbèdopo, a sọgan tindo kọndopọ zanhẹmẹ tọn. A nasọ duvivi etọn to gigọ́ mẹ matin nuhiha, numọtolanmẹ whẹhuhu tọn po jimadedomẹgo he zanhẹmẹ jẹnukọnna alọwle nọ hẹnwa po.—Howhinwhẹn lẹ 7:22, 23; 1 Kọlintinu lẹ 7:3.
ETẸWẸ A LẸN?
-
Be mẹhe yiwanna we nugbo na ze dagbemẹninọ towe to agbasa-liho podọ to numọtolanmẹ-liho do owù mẹ ya?
-
Be mẹhe yiwanna we nugbo na jlo dọ a ni hẹn haṣinṣan towe hẹ Jiwheyẹwhe gble ya?—Heblu lẹ 13:4.
A Gán Sọ Pọ́n Hosọ Ehelẹ
KANBIỌ HE JỌJA LẸ NỌ KANSE
Be N’Ko Wleawufo Nado Biọ Họntọn mẹ Ya?
Nuagokun atọ́n delẹ die he na gọalọna we nado magbe eyin a ko wleawufo na họntọnmẹninọ po alọwle po.
AZỌ́NWEMA LẸ NA JỌJA LẸ
Basi Zẹẹmẹ Nuhe A Yise Gando Zanhẹmẹ Go Tọn
Mímẹpo wẹ sọgan wá pannukọn ninọmẹ delẹ he mẹ e na biọ te dọ mí ni yiavùnlọna nuyise mítọn lẹ. Azọ́nwema ehe yiyizan na gọalọna we nado mọnukunnujẹ nuyise towe lẹ mẹ ganji bo yiavùnlọna yé.
