Linlin kọlilẹ Jesu tọn sọn Dekapole gbàpe gbọn Ju he nọ nọ̀ agewaji to Ohù Galili tọn tó lẹ ṣẹnṣẹn. Mẹsusu na ko sè dọ to jẹhọn-ahizi de whenu to agọe, Jesu doalọtena jẹhọn bo hẹn osin lẹ nado nọ whii, podọ mẹdelẹ na ko sè dọ e hẹnazọ̀ngbọna dawe he tindo aovi lọ lẹ. Enẹwutu, “gbẹtọgun daho de” pli dopọ to ohù lọ tó, vlavo to lẹdo Kapẹlnaumi tọn mẹ, nado pé Jesu. (Malku 5:21) Dile e jẹte, apàpà to sisọ yé.

Dopo to mẹhe jlo na mọ Jesu vẹkuvẹku lẹ mẹ wẹ Jailu, he yin ogán sinagọgu tọn de, vlavo dopo to sinagọgu Kapẹlnaumi tọn lẹ mẹ. E ṣinyọ́n nukunmẹ ai to afọ Jesu tọn lẹ kọ̀n bo vẹ̀ ẹ whlasusu dọmọ: “Viyọnnu ṣie pẹvi tin to kúdonu. Jaale, wá bo ze alọ towe do e ji na ewọ nido sọgan jẹgangan bo nọgbẹ̀.” (Malku 5:23) Nawẹ Jesu na yinuwa gando ovẹvivẹ Jailu tọn nado gọalọna viyọnnu dopo akàn etọn, mẹhe tindo owhe 12 poun bosọ vẹ́ na ẹn taun lọ go gbọn?—Luku 8:42.

To whenue Jesu to aliji jei owhé Jailu tọn gbè, e pehẹ ninọmẹ devo he biọ lanmẹ taun. Susu mẹhe hodo Jesu lẹ tọn wẹ to jejeji, bo to kinkanse eyin yé na mọ bọ e na wà azọ́njiawu devo. Ṣigba, nawe de to gbẹtọgun lọ mẹ bọ azọ̀n sinsinyẹn he e to jijẹ wẹ to ahunmẹduna ẹn.

E ko yì owhe 12 plipli todin he nawe Ju ehe to hùndi. E ko gbọn doto susu lẹ dè bo ko zan akuẹ he e tindo lẹpo nado mọ nukunpedomẹgo yetọn yí. Amọ́ azọ̀n lọ ma pọnte. Na nugbo tọn, ninọmẹ etọn tlẹ “ylan deji” wẹ.—Malku 5:26.

Hiẹ lọsu sọgan ko mọdọ, gbọnvona dọ azọ̀n etọn na nọ hẹn ẹn gbọjọ, e na nọ zọ́n bọ winyan na nọ hù i bo nasọ nọ de e pò. Yè ma nọ saba dọho gando ninọmẹ mọnkọtọn go na mẹdevo lẹ. Humọ, to Osẹ́n Mose tọn glọ, hùndidi nọ hẹn yọnnu de zun mawé to aṣa-liho. Mẹdepope he doalọ ewọ kavi awù etọn he go ohùn jẹ lẹ go dona lawu bo nasọ yin mawé kakajẹ whèjai.—Levitiku 15:25-27.

Nawe ehe “sè nuhe Jesu ko wà lẹ,” podọ ewọ dín in mọ todin. Na ninọmẹ mawé tọn etọn wutu, e lìn biọ gbẹtọgun lọ mẹ dẹẹdẹ bo to didọna ede dọmọ: “Eyin yẹn ko gbẹ́ doalọ awugbó etọn lẹ go, yẹn na jẹgangan.” Whenue ewọ doalọ tónu awù Jesu tọn lẹ tọn go tlolo wẹ e mọdọ hùndidi emitọn doalọte! E “ko yin azọ̀nhẹngbọna sọn azọ̀n sinsinyẹn lọ mẹ.”—Malku 5:27-29.

Enẹgodo, Jesu dọmọ: “Mẹnu wẹ doalọ go e?” Numọtolanmẹ tẹwẹ a lẹndọ nawe lọ na ko tindo to whenue e sè hogbe enẹlẹ? Pita jẹagọdo Jesu taidi mẹhe to wiwọhẹ ẹ to aliho he ma yin tlọlọ de mẹ dọmọ: “Gbẹtọgun lọ lẹ wẹ to hihá do we bosọ to finfinyọ́n we.” Eyin mọ wẹ, naegbọn Jesu do kanse dọ, “Mẹnu wẹ doalọ go e?” Jesu basi zẹẹmẹ dọmọ: “Mẹde doalọ go e, na yẹn mọdọ huhlọn tọ́n sọn go e.” (Luku 8:45, 46) Mọwẹ, azọ̀nhẹngbọ he wá aimẹ lọ ko de huhlọn sọn Jesu go.

To whenue nawe lọ mọdọ yè ko doayi emi go, e wá jẹklo to nukọnna Jesu po obu po bosọ to sisọsisọ. To mẹlẹpo nukọn, e dọ nugbo gando azọ̀n etọn go bosọ dọ dọ emi ko yin azọ̀nhẹngbọna. Po homẹdagbe po, Jesu miọnhomẹna ẹn dọmọ: “Viyọnnu ṣie, yise towe ko hẹn we jẹgangan. Yì to jijọho mẹ, bo tindo agbasalilo sọn azọ̀n sinsinyẹn towe mẹ.”—Malku 5:34.

E họnwun dọ Mẹhe Jiwheyẹwhe ko de nado dugán do aigba ji yin mẹde he jọmẹ bo nọ vẹawumẹ. E ma nọ hò gbẹtọ lẹ tọn pọ́n kẹdẹ gba, ṣigba e sọ tindo huhlọn nado gọalọna yé!