Taidi gbẹtọvi pipé de, Jesu ma tindo numimọ ayimajai po tukla susu he gbẹtọvi he pò lẹ nọ tindo po tọn. Ṣogan, e vẹawu gbẹtọ lẹ taun. E nọ wà nuhe go e pé lẹpo na yé, yèdọ zẹ̀ nuhe yin dandan tọn lẹ go. Mọwẹ, awuvẹmẹ whàn ẹn nado gọalọna mẹdevo lẹ. Lẹnnupọndo apajlẹ he tin to Weta 32, 37, 57, 99 mẹ lẹ ji.

Mẹlẹpo—yèdọ mẹho po yọpọ po—wẹ nọ mọdọ emi sọgan dọnsẹpọ Jesu, na e ma nọ nọla na mẹdevo lẹ kavi dohia dọ emi yin mẹjọmẹ wutu. Na gbẹtọ lẹ mọdọ Jesu nọ do ojlo ahundopo tọn hia yé wutu, yé nọ voawu to e dè. Nado doayi ehe go, pọ́n Weta 25, 27, 95.

Jesu nọ saba hodẹ̀ ahundopo tọn hlan Otọ́ etọn to whenue e tin edeṣo podọ whenue e topọ hẹ sinsẹ̀n-basitọ nugbo lẹ. E hodẹ̀ to ninọmẹ susu mẹ, e ma yin to núdùdù whenu kẹdẹ gba. E nọ hodẹ̀ nado dopẹna Otọ́ etọn, nado pà ẹ podọ nado dín anademẹ etọn whẹpo do basi nudide sinsinyẹn lẹ. Pọ́n apajlẹ he tin to Weta 24, 34, 91, 122, 123 mẹ lẹ.

To whedelẹnu, eyin Jesu tlẹ jlo na gbọjẹ bo yí agbọ́ pẹẹde, e nọ ze nuhudo etọn do apadopo bo nọ yí ede zan do mẹdevo lẹ tamẹ. E ma tindo pọndohlan ṣejannabi tọn. To adà ehe lọsu mẹ, e ze apajlẹ he mí sọgan hodo pẹkipẹki de dai. Pọ́n lehe apajlẹ enẹ sọawuhia to Weta 19, 41, 52 mẹ do.

Jesu wà nususu hugan nupinplọnmẹ gando nuhudo lọ nado jonamẹ go—e do jonamẹ hia to nuyiwa etọn hẹ apọsteli etọn lẹ po mẹdevo lẹ po mẹ. Lẹnayihamẹpọn do apajlẹ he tin to Weta 26, 40, 64, 85, 131 mẹ lẹ ji.

E ko yin didọdai dọ suhugan Ju lẹ tọn ma na kẹalọyi Mẹsia lọ, podọ dọ kẹntọ etọn lẹ na hù i. Enẹwutu, Jesu sọgan ko whleawu nado wà nususu do gbẹtọ lẹ tamẹ. Kakatimọ, e yí zohunhun do nọgodona sinsẹ̀n-bibasi nugbo. E ze apajlẹ zohunhun tọn dai na hodotọ etọn lẹ he nọ pehẹ ojlo matindo kavi nukundiọsọmẹ. Pọ́n Weta 16, 72, 103.

Adà susu tlala mẹ wẹ Jesu yiaga hú gbẹtọvi mapenọ lẹ te, taidi to oyọnẹn po nuyọnẹn po mẹ. Matin ayihaawe, pipé-yinyin etọn zọ́n bọ e tindo nugopipe agbasa tọn po apọ̀nmẹ tọn po hú mẹhe lẹdo e lẹpo. Ṣogan, e yí whiwhẹ do yilizọn na mẹdevo lẹ. Hiẹ na mọ nuplọnmẹ lẹ gando ehe go to Weta 10, 62, 66, 94, 116 mẹ.

Jesu nọ saba fahomẹ hẹ apọsteli etọn lẹ po mẹdevo lẹ po eyin yé gboawupo nado hodo apajlẹ etọn bo ma yí nuhe e dọ do yizan mẹ. E nọ yí homẹfa do basi dọvọdọ nuplọnmẹ he yé tindo nuhudo etọn lẹ tọn, na yé nido sọgan dọnsẹpọ Jehovah dogọ. Lẹnnupọndo apajlẹ he do homẹfa Jesu tọn hia lẹ ji to Weta 74, 98, 118, 135 mẹ.