To hodidọ ahundopo tọn de mẹ, Jesu ko to tulina apọsteli nugbonọ etọn lẹ. Ozán ko kú taun, vlavo ogàn wiawe ko hò wayi. Todin, Jesu na apajlẹ he whànmẹ de.

E bẹjẹeji dọmọ: “Yẹn wẹ vẹntin nugbo lọ, podọ Otọ́ ṣie wẹ glesi lọ.” (Johanu 15:1) Apajlẹ etọn taidi nuhe yin didọ owhe kanweko lẹ jẹnukọn gando akọta Islaeli tọn he yin yiylọdọ vẹntin Jehovah tọn go. (Jelemia 2:21; Hosea 10:1, 2) Ṣigba, Jehovah ko to akọta enẹ gbẹdai. (Matiu 23:37, 38) Enẹwutu, onú yọyọ de wẹ Jesu jlo na dọ. Ewọ wẹ vẹntin he Otọ́ etọn ko to pipọ̀ sọn whenue gbọ́n ewọ ko yiamisisadode e po gbigbọ wiwe po to 29 W.M. Ṣigba, Jesu dohia dọ vẹntin lọ ma nọtena ewọ kẹdẹ gba, bo dọmọ:

“Alà depope he to go e bo ma to sinsẹ́n detọ́n wẹ [Otọ́ ṣie] nọ desẹ podọ dehe to sinsẹ́n detọ́n lẹpo wẹ ewọ nọ hẹn zun wiwe, na e nido de sinsẹ́n tọ́n dogọ. . . . Kẹdẹdile alà ma sọgan de sinsẹ́n tọ́n na ede adavo e gbọṣi vẹntin lọ go do, to aliho dopolọ mẹ, mọjanwẹ mìlọsu ma sọgan do, adavo mì gbọṣi kọndopọ mẹ hẹ mi. Yẹn wẹ vẹntin lọ, mìwlẹ wẹ alà lẹ.”—Johanu 15:2-5.

Jesu ko dopà na devi nugbonọ etọn lẹ dọ to yìyì etọn godo ewọ na do alọgọtọ de hlan, enẹ wẹ gbigbọ wiwe. To azán kande-widopo godo, to whenue apọsteli lẹ po mẹdevo lẹ po mọ gbigbọ enẹ yí, yé lẹzun alà vẹntin lọ tọn lẹ. Podọ “alà” lẹpo dona gbọṣi kọndopọ mẹ hẹ Jesu. Nado wà etẹ dotana?

E basi zẹẹmẹ dọmọ: “Ewọ he gbọṣi kọndopọ mẹ hẹ mi, bọ yẹn to kọndopọ mẹ hẹ ẹ, ewọ wẹ nọ de sinsẹ́n susu tọ́n; na mìwlẹ ma sọgan wà onú depope matin yẹn.” Mẹhe “alà” ehelẹ nọtena—yèdọ hodotọ nugbonọ etọn lẹ—na de sinsẹ́n susu tọ́n, enẹ wẹ awuwiwlena jẹhẹnu Jesu tọn nkọ lẹ, zohunhun yíyí do dọhona mẹdevo lẹ gando Ahọluduta Jiwheyẹwhe tọn go, podọ nado hẹn mẹsusu zun devi. Etẹwẹ na jọ eyin mẹde ma gbọṣi kọndopọ mẹ hẹ Jesu bo ma de sinsẹ́n tọ́n? Jesu basi zẹẹmẹ dọmọ: “Eyin mẹdepope ma gbọṣi kọndopọ mẹ hẹ mi, ewọ nọ yin didesẹ.” To alọ devo mẹ, Jesu dọmọ: “Eyin mì gbọṣi kọndopọ mẹ hẹ mi bọ ohó ṣie lẹ gbọṣi mì mẹ, mì biọ nudepope he jlo mì, e nasọ yinmọ na mì.”—Johanu 15:5-7.

Todin, Jesu lẹkọyi nudopolọ he e ko dọ wayi whla awe ji—enẹ wẹ nado nọ yìn gbedide etọn lẹ. (Johanu 14:15, 21) E basi zẹẹmẹ do aliho titengbe he mẹ devi lẹ na dohia dọ yé to mọwà te ji dọmọ: “Eyin mì nọ yìn gbedide ṣie lẹ, mì na gbọṣi owanyi ṣie mẹ, kẹdẹdile yẹn ko yìn gbedide Otọ́ ṣie tọn lẹ bo gbọṣi owanyi etọn mẹ do.” Etomọṣo, owanyi tintindo na Jehovah Jiwheyẹwhe po Visunnu etọn po kẹdẹ ma ko pé. Jesu dọmọ: “Ehe wẹ gbedide ṣie, dọ mì ni yiwanna ode awetọ mìtọn kẹdẹdile yẹn yiwanna mì do. Mẹdepope ma tindo owanyi he klohu ehe, dọ mẹde ni ze alindọn etọn jo do ota họntọn etọn lẹ tọn mẹ. Họntọn ṣie wẹ mì, eyin mì wà nuhe yẹn degbe etọn na mì.”—Johanu 15:10-14.

To gànhiho vude godo, Jesu na do owanyi etọn hia gbọn ogbẹ̀ etọn yíyí do sanvọ́ do ota mẹhe na do yise hia to ewọ mẹ lẹpo tọn mẹ dali. Apajlẹ etọn dona whàn hodotọ etọn lẹ nado tindo owanyi mẹde-yido-sanvọ́ tọn dopolọ na ode awetọ. Owanyi enẹ wẹ na dohiagona yé, kẹdẹdile Jesu ko donù e go wayi jẹnukọn do dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.”—Johanu 13:35.

Apọsteli lẹ na ko doayi e go dọ Jesu ylọ yé dọ “họntọn.” E dọ nuhewutu yé do yin họntọn etọn lẹ dọmọ: “Yẹn ko ylọ mì dọ họntọn, na nuhe yẹn sè sọn Otọ́ ṣie dè lẹpo wẹ yẹn ko hẹn zun yinyọnẹn na mì.” Haṣinṣan he họakuẹ nankọ die—yèdọ nado jihọntọn hẹ Jesu pẹkipẹki bo yọ́n nuhe Otọ́ lọ ko dọna ẹn lẹ! Ṣigba, nado sọgan duvivi haṣinṣan  ehe tọn, yé dona “to sinsẹ́n detọ́n.” Eyin yé wàmọ, Jesu dọ dọ, “nudepope he mì biọ Otọ́ lọ to oyín ṣie mẹ, ewọ [na] na mì.”—Johanu 15:15, 16.

Owanyi he to “alà” ehelẹ, yèdọ devi etọn lẹ ṣẹnṣẹn, na gọalọna yé nado doakọnna nuhe ja to nukọn mẹ lẹ. E na yé avase dọ aihọn lọ na gbẹwanna yé, amọ́ e miọnhomẹna yé dọmọ: “Eyin aihọn gbẹwanna mì, mì yọnẹn dọ e ko gbẹwanna mi whẹpo e do gbẹwanna mì. Eyin mì ko yin apadewhe aihọn tọn wẹ, aihọn na yiwanna etọn titi lẹ. Todin, na mì ma yin apadewhe aihọn tọn wutu, . . . ehe wutu wẹ aihọn do gbẹwanna mì.”—Johanu 15:18, 19.

To zẹẹmẹ bibasi yinukọn dogọ gando nuhewutu aihọn lọ na gbẹwanna yé go, Jesu yidogọ dọmọ: “Yé na wà onú ehe lẹpo sọta mì na oyín ṣie tọn wutu, na yé ma yọ́n mẹhe do mi hlan lọ wutu.” Na nugbo tọn, Jesu dohia dọ azọ́njiawu emitọn lẹ wẹ na gblewhẹdo mẹhe gbẹwanna emi lẹ, dile e dọmọ: “Eyin yẹn ma ko wà azọ́n he mẹdevo depope ma ko wà lẹ to ṣẹnṣẹn yetọn wẹ, yé ma na ko tindo ylando de; ṣigba todin, yé ko mọ bosọ gbẹwanna yẹn po Otọ́ ṣie po ga.” Na taun tọn, dọdai de wẹ wangbẹnamẹ yetọn hẹndi.—Johanu 15:21, 24, 25; Psalm 35:19; 69:4.

Whladopo dogọ, Jesu sọ dopagbe nado do alọgọtọ lọ, yèdọ gbigbọ wiwe hlan. Gbigbọ huhlọnnọ enẹ tin-to-aimẹ na hodotọ etọn lẹpo bo sọgan gọalọna yé nado de sinsẹ́n tọ́n, enẹ wẹ nado “dekunnu.”—Johanu 15:27.