Sẹpọ vivọnu owhe 32 W.M. tọn wẹ, yèdọ nudi owhe atọ̀n to whenue Jesu yí baptẹm godo. Ewọ po devi etọn lẹ po ko yì Hùnwhẹ Gòhọtúntún tọn to Jelusalẹm to agọe. E taidi dọ yé gbẹ́ pò to yakẹ. (Luku 10:38; Johanu 11:1) Na nugbo tọn, Jesu yí osun ṣidopo he pò na ẹn to lizọnyizọn lọ mẹ zan to Jude kavi to lẹdo Tọ̀sisa Jọdani tọn mẹ to agbegbe Pelea tọn ji. Nuhudo yẹwhehodidọ tọn tin to lẹdo enẹlẹ mẹ ga.

Jẹnukọnna enẹ, to Juwayi owhe 30 W.M. tọn godo, Jesu yí osun delẹ zan nado dọyẹwheho to Jude bosọ zingbejizọnlin gbọn lẹdo Samalia tọn lẹ mẹ. Enẹgodo, to nudi ojlẹ Juwayi tọn whenu to owhe 31 W.M., Ju he to Jelusalẹm lẹ tẹnpọn nado hù i. Na owhe dopo daa he bọdego, Jesu plọnmẹ titengbe to agewaji Galili tọn mẹ. To ojlẹ enẹ mẹ, mẹsusu lẹzun hodotọ etọn lẹ. To Galili, Jesu plọnazọ́n apọsteli etọn lẹ bosọ do yé hlan po anademẹ ehe po dọmọ: “Mì nọ dọyẹwheho, dọmọ: ‘Ahọluduta olọn tọn ko dọnsẹpọ.’” (Matiu 10:5-7) Enẹgodo, e basi tito na nujijla kunnudide tọn de to Jude.

Nado bẹ nujijla ehe jẹeji, Jesu de devi 70 bo do yé hlan awe awe. Gbọnmọ dali, wẹnlatọ Ahọluduta lọ tọn awe awe donu 35 wẹ wazọ́n to aigba-denamẹ he ji “ojijẹ lọ sù, ṣigba azọ́nwatọ lẹ ma sù” te. (Luku 10:2) Yé na jẹnukọnna Jesu yì ofi voovo he ewọ sọgan wá gbọn lẹ. Devi 70 lọ lẹ na hẹnazọ̀ngbọna gbẹtọ lẹ bo nasọ hẹn owẹ̀n dopolọ he Jesu ko to lilá gbayipe.

Devi ehelẹ ma na ze ayidonugo do mẹpinplọn to sinagọgu lẹ mẹ ji. Jesu dọna yé nado yì owhé gbẹtọ lẹ tọn gbè. E na yé anademẹ dọmọ: “Fidepope he mì biọ owhé de gbè te, mì dọ jẹnukọn dọ: ‘Jijọho ni tin na owhé ehe.’ Podọ eyin họntọn jijọho tọn de tin to finẹ, jijọho mìtọn na tin to e ji.” Owẹ̀n tẹwẹ yé dona lá? Jesu dọmọ: “[Mì dọna] yé dọmọ: ‘Ahọluduta Jiwheyẹwhe tọn ko dọnsẹpọ mì.’”—Luku 10:5-9.

Anademẹ he Jesu na devi 70 lọ lẹ ma gbọnvona dehe e na apọsteli 12 lẹ to nudi owhe dopo die wayi. E na yé avase dọ e ma yin mẹlẹpo wẹ na kẹalọyi yé ganji. Ṣigba, vivẹnudido yetọn na gọalọna mẹhe tindo ojlo lẹ bọ to whenue Jesu na wá to ojlẹ vude godo, mẹsusu to yé mẹ na tin to jejeji nado mọ Oklunọ lọ bo plọnnu sọn e dè.

To ojlẹ vude godo, wẹnlatọ Ahọluduta lọ tọn awe awe donu 35 lọ lẹ lẹkọwa Jesu dè. Yé dọna ẹn po ayajẹ po dọmọ: “Oklunọ, aovi lẹ tlẹ litaina mí to whenue mí yí oyín towe zan.” Matin ayihaawe, linlin dagbe ehe hẹn homẹ Jesu tọn hùn, na e gblọn dọmọ: “Yẹn jẹ mimọ ji bọ Satani flẹ taidi abì sọn olọn. Mì pọ́n! yẹn ko na mì aṣẹ nado tùnafọ odàn lẹ po aklekle lẹ po ji.”—Luku 10:17-19.

 Gbọnmọ dali, Jesu na jide hodotọ etọn lẹ dọ yé na penugo nado duto awugblenamẹnu lẹ ji, yèdọ nado tùnafọ odàn lẹ po aklekle lẹ po ji to yẹhiadonu-liho. Humọ, yé sọgan deji dọ to sọgodo, Satani na flẹ sọn olọn mẹ. Podọ Jesu sọ gọalọna devi 70 lọ lẹ nado yọ́n nuhe na yin nujọnu hugan to nukọn mẹ. E dọmọ: “Mì jaya dọ gbigbọ lẹ litaina mì blo, ṣigba mì jaya na oyín mìtọn ko yin kinkandai to olọn mẹ wutu.”—Luku 10:20.

Homẹ Jesu tọn hùn taun bọ e na pipà Otọ́ etọn to gbangba dọ e yí devi whiwhẹnọ etọn lẹ zan to aliho huhlọnnọ mọnkọtọn mẹ. E lẹhlan devi etọn lẹ bo dọna yé dọmọ: “Ayajẹnọ wẹ nukun he mọ nuhe mì to mimọ ehelẹ. Na yẹn dọna mì dọ: Yẹwhegán po ahọlu susu po wẹ ko jlo nado mọ nuhe mìwlẹ to mimọ ṣigba bo ma mọ, podọ nado sè nuhe mìwlẹ to sisè ṣigba bo ma sè.”—Luku 10:23, 24.