To whenue Jesu, Pita, Jakọbu po Johanu po jẹte sọn osó lọ ji, yé pé gbẹtọgun daho de. Ṣigba nude to jijọ. Wekantọ lẹ lẹdo devi lẹ bo to nudọn hẹ yé. Homẹ gbẹtọ lọ lẹ tọn hùn nado mọ Jesu, podọ yé họ̀nwezun wá nado dọnudo e. E kanse dọmọ: “Etẹ dọ̀n wẹ mì te hẹ yé?”—Malku 9:16.

Dawe de sọn gbẹtọgun lọ mẹ jẹklo to nukọnna Jesu bo basi zẹẹmẹ na ẹn dọmọ: “Mẹplọntọ, yẹn plan visunnu ṣie wá dè we na e tindo gbigbọ unbọpẹn tọn de wutu, podọ fidepope he gbigbọ lọ jẹ e ji te, e nọ dlan ẹn do kọmẹ, bọ e nọ to fútúfútú tún sọn nùmẹ bosọ nọ to adúkúnkún dù bo nọ ba huhlọn pò. Yẹn sọ dọna devi towe lẹ nado yàn ẹn jẹgbonu, ṣigba yé ma penugo nado wàmọ.”—Malku 9:17, 18.

E taidi dọ wekantọ lẹ to homọdọdo devi lẹ go na yé ma penugo nado hẹnazọ̀ngbọna visunnu lọ mahopọnna vivẹnudido yetọn lẹ, vlavo bo to yé ṣanko. Enẹwutu, kakati nado gblọnho na otọ́ he ko jẹflumẹ taun enẹ, Jesu lẹhlan gbẹtọgun lọ bo dọmọ: “Whẹndo mayisenọ podọ bublunọ E, nawẹ yẹn na nọ mì dè bo na sinyẹnlin hẹ mì dẹnsọ?” Matin ayihaawe, wekantọ lẹ hodọ wẹ e te po hogbe sinsinyẹn ehelẹ po, yèdọ mẹhe ko fọ́n nuhahun dote na devi etọn lẹ to godo etọn. To whenue e lẹhlan otọ́ he jẹflumẹ lọ, Jesu dọmọ: “Plan visunnu towe wáfi.”—Luku 9:41.

Dile visunnu lọ to dindọnsẹpọ Jesu, aovi he tin to e mẹ lọ dlan ẹn do kọmẹ bo húnhún in gìgìgì. Visunnu lọ to bibli to kọmẹ, bo to fútúfútú tún sọn nùmẹ. Jesu kanse otọ́ etọn dọmọ: “Whetẹnu gbọ́n wẹ ehe ko to jijọ do e go?” E gblọn dọmọ: “Sọn ovu whenu gbọ́n, podọ sọn ojlẹ de mẹ jẹ devo mẹ, e nọ dlan ẹn do miyọ́n mẹ podọ do osin mẹ nado hù i.” Dawe lọ vẹ̀ ẹ  dọmọ: “Eyin hiẹ sọgan wà nudepope, wàlẹblanuna mí bo gọalọna mí.”—Malku 9:21, 22.

Otọ́ lọ jẹflumẹ na devi Jesu tọn lẹ lọsu ma penugo nado gọalọna ẹn wutu. Nado na gblọndo obiọ egblemaku tọn dawe lọ tọn, Jesu dotuhomẹna ẹn po hogbe ehelẹ po dọmọ: “Naegbọn hiẹ do dọ, ‘Eyin hiẹ sọgan’? Na onú lẹpo wẹ sọgan yọnbasi na mẹhe tindo yise.” To afọdopolọji, otọ́ lọ dọ po ogbè lélé po dọmọ: “Yẹn tindo yise! Gọalọna mi to fie yẹn tindo nuhudo yise tọn dogọ te!”—Malku 9:23, 24.

Jesu doayi e go dọ gbẹtọgun de to wezundo ja e dè. Dile omẹ ehe lẹpo to pinpọn ẹn, Jesu gbẹnuna aovi lọ dọmọ: “Hiẹ gbigbọ unbọpẹnnọ podọ tókunọ, yẹn degbena we, tọ́n sọn ewọ mẹ bo masọ biọ ewọ mẹ ba blo.” Dile gbigbọ lọ to tintọ́n, e hẹn visunnu lọ nado dawhá gángán bosọ húnhún in gìgìgì whlasusu. Enẹgodo, visunnu lọ mlọnai ṣúdúdú ma whàngo. To whenue mẹsusu mọ ehe, yé dọmọ: “E ko kú!” (Malku 9:25, 26) Ṣigba, to whenue Jesu hẹn alọ visunnu lọ tọn go, e fọnṣite bo “yin azọ̀nhẹngbọna sọn gànhiho enẹ mẹ.” (Matiu 17:18) Enẹwutu, avò vò gbẹtọ lẹ na nuhe wà Jesu te lẹ.

Jẹnukọnna enẹ, to whenue Jesu do devi lẹ hlan nado yì dọyẹwheho, yé penugo nado yàn aovi lẹ jẹgbonu. Enẹwutu, todin he yé tin to owhé de gbè, yé kanse e dọmọ: “Naegbọn míwlẹ ma do sọgan yàn ẹn jẹgbonu?” Jesu basi zẹẹmẹ dọ yise yetọn yin pẹvi wutu wẹ, bo dọmọ: “Ehe nkọ ma sọgan tọ́njẹgbonu adavo gbọn odẹ̀ kẹdẹ dali.” (Malku 9:28, 29) Yé dona tindo yise he lodo bosọ biọ huhlọn Jiwheyẹwhe tọn to odẹ̀ mẹ nado sọgan yàn aovi huhlọnnọ enẹ jẹgbonu.

Jesu dotana dọmọ: “Nugbo wẹ yẹn dọna mì, eyin mì tindo yise he sọ okún mutaldi tọn de, mì na dọna osó ehe dọ, ‘Sẹtẹn sọn fi yì dọ́n,’ bọ e na sẹtẹn, podọ nudepope ma na glo mì.” (Matiu 17:20) Lehe yise sọgan tindo huhlọn do sọ!

Aliglọnnamẹnu po nuhahun he nọ hẹnalọdotena nukọnyiyi to sinsẹ̀nzọn Jehovah tọn mẹ lẹ po sọgan taidi osó paa de he ma sọgan yin didasa kavi yin tẹnsẹna. Etomọṣo, eyin mí wleawuna yise, mí sọgan duto aliglọnnamẹnu po nuhahun he taidi osó enẹlẹ po ji.