Mẹsusu wẹ ko yọ́n Jesu ganji sọn whenue gbọ́n e yí baptẹm. Ju fọtọ́n susu ko mọ azọ́njiawu etọn lẹ, podọ linlin gando azọ́n etọn lẹ go ko gbayipe gbọn otò lọ blebu mẹ. Todin he e tin to Hùnwhẹ Gòhọtúntún tọn tẹnmẹ to Jelusalẹm, mẹsusu wẹ sọ to dindin nado mọ ẹn.

Pọndohlan voovo wẹ gbẹtọ lẹ tindo gando Jesu go. Mẹdelẹ dọ dọ “Omẹ dagbe de wẹ.” Mẹdevo lẹ dọ dọ: “Lala, ṣigba gbẹtọgun lọ hẹn buali wẹ e te.” (Johanu 7:12) Mẹsusu wẹ to páde bo to ohó mọnkọtọn susu dọ gandego to azán tintan hùnwhẹ lọ tọn lẹ whenu. Ṣigba, mẹdepope ma gboadọ bo yiavùnlọna Jesu to gbangba, na yé to budi gando lehe nukọntọ Ju lẹ na yinuwa do go wutu.

To whenue hùnwhẹ lọ ko jẹ daglamẹ, Jesu wá tẹmpli mẹ. Nugopipe etọn nado plọnnumẹ jiawu na gbẹtọ susu. Ewọ ma yì wehọmẹ labi lẹ tọn pọ́n, enẹwutu e paṣa Ju lẹ bọ yé kanse dọmọ: “Nawẹ dawe ehe wagbọn do tindo oyọnẹn ehelẹ, to whenue ewọ ma yin pinplọn to wehọ sinsẹ̀n tọn lẹ mẹ?”—Johanu 7:15.

Jesu basi zẹẹmẹ dọmọ: “Nuhe yẹn to pinplọnmẹ ma yin ṣie gba, ṣigba ewọ he do mi hlan tọn wẹ. Eyin mẹdepope jlo nado wà ojlo Ewọ tọn, omẹ lọ na yọnẹn vlavo eyin nuplọnmẹ lọ wá sọn Jiwheyẹwhe dè kavi eyin ohó dee titi tọn dọ wẹ yẹn te.” (Johanu 7:16, 17) Na nuplọnmẹ Jesu tọn lẹ tin to kọndopọ mẹ hẹ Osẹ́n Jiwheyẹwhe tọn wutu, e dona ko họnwun dọ gigo Jiwheyẹwhe tọn dín wẹ e te, e ma yin edetiti tọn gba.

Enẹgodo, Jesu dọmọ: “Mose na mì Osẹ́n lọ, kavi e ma yin mọ wẹ? Ṣigba, depope to mì mẹ ma setonuna Osẹ́n lọ. Naegbọn mì to dindin nado hù mi?” Mẹdelẹ to gbẹtọgun lọ mẹ, vlavo jonọ he wá sọn gbonu tòdaho lọ tọn lẹ, ma ko sè dọ mẹdelẹ to ayiha kàn nado hù Jesu. To nukun yetọn mẹ, e taidi nuhe ma sọgbe hẹ lẹnpọn dagbe dọ mẹde ni jlo nado hù mẹplọntọ dagbe mọnkọtọn. Enẹwutu, yé wá tadona lọ kọ̀n dọ Jesu dọ mọ, na ewọ ma yọ́n nuhe dọ e te wutu. Yé dọmọ: “Hiẹ tindo aovi de. Mẹnu wẹ to dindin nado hù we?”—Johanu 7:19, 20.

Na nugbo tọn, to owhe dopo daa die, nukọntọ Ju lẹ tọn lẹ jlo na hù Jesu to whenue ewọ hẹnazọ̀ngbọna dawe de to Gbọjẹzangbe. Todin, Jesu yí aliho mẹhẹnlẹnnupọn tọn de zan nado de lẹnpọn dagbe matindo yetọn gbà. E dọ̀n ayidonugo yetọn wá nugbo titengbe de ji dọ sọgbe hẹ Osẹ́n lọ, visunnu he yin jiji de dona yin adàgbona to azán ṣinatọ̀ntọ gbè, etlẹ yin to Gbọjẹzangbe. Enẹgodo e kanse dọmọ: “Eyin yè nọ gboadà namẹ to Gbọjẹzangbe ṣogan bo ma nọ gbà Osẹ́n Mose tọn, naegbọn mìwlẹ do gblehomẹ do go e sinsinyẹn na yẹn hẹnmẹ jẹgangan mlẹnmlẹn to Gbọjẹzangbe wutu? Mì sọ pọ́n awusọhia gbonu tọn do dawhẹ ba blo, ṣigba mì nọ yí dodo do dawhẹ.”—Johanu 7:23, 24.

Tòmẹnu Jelusalẹm tọn he mọnukunnujẹ ninọmẹ lọ mẹ lẹ dọmọ: “Dawe he yé [ogán lẹ] to dindin nado hù lọ die, kavi e ma yin mọ wẹ? Ṣogan, mì pọ́n! ewọ to hodọ to gbangba bọ yé ma dọ nudepope na ẹn. E họnwun dọ ogán lẹ ma ko yọnẹn dọ ewọ wẹ Klisti lọ, kavi e ma yin mọ wẹ?” To whelọnu lo, naegbọn gbẹtọ lẹ ma yise dọ Jesu wẹ Klisti lọ? Yé dọmọ: “Míwlẹ yọ́n fihe dawe ehe wá sọn; ṣogan to whenue Klisti lọ na wá, mẹdepope ma na yọ́n fihe e wá sọn.”—Johanu 7:25-27.

Jesu gblọnna yé to finẹ to tẹmpli lọ mẹ dọmọ: “Mìwlẹ yọ́n mi bosọ yọ́n fie yẹn wá sọn. Humọ, yẹn ma wá to ojlo ṣie titi mẹ gba, ṣigba omẹ nujọnu tọn de wẹ ewọ he do mi hlan, podọ mìwlẹ ma yọ́n ewọ. Yẹn yọ́n ewọ, na yẹn yin afọzedaitọ de sọn ewọ dè wutu, podọ Ewọ wẹ do mi hlan.” (Johanu 7:28, 29) To whenue yé sè hogbe he họnwun enẹlẹ, yé tẹnpọn nado wle Jesu, vlavo nado ze e do gànpamẹ kavi nado hù i. Ṣigba, yé ma penugo nado wàmọ na ojlẹ lọ ma ko wá na Jesu nado kú wutu.

 Amọ́, mẹsusu tindo yise to Jesu mẹ, podọ e sọgbe dọ yé ni wàmọ. E ko zinzọnlin gbọn osin ji, doalọtena yujẹhọn lẹ, yí akla po whèvi vude po do na núdùdù gbẹtọ fọtọ́n susu to azọ́njiawu-liho, hẹn mẹhe to azọ̀njẹ lẹ jẹgangan, hẹn sẹkunọ lẹ zinzọnlin, hunnukun na nukuntọ́nnọ lẹ, gbọazọ̀nna pòtọnọ lẹ, podọ e tlẹ sọ fọ́n oṣiọ lẹ. Mọwẹ, owhẹ̀ yetọn whẹ́n nado kanse dọ: “To whenue Klisti lọ na wá, ewọ ma na basi ohia he sù hú dehe dawe ehe basi lẹ gba, kavi e na wàmọ wẹ?”—Johanu 7:31.

To whenue Falesi lẹ sè bọ gbẹtọgun lọ to onú ehelẹ dọ, yewlẹ po yẹwhenọgán lẹ po do ponọ lẹ hlan nado wle Jesu.