Owhe dopo daa ko dibla juwayi sọn whenue gbọ́n Johanu Baptizitọ lọ do Jesu hia taidi Lẹngbọvu Jiwheyẹwhe tọn. Dile Jesu bẹ lizọnyizọn etọn jẹeji, sunnu ahunjijlọnọ delẹ lẹzun devi etọn lẹ, taidi Andle, Simọni Pita, Johanu, vlavo Jakọbu (nọvisunnu Johanu tọn), Filippi po Batelemi (he sọ nọ yin yiylọdọ Natanaeli) po. To nukọn mẹ, mẹsusu devo lẹ hopódona yé to Jesu hihodo mẹ.—Johanu 1:45-47.

Todin, Jesu ko wleawufo nado de apọsteli etọn lẹ. Yewlẹ wẹ na yin gbẹdohẹmẹtọ pẹkipẹki etọn lẹ bo nasọ mọ azọ́nplọnmẹ vonọtaun yí. Ṣigba, jẹnukọn whẹ́, Jesu tọ́nyi osó de ji, vlavo dehe sẹpọ Ohù Galili tọn he ma dẹn do Kapẹlnaumi. E yí zánto dopo blebu do hodẹ̀, vlavo nado biọ nuyọnẹn po dona Jiwheyẹwhe tọn po. To wunkẹngbe, e ylọ devi etọn lẹ wá ede dè bo de omẹ 12 to yé mẹ taidi apọsteli lẹ.

Jesu de omẹ ṣidopo he yin nùdego wayi lẹ, gọna Matiu he Jesu ylọ sọn tòkuẹ-ṣinyantẹn. Omẹ atọ́n devo he yin dide lẹ wẹ Juda (he sọ nọ yin yiylọdọ Tade podọ “visunnu Jakọbu tọn”), Simọni Kananinu lọ, Tọmasi, Jakọbu visunnu Alfe tọn po Juda Iskaliọti po.—Matiu 10:2-4; Luku 6:16.

Omẹ 12 ehelẹ ko nọ zingbejizọnlin hẹ Jesu kakajẹ whenẹnu bọ e yọ́n yé ganji. Delẹ to yé mẹ yin hẹnnumẹ etọn lẹ. Ayihaawe ma tin dọ nafẹ-vi Jesu tọn wẹ Jakọbu po nọvisunnu etọn Johanu po yin tlọlọ. Podọ eyin Alfe yin nọvisunnu Josẹfu he yin otọ́ mẹgopọntọ Jesu tọn, dile mẹdelẹ nọ lẹn do, be apọsteli Jakọbu he yin visunnu Alfe tọn yin tavẹ-vi Jesu tọn niyẹn.

E họnwun dọ, e ma nọ vẹawuna Jesu nado flin yinkọ apọsteli etọn lẹ tọn. Ṣigba, be a sọgan flin yé ya? Nude he sọgan gọalọ wẹ nado nọ flindọ awe to yé mẹ nọ yin Simọni, awe nọ yin Jakọbu, podọ awe devo nọ yin Juda. Simọni (Pita) tindo nọvisunnu de he nọ yin Andle, bọ Jakọbu (visunnu Zebede tọn) tindo nọvisunnu de he nọ yin Johanu. Ayiha de niyẹn nado flin yinkọ apọsteli ṣinatọ̀n tọn. Omẹ ẹnẹ he pò lẹ wẹ tòkuẹ-ṣinyantọ de (Matiu), gọna mẹde he wá tindo ayihaawe (Tọmasi), mẹde he yin yiylọ sọn atin de glọ (Natanaeli) po họntọn Natanaeli tọn (Filippi) po.

Widopo to apọsteli lọ lẹ mẹ wá sọn Galili, yèdọ otò Jesu lọsu tọn mẹ. Natanaeli wá sọn Kana. Bẹtsaida-nu wẹ Filippi, Pita po Andle po. To nukọn mẹ, Pita po Andle po sẹtẹn yì Kapẹlnaumi, fie Matiu na ko nọ nọ̀. Jakọbu po Johanu po lọsu nọ nọ̀ Kapẹlnaumi kavi lẹdo etọn mẹ, podọ ajọ́ whèhuhu tọn wẹ yé nọ wà to lẹdo lọ mẹ. E taidi dọ Juda Iskaliọti he wá de Jesu hia lọ kẹdẹ wẹ yin apọsteli he wá sọn Jude.