Jesu ko wazọ́n susu to gbenẹgbe bọ agbọ́ ko pé e. To whenue owhè ko jai, e dọna devi lẹ dọmọ: “Mì gbọ mí ni dasá yì awà awetọ ji,” yèdọ fie pannukọn lẹdo Kapẹlnaumi tọn.—Malku 4:35.

Otò Gelazeninu lẹ tọn to adà awetọ Ohù Galili tọn ji. Lẹdo ehe sọ nọ yin yiylọdọ Dekapole. Aṣa Glẹkinu lẹ tọn wẹ gbayipe to tòdaho Dekapole tọn lẹ mẹ, dile etlẹ yindọ Ju susu nọ nọ̀ finẹ ga.

Gbẹtọ lẹ doayi e go dọ Jesu to yìyì sọn Kapẹlnaumi. Tọjihun devo lẹ lọsu jẹ ohù lọ dasá ji. (Malku 4:36) Na nugbo tọn, fie yé jei lọ ma dẹn sọmọ. Ohù Galili tọn taidi tándo daho de he dite na nudi kilomẹtlu 21 bo gblo na nudi kilomẹtlu 12. Amọ́, e ma nọma siso.

Mahopọnna dọ Jesu yin mẹpipe, e họnwun dọ agbọ́ nọ wá pé e to lizọnyizọn zohunhunnọ etọn mẹ. Enẹwutu, to whenue yé súnhún godo, e mlọnai to húnyonu bo ze ota do kọ̀donu de ji bosọ damlọn.

Susu to apọsteli lọ lẹ mẹ yọ́n tọjihun kùn ganji, ṣigba gbejizọnlin ehe ma na bọawu na yé. Osó lẹ wẹ lẹdo yé pé bọ Ohù Galili tọn nọ saba hùnmiyọ́n taun to nukunmẹ. To whedelẹnu, jẹhọn fifá nọ yìn sọn osó lẹ ji bo nọ wá pé osin miyọ́nawu he to ohù lọ sin nukunmẹ bọ yujẹhọn sinsinyẹn lẹ nọ fọ́n to ohù lọ ji to ajiji mẹ. Nuhe jọ todin niyẹn. E ma dẹn bọ agbówhẹn lẹ jẹ hihò do tọjihun lọ go ji. “Osin sọ jẹ ohún lọ gọ́ ji bọ yé tin to owù mẹ.” (Luku 8:23) Ṣogan, Jesu ma fọ́n!

Azọ́nwatọ ohù ji tọn ehelẹ yí numimọ he yé ko tindo gando yujẹhọn lẹ go zan bo wà nuhe go yé pé lẹpo nado lùn yujẹhọn lọ tọ́n. Ṣigba, ehe gbọnvo. Na yé to budina ogbẹ̀ yetọn wutu, yé fọ́n Jesu bo dawhá dọmọ: “Oklunọ, whlẹn mí, mí to na dọ̀n!” (Matiu 8:25) Devi lọ lẹ dibu dọ yé na kútọ todin!

To whenue Jesu fọ́n, e dọna apọsteli lọ lẹ dọmọ: “Naegbọn mì do to budi sọmọ, mì yise pẹvinọ?” (Matiu 8:26) Enẹgodo, Jesu degbedo jẹhọn lọ po ohù lọ po dọmọ: “Danido! Nọ whii!” (Malku 4:39) Jẹhọn he to adán ji lọ doalọte bọ ohù lọ nọ whii. (To whenue Malku po Luku po to hodọ gando nujijọ ayidego tọn ehe go, yé zinnudeji whẹ́ dọ Jesu doalọtena yujẹhọn lọ to azọ́njiawu-liho bọ to enẹgodo, yé wá donù yise matindo devi lọ lẹ tọn go.)

Pọ́n lehe enẹ na ko yinuwado devi lẹ ji do! Yé ṣẹṣẹ mọ bọ ohù he to adán ji lọ nọ whii. Yé dibu tlala bo jẹ didọna ode awetọ ji dọmọ: “Mẹnu wẹ ehe na taun tọn? Jẹhọn po ohù po tlẹ nọ setonuna ẹn.” Podọ yé jẹ awà awetọ ohù lọ tọn ji awuyẹyẹ-afọyẹyẹ. (Malku 4:41–5:1) Vlavo, tọjihun devo he to ohù lọ dasá lẹ na ko penugo bo lẹkọyi agé he to whèyihọ-waji ohù lọ tọn.

Jidevọnamẹ nankọ die nado yọnẹn dọ Visunnu Jiwheyẹwhe tọn tindo huhlọn do onú jọwamọ tọn lẹ ji! To whenue e na lẹ́ ayidonugo etọn mlẹnmlẹn hlan aigba to gandudu Ahọluduta tọn etọn whenu, mẹlẹpo na tin to hihọ́ mẹ, na nugbajẹmẹji jọwamọ tọn he dobu de ma na tin ba!