To Sẹgbe Nisan 16tọ, devi lẹ jẹflumẹ. Yé ma mọnukunnujẹ nuhe yọdò he ko jẹvọ́ lọ zẹẹmẹdo mẹ. (Matiu 28:9, 10; Luku 24:11) To nukọn mẹ to azán lọ ji, Kleopasi po devi devo po tọ́n sọn Jelusalẹm bo jei Emausi, he tin to nudi kilomẹtlu 11 do finẹ.

Dile yé to yìyì, yé to hodọdo nuhe ko jọ lọ ji. Whenẹnu wẹ jonọ de kọnawudopọ hẹ yé. E kanse dọmọ: “Whẹho tẹlẹ ji wẹ mì to nudọn do to mìdelẹ ṣẹnṣẹn dile mì to yìyì?” Kleopasi gblọn dọmọ: “Be jonọ de wẹ hiẹ bo nọ nọ̀ dewe ṣo to Jelusalẹm bọ hiẹ ma do yọ́n nuhe ko jọ to finẹ to azán ehelẹ gbè ya?” Jonọ lọ kanse dọmọ: “Onú tẹlẹ wẹ?”—Luku 24:17-19.

Yé dọmọ: “Nuhe gando Jesu Nazalẹti tọn go lẹ wẹ. . . . Míwlẹ tindo todido dọ dawe ehe wẹ omẹ lọ he dona whlẹn Islaeli.”—Luku 24:19-21.

Kleopasi po hatọ etọn po dọ nuhe jọ to azán lọ gbè lẹ. Yé dọ dọ yọnnu delẹ he yì yọdò he mẹ Jesu yin dìdì do lọ kọ̀n mọdọ e ko jẹvọ́, podọ dọ yọnnu ehelẹ yin kunnudetọ nujijọ jiawu de tọn—yèdọ angẹli lẹ sọawuhia bo dọ dọ Jesu togbẹ̀. Yé na linlin dọ mẹdevo lẹ sọ yì yọdò lọ kọ̀n bo “mọ domọ, kẹdẹdile yọnnu lọ lẹ ko dọ do.”—Luku 24:24.

E họnwun dọ devi awe lọ lẹ biọ bẹwlu mẹ gando zẹẹmẹ nuhe ko jọ lọ lẹ tọn go. Nado jla pọndohlan yetọn he ma sọgbe bo ko to nuyiwa do ahun yetọn lẹ ji lọ do, jonọ lọ gblọn po aṣẹpipa po dọmọ: “Mì gugutọ podọ mì he ahun mìtọn tliji nado yí onú lẹpo he yẹwhegán lẹ dọ sè lẹ emi! Be e ma yin dandan na Klisti nado jiya onú ehelẹ tọn podọ nado mọ gigo he jẹ lọ yí ya?” (Luku 24:25, 26) E sọ detana wefọ Owe-wiwe tọn susu he gando Klisti go lẹ na yé.

To godo mẹ, yé omẹ atọ̀n lẹ sẹpọ Emausi. Devi awe lọ lẹ jlo na sè nususu dogọ, enẹwutu yé vẹ̀ jonọ lọ dọmọ: “Nọ mí dè, na owhè ko jai bọ ozán ko kú.” E yigbe nado nọte bọ yé dùnú dopọ. Yé wá yọ́n mẹhe jonọ lọ yin dile e hodẹ̀ bo wẹ́n akla bosọ yí i na yé, ṣigba to whenẹnu, ewọ bu sọn ṣẹnṣẹn yetọn. (Luku 24:29-31) E họnwun na yé todin dọ Jesu togbẹ̀!

Devi awe lọ lẹ yí zohunhun do dọhona ode awetọ gando nuhe jọ do yé go lọ go dọmọ: “Be ahun mítọn ma yin whinwhàn sinsinyẹn dile ewọ to hodọna mí to aliho ji, bo to zẹẹmẹ Owe-wiwe lẹ tọn basi na mí ya?” (Luku 24:32) Yé yawu lẹkọyi Jelusalẹm, fie yé mọ apọsteli lẹ po mẹdevo lẹ po te. Whẹpo Kleopasi po hatọ etọn po nido na linlin nuhe jọ tọn, yé sè bọ mẹdevo lẹ dọmọ: “Na nugbo tọn, Oklunọ ko yin finfọn podọ e sọawuhia Simọni!” (Luku 24:34) Enẹgodo, yé omẹ awe lẹ dọ lehe Jesu sọawuhia yé do. Mọwẹ, yelọsu mọ ẹn po nukun yetọn po.

Todin, yemẹpo jọsi, to whenue Jesu sọawuhia yé to abò lọ mẹ! Ehe paṣa yé taun, na yé to budina Ju lẹ bo suhọ̀n dota. Etomọṣo, Jesu ṣite to ṣẹnṣẹn yetọn. E yí ogbè fifá do dọna yé dọmọ: “Jijọho ni tin hlan mì.” Ṣigba, ahun yetọn gbàdo. Dile yé ko lẹn do wayi, yé “lẹndọ gbigbọ de mọ wẹ yé te.”—Luku 24:36, 37; Matiu 14:25-27.

Nado dohia dọ e ma yin numimọ kavi nuhe lẹn yé te de poun, ṣigba, dọ agbasa gbẹtọ tọn de wẹ ewọ tindo, Jesu do alọ po afọ etọn lẹ po hia yé bo dọmọ: “Naegbọn mì do biọ bẹwlu mẹ, podọ naegbọn mì do tindo ayihaawe to ahun mìtọn mẹ? Mì pọ́n alọ ṣie po afọ ṣie lẹ po, dọ yẹnlọsu wẹ; mì doalọ go e bo pọ́n, na gbigbọ ma nọ tindo agbasalan po ohú lẹ po dile mì mọdọ yẹn tindo do.” (Luku 24:36-39) Ayajẹ yetọn gọfla bọ awuji yé, ṣogan yé gbẹ́ to awuwhle nado yise.

Nado gọalọna yé nado yise dọ ewọ wẹ nugbonugbo,  e kanse dọmọ: “Be mì tindo nude to finẹ nado dù ya?” E sọ yí whèvi hìhì de to yé si bo dù i. Enẹgodo, e dọmọ: “Ehelẹ wẹ ohó ṣie lẹ he yẹn dọna mì whenue yẹn gbẹ́ pò to mì dè [whẹpo yẹn do yin hùhù], dọ onú lẹpo he yin kinkando Osẹ́n Mose tọn mẹ podọ do Yẹwhegán lẹ po Psalm lẹ po mẹ gando yẹn go dona yin hinhẹndi.”—Luku 24:41-44.

Jesu ko gọalọna Kleopasi po hatọ etọn po nado mọnukunnujẹ Owe-wiwe lẹ mẹ, podọ todin, e wà nudopolọ na mẹhe pli do finẹ lẹpo dọmọ: “E ko yin kinkan dole dọ Klisti na jiya bo na fọ́n sọn oṣiọ lẹ mẹ to azán atọ̀ntọ gbè, podọ to dodonu oyín etọn tọn ji, yẹwheho lẹnvọjọ tọn na jona ylando lẹ tọn na yin didọ to akọta lẹpo mẹ—yèdọ bẹsọn Jelusalẹm, mìwlẹ wẹ na yin kunnudetọ onú ehelẹ tọn.”—Luku 24:46-48.

Apọsteli Tọmasi ma tin to finẹ na whẹwhinwhẹ́n de wutu. To azán he bọdego lẹ gbè, mẹhe pò lẹ dọna ẹn po ayajẹ po dọmọ: “Míwlẹ ko mọ Oklunọ!” Tọmasi gblọn dọmọ: “Eyin yẹn ma mọ oṣó-pà to alọ etọn lẹ go bo zín alọvi ṣie do oṣó-pà lọ lẹ mẹ bosọ zín alọ ṣie do adàja etọn mẹ, yẹn ma na yise gbede.”—Johanu 20:25.

To azán ṣinatọ̀n godo, devi lẹ sọ vọ́ pli bo suhọ̀n dota bọ Tọmasi to finẹ todin. Jesu ze agbasa gbẹtọ tọn do bo sọawuhia to ṣẹnṣẹn yetọn bosọ dọnudo yé dọmọ: “Jijọho ni tin hlan mì.” Jesu sọ lilẹ́ pannukọn Tọmasi bo dọmọ: “Yí alọvi towe dofi bo pọ́n alọ ṣie lẹ, podọ zín alọ towe do adàja ṣie mẹ, bosọ gbọ ayihaawe tindo, ṣigba bo yise.” Tọmasi dawhá dọmọ: “Oklunọ ṣie podọ Jiwheyẹwhe ṣie!” (Johanu 20:26-28) Mọwẹ, e masọ tindo ayihaawe todin ba dọ Jesu togbẹ̀ taidi nudida gbigbọnọ huhlọnnọ de he yin afọzedaitọ Jehovah Jiwheyẹwhe tọn.

Jesu dọmọ: “Na hiẹ mọ mi wutu wẹ zọ́n bọ hiẹ do yise ya? Ayajẹnọ wẹ mẹhe ma mọ ṣogan bo yise lẹ.”—Johanu 20:29.