To whenue Jesu to Jude, e kẹalọyi oylọ-basinamẹ Falesi de tọn nado wá dùnú hẹ ẹ. Vlavo okle wẹ e na ko yin, kakati nido yin núdùdù whèjai tọn. (Luku 11:37, 38; yijlẹdo Luku 14:12 go.) Whẹpo yé nado jẹ núdù ji, Falesi lẹ nọ klọ́ alọ yetọn lẹ kakajẹ awàgonu sọgbe hẹ aṣa yetọn. Ṣigba, Jesu ma wàmọ. (Matiu 15:1, 2) E ma gbà Osẹ́n Jiwheyẹwhe tọn nado klọ́ alọ jẹ obá enẹ mẹ, ṣigba enẹ ma yin nubiọtomẹsi Jiwheyẹwhe tọn de.

E paṣa Falesi lọ to whenue Jesu ma hodo aṣa enẹ. Jesu doayi e go bo dọmọ: “Todin, mì Falesi lẹ, mì nọ klọ́ gbonu kọfo po agbánvla po tọn wé, ṣigba to ohò mìtọn mẹ, mì gọ́ na nukunkẹn po kanyinylan po. Mì nulunọ lẹ! Ewọ he basi gbonu wẹ basi homẹ ga, kavi e ma yin mọ wẹ?”—Luku 11:39, 40.

E ma yin alọ ma klọ́ whẹpo do dùnú wẹ ylan gba, ṣigba yẹnuwiwa sinsẹ̀n tọn wẹ ylan. Falesi lẹ po mẹdevo lẹ he nọ hodo aṣa alọ kiklọ́ to aṣa-liho tọn lẹ po nọ gboawupo nado klọ́ kanyinylan sọn ahun yetọn lẹ mẹ. Enẹwutu, Jesu na yé ayinamẹ dọmọ: “Mì na nuhe tin to homẹ lẹ taidi nunina lẹblanu tọn, podọ pọ́n! nuhe pò to mì go lẹpo wẹ na lẹzun wiwe.” (Luku 11:41) Lehe ehe yin nugbo do sọ! Nunina lẹ bibasi dona wá sọn ahun mẹ, e ma yin po ojlo lọ nado hẹn awuji mẹdevo lẹ bo nọ dohia dọ mí yin dodonọ po gba.

E ma yindọ sunnu ehelẹ ma nọ na nunina wẹ gba. Jesu zinnudeji dọmọ: “Mì nọ na mado-ao mẹnti po nuwhẹ́nkun lue tọn po gọna omá devo lẹpo tọn, ṣigba mì nọ gbẹkọ whẹdida dodo po owanyi Jiwheyẹwhe tọn po go! Onú ehelẹ wiwà wẹ yin dandan, ṣigba nuhe pò lẹ ma dona yin kọgbẹ́ e go.” (Luku 11:42) Osẹ́n Jiwheyẹwhe tọn biọ mado-ao jinukun lẹ tọn nina. (Deutelonomi 14:22) Enẹ bẹ mẹnti po nuwhẹ́nkun lue tọn po hẹn, yèdọ omá kavi atinvu he nọ zọ́n bọ núdùdù nọ dewán lẹ. Falesi lẹ nọ yí sọwhiwhe do na mado-ao nuwhẹ́nkun ehelẹ tọn, ṣigba etẹwẹ dogbọn adà titengbe nubiọtomẹsi Osẹ́n Jiwheyẹwhe tọn lẹ dali, enẹ wẹ nado nọ yí whẹdida dodo zan bosọ nọ yin mẹdehọ́tọ to Jiwheyẹwhe nukọn?—Mika 6:8.

Jesu zindonukọn dọmọ: “Dindọn hlan mì Falesi lẹ, na mì nọ yiwanna aisintẹn nukọn tọn lẹ to sinagọgu lẹ mẹ podọ nado nọ yin nudọdo po sisi po to ahi lẹ mẹ! Dindọn hlan mì, na mì taidi yọdò enẹlẹ he ma nọ yin mimọ ganji, bọ gbẹtọ lẹ nọ zinzọnlin gbọn yé ji bo ma nọ yọ́n ẹn!” (Luku 11:43, 44) Na nugbo tọn, gbẹtọ lẹ sọgan jai jẹ yọdò mọnkọtọn lẹ mẹ bo lẹzun mawénọ. Jesu yí apajlẹ enẹ zan nado zinnudeji dọ mawé Falesi lẹ tọn ma nọ sọawuhia to gbangba.—Matiu 23:27.

Dawe de he yọ́n Osẹ́n Jiwheyẹwhe tọn ganji jẹ nuhlundọ ji dọmọ: “Mẹplọntọ, to onú ehelẹ didọ mẹ, hiẹ zun mílọsu lẹ ga.” Ṣigba, sunnu enẹlẹ dona yọnẹn dọ yé to awugbopo nado gọalọna gbẹtọ lẹ. Jesu dọmọ: “Dindọn hlan mìlọsu lẹ he yọ́n Osẹ́n lọ ganji, na mì nọ doagban pinpẹn na gbẹtọ lẹ nado hẹn, ṣigba mìlọsu lẹ ma nọ yí dopo to alọvi mìtọn lẹ mẹ do doalọ agbàn lọ lẹ go! Dindọn hlan mì, na mì nọ do yọdò yẹwhegán lẹ tọn, ṣigba tọgbo mìtọn lẹ wẹ hù yé!”—Luku 11:45-47.

Agbàn pinpẹn he hodọ Jesu te wẹ aṣa he gbẹtọ zedai lẹ po zẹẹmẹ he Falesi lẹ nọ basi do Osẹ́n lọ ji po. Sunnu enẹlẹ ma to onú lẹ hẹn bọawuna gbẹtọ lẹ. Kakatimọ, yé tẹkudeji dọ mẹlẹpo dona nọ hodo nuhe ko wá lẹzun agbàn pinpẹn lẹ. Tọgbo yetọn lẹ hù yẹwhegán lẹ, yèdọ bẹsọn Abẹli ji sọyi. Todin, yewlẹ he yinuwa taidi dọ yé to gbégbòna yẹwhegán lẹ gbọn yọdò lẹ didona yé dali, to walọ po nuyiwa tọgbo yetọn lẹ tọn po hodo. Yé tlẹ to jijlo vẹkuvẹku nado hù Yẹwhegán daho hugan Jiwheyẹwhe tọn. Jesu dọ dọ whẹndo ehe na wá dogbè na Jiwheyẹwhe. Podọ enẹ jọ to nudi owhe 38 godo, yèdọ to owhe 70 W.M.

Jesu zindonukọn dọmọ: “Dindọn hlan mì mẹhe  yọ́n Osẹ́n lọ ganji lẹ, na mìwlẹ ze họnhungan oyọnẹn tọn yì; mìlọsu lẹ ma biọ e mẹ, podọ mì nọ glọnalina mẹhe jlo na biọ e mẹ lẹ!” (Luku 11:52) Sunnu ehelẹ he dona plọnmẹ zẹẹmẹ Ohó Jiwheyẹwhe tọn to aliglọnna gbẹtọ lẹ nado yọ́n ẹn bosọ mọnukunnujẹemẹ.

Nawẹ Falesi lẹ po wekantọ lẹ po yinuwa gbọn? Dile Jesu to tintọ́n sọn yé dè, yé jẹ didesọ́ ẹ ji bo do magbọjẹ na ẹn po kanbiọ susu po. Yé ma to kanbiọ kanse nado plọnnu gba. Kakatimọ, yé jlo na sisẹ́ Jesu nado dọ nude he sọgan zọ́n bọ yé na wle e.