Pita po Johanu po ko yì Jelusalẹm nado wleawudaina Juwayi lọ, dile Jesu na yé anademẹ etọn do. Enẹgodo, Jesu po apọsteli ao he pò lẹ po dedo dọ́n. Owhè ko to họyì to whèyihọ-waji fie Jesu po devi etọn lẹ po te dile yé to tejẹ sọn Osó Olivie tọn ji. Whla godo tọn die he Jesu na mọ lẹdo lọ mẹ hlan sọn fi to okle kakajẹ fọnsọnku etọn godo.

E ma dẹn bọ Jesu po devi etọn lẹ po jẹ tòdaho lọ mẹ bo yì owhé he gbè yé na dù núdùdù Juwayi tọn lọ te. Yé gbọn pèkán lọ lẹ ji yì abò daho aga tọn lọ mẹ. To finẹ, yé mọdọ nulẹpo ko yin awuwlena na núdùdù he yewlẹ kẹdẹ na dù lọ. Jesu ko to nukundo dotẹnmẹ hundote ehe, na e dọmọ: “E jlo mi taun nado dù Juwayi ehe hẹ mì whẹpo yẹn nido jiya.”—Luku 22:15.

Owhe susu jẹnukọn, gbẹtọ lẹ ko jẹ aṣa lọ nado nọ ze kọfo susu he mẹ ovẹn te gbọn mẹhe wá Juwayi lọ tẹnmẹ lẹ ji hodo ji. Todin, to whenue Jesu yí dopo to kọfo lọ lẹ mẹ, e dopẹ́ bo dọmọ: “Dopodopo mìtọn ni yí ehe bo nù sọn e mẹ, na yẹn dọna mì dọ: Sọn din sọyi, yẹn ma nasọ vọ́ nù sọn sinsẹ́n ovẹn tọn mẹ hẹ mì ba kaka Ahọluduta Jiwheyẹwhe tọn nado wá.” (Luku 22:17, 18) E dona ko họnwun dọ okú etọn to sisẹpọ.

To núdùdù Juwayi tọn lọ whenu, nuhe paṣamẹ de jọ. Jesu fọnṣite bo de awugbó etọn lẹ dai bosọ yí awusúnsúnvọ̀ de. Enẹgodo, e kọ̀n osin do basia he to yakẹ de mẹ. To paa mẹ, jonọyitọ de wẹ nọ hẹn ẹn diun dọ afọ jonọ emitọn lẹ tọn yin kiklọ, vlavo gbọn devizọnwatọ de dali. (Luku 7:44) Jonọyitọ de ma tin to otẹn lọ mẹ, enẹwutu Jesu wẹ de nado wadevizọn ehe. Dopo to apọsteli lẹ mẹ sọgan ko yí dotẹnmẹ lọ zan nado wadevizọn ehe, amọ́ depope to yé mẹ ma wàmọ. Be na yé gbẹ́ to agbàwhlẹn to yede ṣẹnṣẹn wẹ zọ́n ya? Depope he whẹho lọ yin, winyan na ko hù yé nado mọdọ Jesu wẹ to afọ yetọn lẹ klọ́.

Whenue Jesu jẹ Pita dè, e gbẹ́ bo dọmọ: “Lala, hiẹ ma na klọ́ afọ ṣie lẹ gbede.” Jesu gblọn dọmọ: “Eyin yẹn ma klọ́ yé, hiẹ ma tindo mimá hẹ mi gba.” Pita gblọn po numọtolanmẹ po dọmọ: “Oklunọ, e ma yin afọ ṣie lẹ kẹdẹ gba, ṣigba alọ ṣie lẹ po ota ṣie po ga.” Enẹwutu, e na ko paṣa ẹ to whenue Jesu gblọn dọmọ: “Ewọ he ko lawu ma tindo nuhudo hugan afọ etọn lẹ kiklọ tọn, ṣigba e ko wé pete. Podọ mìwlẹ wé, ṣigba e ma yin mìmẹpo gba.”—Johanu 13:8-10.

Jesu klọ́ afọ na yé omẹ 12 lẹpo, kakajẹ afọ Juda Iskaliọti tọn lẹ ji. To whenue Jesu ze awugbó etọn lẹ do bo ko sọ vọ́ jagla to tafo kọ̀n godo, e kanse dọmọ: “Be mìwlẹ mọnukunnujẹ nuhe yẹn ko wà na mì lọ mẹ ya? Mì nọ ylọ mi dọ, ‘Mẹplọntọ,’ podọ,  ‘Oklunọ,’ owhẹ̀ mìtọn whẹ́n, na mọ wẹ yẹn yin. Enẹwutu, eyin yẹn, he tlẹ yin Oklunọ po Mẹplọntọ po klọ́ afọ mìtọn lẹ, mìlọsu dona nọ klọ́ afọ ode awetọ mìtọn lẹ tọn ga. Na ohia wẹ yẹn zedai na mì, dọ kẹdẹdile yẹn basi na mì do, mọ wẹ mìlọsu dona nọ basi do ga. Nugbonugbo wẹ yẹn dọna mì dọ, Afanumẹ de ma nọ klohu oklunọ etọn, mọdopolọ mẹhe yin didohlan ma nọ klohu mẹhe do e hlan gba. Eyin mìwlẹ yọ́n onú ehelẹ, ayajẹnọ wẹ mì eyin mì nọ basi yé.”—Johanu 13:12-17.

Nuplọnmẹ dagbe nankọ die nado nọ wadevizọn po whiwhẹ po! Hodotọ Jesu tọn lẹ ma dona nọ dín otẹn tintan bo lẹndọ yé yin mẹjọmẹ he mẹdevo lẹ dona nọ wadevizọn na. Kakatimọ, yé dona nọ hodo apajlẹ Jesu tọn, e ma yin gbọn aṣa afọ kiklọ tọn depope dali gba, ṣigba gbọn ojlo tintindo nado yí whiwhẹ po mẹnukuntamahopọn po do wadevizọn na mẹdevo lẹ dali.