Pita ko sè ayinamẹ Jesu tọn gando lehe nuhahun he fọ́n to mẹmẹsunnu lẹ ṣẹnṣẹn sọgan yin dididẹ do go, enẹ wẹ nado nọ tẹnpọn bo nọ didẹ ẹ to omẹ awe he go e gando lẹ kẹdẹ ṣẹnṣẹn. Etomọṣo, e taidi dọ Pita jlo na yọ́n whla nẹmu he mẹde dona dovivẹnu nado wàmọ.

Pita kanse dọmọ: “Oklunọ, whla nẹmu wẹ mẹmẹsunnu ṣie na waylando do go e bọ yẹn dona jona ẹn? Kakajẹ whla ṣinawe wẹ ya?” Sinsẹ̀ngán delẹ nọ plọnmẹ dọ mẹde dona jonamẹ kakajẹ whla atọ̀n. Enẹwutu, Pita sọgan ko lẹndọ eyin emi jona mẹmẹsunnu de “kakajẹ whla ṣinawe,” be emi ko jonamẹ gbau niyẹn.—Matiu 18:21.

Ṣigba, nado lẹn whla nẹmu he mẹde ṣinuwa do mí, ma sọgbe hẹ nuplọnmẹ Jesu tọn. Enẹwutu, e gbẹnuna Pita bo dọmọ: “Yẹn ma dọna we dọ, kakajẹ whla ṣinawe gba, ṣigba, kakajẹ whla 77.” (Matiu 18:22) To hogbe devo mẹ, enẹ zẹẹmẹdo to whelẹponu. Whla nẹmu he Pita dona jona mẹmẹsunnu etọn ma tindo dogbó.

Enẹgodo, Jesu na apajlẹ de Pita po mẹhe pò lẹ po nado hẹn yé mọnukunnujẹemẹ ganji dọ dandannu wẹ e yin nado nọ jonamẹ. E gando afanumẹ de he gboawupo nado hodo apajlẹ oklunọ etọn he yin lẹblanunọ tọn go. Ahọlu lọ jlo dọ afanumẹ emitọn lẹ ni basi lẹnjo na emi. Afanumẹ de he dù ahọ́ daho talẹnti 10 000 [denali 60 000 000] tọn do e yin hinhẹnwa e dè. Afanumẹ lọ ma sọgan suahọ enẹ pọ́n gbede. Enẹwutu, ahọlu lọ degbe dọ afanumẹ lọ, asi etọn, po ovi etọn lẹ po ni yin sisà na ahọ́ lọ nido yin súsú. To whenẹnu, afanumẹ lọ jẹklo to afọ oklunọ etọn tọn lẹ kọ̀n, bo vẹvẹna ẹn dọmọ: “Fahomẹ pọ́n mi, yẹn nasọ suahọ lọ lẹpo we.”—Matiu 18:26.

Lẹblanu whàn ahọlu lọ bọ e jo ahọ́ daho he afanumẹ lọ dù do e na ẹn. Tlolo he ahọlu lọ ko wàmọ godo, afanumẹ enẹ tọ́nyi bo mọ afanumẹ hatọ etọn de he duahọ denali 100 tọn do e. E zunfán afanumẹ hatọ etọn lọ bo jẹ ovẹ́ finyọ́n na ẹn ji bo dọmọ:  “Suahọ he a dù lẹpo.” Ṣigba, afanumẹ hatọ enẹ jẹklo to afọ etọn lẹ kọ̀n, bo vẹvẹna ẹn dọmọ: “Fahomẹ pọ́n mi, yẹn nasọ suahọ lọ we.” (Matiu 18:28, 29) Ṣigba, afanumẹ he ahọlu jo ahọ́ etọn na ẹn lọ ma hodo apajlẹ oklunọ etọn tọn. E ze afanumẹ hatọ etọn he duahọ pẹvi tlala de do e dlan gànpamẹ kaka ewọ nado sọgan suahọ he e dù lẹpo.

Enẹgodo, Jesu dọ dọ to whenue afanumẹ devo lẹ mọ nuyiwa lẹblanu matindo tọn etọn, yé yì dogbè na klunọ yetọn. Po homẹgble po, e ylọ afanumẹ lọ bo dọmọ: “Hiẹ afanumẹ ylankan, yẹn jo ahọ́ enẹ lẹpo na we to whenuena hiẹ vẹvẹna mi. Be e ma jẹ dọ hiẹ lọsu ni do lẹblanu hia afanumẹ hatọ towe dile yẹn ko do lẹblanu hia we do ya?” Ahọlu lọ ze afanumẹ he ma do lẹblanu hia lọ jo na gàntọ-ṣọ́tọ lẹ, kaka e nado suahọ he e dù lẹpo. Jesu dotana dọmọ: “Mọkẹdẹ wẹ Otọ́ ṣie olọn tọn na yinuwa hẹ mì do eyin dopodopo mìtọn ma nọ jona mẹmẹsunnu etọn sọn ahun mẹ wá.”—Matiu 18:32-35.

Nuplọnmẹ nankọ die na mí gando jonamẹ go! Jiwheyẹwhe ko jo ahọ́ ylando tọn daho de na mí. Nuṣiwa mẹmẹsunnu Klistiani de tọn depope ma sọtẹ́n yijlẹdo jonamẹ enẹ go. Podọ e ma yin whladopo gee wẹ Jehovah ko jona mí gba, ṣigba whla fọtọ́n susu. Be e ma jẹ dọ mí ni nọ jona mẹmẹsunnu mítọn whlasusu, eyin owhẹ̀ mítọn tlẹ whẹ́n ya? Dile Jesu plọnmẹ to Yẹwhehodidọ Osó ji tọn mẹ do, Jiwheyẹwhe na “jo ahọ́ mítọn lẹ na mí, dile míwlẹ ko jona ahọ́tọnọ mítọn lẹ do ga.”—Matiu 6:12.