To fọnsọnku Jesu tọn godo, e basi tito bọ apọsteli etọn 11 lẹ wá pé e to osó de ji to Galili. Devi devo lẹ tin to finẹ ga, yèdọ nudi gbẹtọ 500, he delẹ to yé mẹ ko tindo ayihaawe to tintan whenu. (Matiu 28:17; 1 Kọlintinu lẹ 15:6) Ṣigba, nuhe Jesu dọ todin lẹ gọalọ nado hẹn dopodopo yetọn kudeji dọ ewọ tin togbẹ̀ nugbonugbo.

Jesu basi zẹẹmẹ dọ Jiwheyẹwhe ko na emi aṣẹ lẹpo to olọn mẹ podọ to aigba ji. E dotuhomẹna yé dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ, bo nọ plọn yé nado payi nuhe yẹn ko degbe etọn na mì lẹpo go.” (Matiu 28:18-20) Mọwẹ, e ma yindọ Jesu togbẹ̀ kẹdẹ wẹ gba, amọ́ e gbẹ́ tindo ojlo dọ wẹndagbe lọ ni yin lilá.

Hodotọ Jesu tọn lẹpo—yèdọ sunnu, yọnnu po yọpọvu lẹ po—wẹ mọ azọ́ndenamẹ ehe dopolọ yí nado hẹn gbẹtọ lẹ zun devi. Nukundiọsọmẹtọ lẹ sọgan tẹnpọn nado doalọtena azọ́n yẹwhehodidọ po mẹpinplọn tọn yetọn po, ṣogan Jesu hẹn yé deji dọmọ: “Aṣẹ lẹpo ko yin nina mi to olọn mẹ podọ to aigba ji.” Etẹwẹ enẹ zẹẹmẹdo na hodotọ etọn lẹ? E dọna yé dọmọ: “Mì pọ́n! yẹn tin po mì po to azán lẹpo gbè kakajẹ vivọnu titonu lọ tọn.” Jesu ma dọ dọ mẹhe to mahẹ tindo to yẹwheho wẹndagbe lọ tọn didọ mẹ lẹpo na penugo nado wà azọ́njiawu lẹ. Etomọṣo, yé na tindo godonọnamẹ gbigbọ wiwe tọn.

To popolẹpo mẹ, Jesu sọawuhia devi etọn lẹ “na azán 40” to fọnsọnku etọn godo. Agbasa gbẹtọ tọn wunmẹ voovo wẹ e zedo bo “gbọn kunnudenu he họnwun susu dali do ede hia yé dọ emi to ogbẹ̀” bosọ plọnnu yé “gando ahọluduta Jiwheyẹwhe tọn go.”—Owalọ lẹ 1:3; 1 Kọlintinu lẹ 15:7.

E họnwun dọ dile apọsteli lọ lẹ gbẹ́ pò to Galili, Jesu na yé anademẹ nado lẹkọyi Jelusalẹm. To whenue e pli hẹ yé to tòdaho lọ mẹ, e dọmọ: “Mì tọ́nyi sọn Jelusalẹm blo, ṣigba mì nọtepọn nuhe Otọ́ ko dopagbe etọn lọ, ehe mì sè sọn dè e; na nugbo tọn, Johanu yí osin do baptizi, ṣigba azán vude sọn din, mìwlẹ na yin bibaptizi po gbigbọ wiwe po.”—Owalọ lẹ 1:4, 5.

To nukọn mẹ, Jesu sọ pli hẹ apọsteli etọn lẹ whladopo dogọ. E plan “yé kaka yì Bẹtani” yèdọ fie tin to dòdòmẹ he to hùwaji Osó Olivie tọn. (Luku 24:50) Mahopọnna nuhe Jesu ko dọna yé gando yìyì etọn go lẹpo, yé gbẹ́ to linlẹn to aliho de mẹ dọ aigba ji wẹ Ahọluduta etọn na tin te.—Luku 22:16, 18, 30; Johanu 14:2, 3.

Apọsteli lẹ kanse Jesu dọmọ: “Oklunọ, be hiẹ na gọ̀ ahọluduta jo na Islaeli to ojlẹ ehe mẹ lo ya?” E gblọn poun dọmọ: “E ma yin mìtọn nado yọ́n ojlẹ lẹ kavi osaa lẹ he Otọ́ ko yí do aṣẹpipa ede tọn mẹ gba.” Enẹgodo, e zinnudo azọ́n he yé dona wà ji dọmọ: “Mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie to Jelusalẹm, to Jude po Samalia lẹpo po, podọ kaka yì awà he dẹn hugan aigba tọn lẹ ji.”—Owalọ lẹ 1:6-8.

Apọsteli lẹ tin topọ hẹ Jesu he yin finfọnsọnku lọ to Osó Olivie tọn ji, to whenue ewọ jẹ agayi ji. E ma dẹn bọ aslọ de ṣinyọ́n ẹn bọ yé ma sọgan mọ ẹn ba. To fọnsọnku Jesu tọn godo, e ko ze agbasa gbẹtọ tọn wunmẹ voovo do. Amọ́ todin, Jesu jo agbasa gbẹtọ tọn he e zedo to ojlẹ ehe mẹ do bo hẹji yì olọn mẹ taidi nudida gbigbọnọ de. (1 Kọlintinu lẹ 15:44, 50; 1 Pita 3:18) Dile apọsteli nugbonọ lọ lẹ zín nukun yetọn do jiwhé, “dawe awe delẹ he do avọ̀ wewe” sọawuhia to apá na yé. Angẹli he ze agbasa gbẹtọ tọn do lẹ wẹ yé bọ yé kanse dọmọ: “Mì omẹ Galili tọn lẹ, naegbọn mì ṣite bo to jiwhé pọ́n? Jesu ehe, mẹhe yin yíyí sọn mì dè sọyi jiwhé na wá domọ to aliho dopolọ mẹ dile mì mọ ẹn bọ e to jiwhé yì do.”—Owalọ lẹ 1:10, 11.

Ajogidí daho de ma wá aimẹ to whenue Jesu yì sọn aigba ji, hodotọ nugbonọ etọn lẹ kẹdẹ wẹ mọ ẹn. E na lẹkọwa “to aliho dopolọ mẹ”—yèdọ  matin ajogidí daho de bọ hodotọ nugbonọ etọn lẹ kẹdẹ wẹ na doayi tintin tofi etọn to huhlọn Ahọluduta tọn mẹ go.

Apọsteli lọ lẹ lẹkọyi Jelusalẹm. To azán he bọdego lẹ gblamẹ, yé nọ pli dopọ hẹ devi devo lẹ, ehe bẹ “Malia onọ̀ Jesu tọn . . . gọna nọvisunnu Jesu tọn lẹ” hẹn. (Owalọ lẹ 1:14) Pipli ehe to linsinyẹn to odẹ̀ mẹ. Dopo to nuhe go yé to dẹ̀ho gando lẹ mẹ wẹ devi devo dide do otẹn Juda Iskaliọti tọn mẹ bọ gbọnmọ dali, sọha apọsteli lẹ tọn na vọ́ pé 12. (Matiu 19:28) Devi he yin kunnudetọ nuhe Jesu wà lẹ po fọnsọnku etọn po tọn de wẹ yé jlo dọ ni yin. Ovò yin dide nado yọ́n ojlo Jiwheyẹwhe tọn, podọ ehe wẹ whla godo tọn he aṣa ehe yin nùdego to Biblu mẹ. (Psalm 109:8; Howhinwhẹn lẹ 16:33) Matiasi, he sọgan ko yin dopo to omẹ 70 he Jesu dohlan lẹ mẹ, wẹ yin dide bo “yin hihia dogọ apọsteli widopo lẹ.”—Owalọ lẹ 1:26.

Azán ao to whenue Jesu ko hẹji yì olọn mẹ godo, hùnwhẹ Ju lẹ tọn, enẹ wẹ Pẹntikọsti owhe 33 W.M. tọn wá aimẹ. Nudi devi 120 wẹ pli do abò aga tọn de mẹ to Jelusalẹm. To ajiji mẹ, nudidọ de he taidi jẹhọn sinsinyẹn de tọn gọ́ ohọ̀ he mẹ yé te lọ pete. Odẹ́ lẹ taidi miyọ́n sọawuhia bo jẹ do dopodopo mẹhe to finẹ lẹ tọn ji. Devi lọ lẹpo jẹ hodọ to ogbè voovo mẹ ji. Gbigbọ wiwe he Jesu dopà etọn lọ wẹ yin kinkọnjẹgbonu!—Johanu 14:26.