To azán godo tọn Hùnwhẹ Gòhọtúntún tọn lọ tọn, yèdọ azán ṣinawetọ gbè, Jesu to mẹplọn to adà tẹmpli lọ tọn he mẹ “adọkun potin lẹ tin te.” (Johanu 8:20; Luku 21:1) E taidi dọ Akanmaho Yọnnu lẹ tọn mẹ wẹ, fihe apotin he mẹ gbẹtọ lẹ nọ ze nunina yetọn do lẹ tin te.

To hùnwhẹ lọ whenu to zánmẹ, miyọ́ngbán he nọ na hinhọ́n vonọtaun lẹ nọ yin titá do adà tẹmpli lọ tọn ehe mẹ. Miyọ́ngbán-tin daho ẹnẹ wẹ to finẹ, podọ dopodopo yetọn tindo amìhẹnnu daho ẹnẹ he mẹ amì gọ́ lẹ. Hinhọ́n miyọ́ngbán enẹlẹ tọn sinyẹn sọmọ bọ yé nọ họ́n gbọn fihe lẹdo yé lẹ kaka yì fidindẹn. Nuhe Jesu na dọ todin lẹ na flinnu todoaitọ etọn lẹ gando hinhọ́n enẹ go: “Yẹn wẹ hinhọ́n aihọn tọn. Ewọ he nọ hodo mi ma na zinzọnlin to zinvlu mẹ gbede, ṣigba e na tindo hinhọ́n ogbẹ̀ tọn.”—Johanu 8:12.

Falesi lẹ jẹagọdo hogbe Jesu tọn enẹlẹ bo dọmọ: “Hiẹ to kunnude gando dewe go; kunnudide towe ma yin nugbo.” Jesu gblọn dọmọ: “Eyin yẹn tlẹ to kunnude gando dee go, nugbo wẹ kunnudide ṣie, na yẹn yọ́n fihe yẹn wá sọn podọ fihe yẹn jei. Ṣigba, mìwlẹ ma yọ́n fihe yẹn wá sọn podọ fihe yẹn jei.” E yidogọ dọmọ: “E ko yin kinkan to Osẹ́n mìtọn mẹ dọ, ‘Nugbo wẹ kunnudide omẹ awe tọn.’ Yẹn wẹ omẹ lọ he to kunnude gando dee go, Otọ́ he do mi hlan sọ to kunnude gando go e.”—Johanu 8:13-18.

Na Falesi lẹ ma kẹalọyi zẹẹmẹ etọn lẹ wutu, yé kanse e dọmọ: “Fie wẹ Otọ́ towe te?” Jesu gblọnna yé madoadúdẹji dọmọ: “Mìwlẹ ma yọ́n mi kavi Otọ́ ṣie. Eyin mì ko yọ́n mi wẹ, mì na ko yọ́n Otọ́ ṣie ga.” (Johanu 8:19) Dile etlẹ yindọ Falesi lẹ gbẹ́ jlo dọ Jesu ni yin wiwle, mẹdepope ma doalọ e go.

Jesu sọ vọ́ nuhe e ko dọ wayi de dọ, dọmọ: “Yẹn jei, mìwlẹ nasọ dín mi, ṣigba mì na kú do  ylando mìtọn mẹ. Fihe yẹn jei, mìwlẹ ma sọgan wá.” Ju lẹ mọnukunnujẹ hogbe Jesu tọn lẹ mẹ to aliho agọ̀ mẹ, bo jẹ kinkanse ji dọmọ: “Kavi e jlo na hù ede wẹ? Na e dọ dọ, ‘Fihe yẹn jei, mìwlẹ ma sọgan wá.’” Yé ma mọnukunnujẹ nuhe dọ Jesu te lẹ mẹ, na yé ma yọ́n fihe ewọ wá sọn wutu. E basi zẹẹmẹ dọmọ: “Odò wẹ mìwlẹ wá sọn; aga wẹ yẹn wá sọn. Aihọn ehe mẹ wẹ mìwlẹ wá sọn; yẹn ma wá sọn aihọn ehe mẹ gba.”—Johanu 8:21-23.

Jesu to hodọ gando gbẹninọ etọn to olọn mẹ whẹpo e do wá aigba ji po mẹhe ewọ yin po go, enẹ wẹ Mẹsia dopagbe lọ, kavi Klisti lọ, yèdọ mẹhe sinsẹ̀ngán enẹlẹ dona ko to nukundo. Etomọṣo, yé kanse e po wangbẹnamẹ po dọmọ: “Mẹnu wẹ hiẹ yin?”—Johanu 8:25.

Na yé gbẹ́ Jesu dai bosọ to nukundiọsọ ẹ wutu, e gblọn dọmọ: “Naegbọn yẹn tlẹ do to hodọna mì taun?” Ṣogan, e dọ̀n ayidonugo wá Otọ́ etọn ji bo do nuhewutu Ju lẹ dona dotoaina Visunnu lọ hia dọmọ: “Nugbonọ wẹ ewọ he do mi hlan, podọ nuhe yẹn sè sọn e dè lọ lẹ pẹpẹ wẹ yẹn to didọ to aihọn mẹ.”—Johanu 8:25, 26.

To enẹgodo, Jesu do jidide he e tindo to Otọ́ etọn mẹ hia, yèdọ jidide he Ju enẹlẹ ma tindo, bo dọmọ: “To whenue mì na ko ze Visunnu gbẹtọ tọn plá do núgo, whenẹnu wẹ mì na yọnẹn dọ yẹn wẹ omẹ lọ, podọ dọ yẹn ma nọ wà nudepope sọn ojlo ṣie mẹ; ṣigba yẹn to onú ehelẹ dọ kẹdẹdile Otọ́ lọ plọn mi do. Podọ ewọ he do mi hlan tin po yẹn po; e ma jo yẹn dopo do gba, na yẹn nọ wà nuhe nọ hẹn homẹhun in lẹ to whepoponu.”—Johanu 8:28, 29.

Ṣigba, Ju delẹ tindo yise to Jesu mẹ, podọ e dọna yé dọmọ: “Eyin mì gbọṣi ohó ṣie mẹ, be devi ṣie wẹ mì yin nugbonugbo, mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.”—Johanu 8:31, 32.

Nuhe e dọ gando yinyin hinhẹn jẹ mẹdekannu go paṣa mẹdelẹ. Yé jẹagọdo ehe bo dọmọ: “Kúnkan Ablaham tọn wẹ mí podọ mí ma ko yin afanumẹ na mẹde pọ́n gbede. Naegbọn hiẹ do dọ dọ, ‘Mì na jẹ mẹdekannu’?” Ju lẹ yọnẹn ganji dọ to whedelẹnu yé ko nọ aṣẹpipa otò devo lẹ tọn glọ, ṣogan yé gbẹ́ nado yin yiylọdọ afanumẹ. Ṣigba, Jesu dohia dọ yé gbẹsọ yin afanumẹ: “Nugbonugbo wẹ yẹn dọna mì dọ, Ylanwatọ lẹpo wẹ yin afanumẹ ylando tọn.”—Johanu 8:33, 34.

Owùnu daho de wẹ e yin na Ju lẹ nado jẹagọdo dọ yé yin afanumẹ. Jesu basi zẹẹmẹ dọmọ: “Afanumẹ ma nọ nọ̀ whégbè kakadoi; visunnu wẹ nọ nọ̀ kakadoi.” (Johanu 8:35) Afanumẹ de ma nọ tindo jlọjẹ depope nado dugu, podọ yè sọgan yàn ẹn to whedepopenu. Na taun tọn, visunnu he yin jiji kavi he yin sisọdodovi wẹ nọ nọ̀ whégbè “kakadoi,” enẹ wẹ dile ewọ na to ogbẹ̀ dẹnsọ.

Enẹwutu, nugbo gando Visunnu lọ go wẹ nugbo he nọ hẹn gbẹtọ lẹ jẹ mẹdekannu kakadoi sọn ylando he nọ hẹn okú wá si. Jesu dọmọ: “Eyin Visunnu lọ hẹn mì jẹ mẹdekannu, mì na jẹ mẹdekannu nugbonugbo.”—Johanu 8:36.