To pópló whèzẹtẹn-waji Osó Olivie tọn ji, yèdọ nudi kilomẹtlu atọ̀n do Jelusalẹm wẹ tòpẹvi de te he nọ yin Bẹtani. (Johanu 11:18) Jesu yì finẹ bo biọ owhé nọvi-nọvi awe delẹ, yèdọ Malta po Malia po tọn gbè. Họntọn Jesu tọn wẹ nọvi-nọvi ehelẹ po nọvisunnu yetọn Lazalọsi po yin, podọ yé dokuavọna ẹn po zohunhun po.

Gbégbò daho de wẹ e yin nado yí jonọ Mẹsia lọ tọn. Malta to jejeji nado yí jonọ Jesu tọn ganji, enẹwutu e jẹ awuwle ji nado dà núdùdù dojó lẹ. To whenue Malta to azọ́nwa, nọviyọnnu etọn Malia sinai do afọ Jesu tọn lẹ kọ̀n bo to todoaina ẹn. To ojlẹ vude godo, Malta dọna Jesu dọmọ: “Oklunọ, be hiẹ ma hòpọn dọ nọviyọnnu ṣie jo yẹn dopo do nado to nukunpedo onú lẹ go ya? Enẹwutu, dọna ẹn nado gọalọna mi.”—Luku 10:40.

Kakati nado mọhodọdo Malia go, Jesu na ayinamẹ Malta dọ e ko to ayidonugo zedo awuwiwlena onú agbasa tọn ji zẹjlẹgo bo dọmọ: “Malta, Malta, hiẹ yin magbọjẹnọ bo to tuklajẹ na onú susu. Nalete, onú vude wẹ nuhudo tin na, kavi onú dopo poun. Na Malia tọn, ewọ ko de adà he yọ́n hugan, podọ e ma na yin yíyí sọn e si.” (Luku 10:41, 42) Na nugbo tọn, Jesu zinnudeji dọ whenu susu yíyí do wleawuna núdùdù agbán susu ma yin dandan. Núdùdù kleun de poun ko pé.

Linlẹn dagbe wẹ Malta tindo, na ewọ jlo nado hẹjómẹ wutu. Ṣigba, magbọjẹ dido na ede nado wleawuna núdùdù zọ́n bọ anademẹ họakuẹ he Visunnu Jiwheyẹwhe tọn titi to nina lẹ to gbigbọ e go! Jesu dohia dọ Malia basi nudide dagbe lọ, ehe na hẹn ale tẹgbẹ tọn wá na ẹn, podọ mímẹpo dona nọ flin nuplọnmẹ ehe.

To nujijọ devo whenu, Jesu na nuplọnmẹ titengbe devo he sọ yin nujọnu ga. Devi de kanse e dọmọ: “Oklunọ, plọn mí lehe mí na nọ hodẹ̀ do, kẹdẹdile Johanu lọsu plọn devi etọn lẹ do.” (Luku 11:1) Jesu ko wàmọ to nudi owhe dopo daa die wayi to Yẹwhehodidọ Osó ji tọn etọn whenu. (Matiu 6:9-13) Ṣigba, devi ehe sọgan nọma tin to finẹ to whenẹnu, enẹwutu, Jesu vọ́ nuagokun lọ lẹ dọ. Enẹgodo, e na apajlẹ de nado zinnudeji dọ nujọnu wẹ e yin nado nọ sinyẹnlin to odẹ̀ mẹ.

“Mí ni dọ dọ mẹde to mì mẹ tindo họntọn de bo yì e dè to zánhomẹ bosọ dọna ẹn dọ, ‘Họntọn, yàn akla atọ̀n na mi, na họntọn ṣie de ṣẹṣẹ zingbejizọnlin wá dè e bọ yẹn ma tindo nudepope nado zedonukọnna ẹn.’ Ṣigba, ewọ gblọn sọn họmẹ dọ: ‘A sọ dotukla mi ba blo. Ohọ̀n ko yin súsú, bọ yọpọ ṣie lẹ ko to adọzan ji hẹ mi; yẹn ma sọgan fọ́n bo na we nudepope.’ Yẹn dọna mì dọ: Eyin ewọ ma na tlẹ fọ́n bo na ẹn nudepope na họntọn etọn wẹ e yin wutu, na nugbo tọn, na linsinsinyẹn majomajo etọn wutu, e na fọ́n bo na ẹn nuhe e tindo nuhudo etọn lẹ.”—Luku 11:5-8.

Jesu ma to didohia dọ Jehovah nọ desọn ojlo mẹ ma nado na gblọndo na obiọ mítọn lẹ, dile họntọn lọ wà do gba. Kakatimọ, e to didohia dọ eyin họntọn he ma tindo ojlo lọ yigbe nado na akla lọ na linsinsinyẹn mẹlọ tọn wutu, matin ayihaawe, Otọ́ owanyinọ olọn mẹ tọn mítọn na na gblọndo na obiọ ahundopo tọn devizọnwatọ nugbonọ etọn lẹ tọn! Jesu zindonukọn dọmọ: “Mì to bibiọ zọnmii, e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn na mì. Na mẹdepope he to bibiọ nọ mọyi, podọ mẹdepope he to dindin nọ mọ, podọ mẹdepope he to họ̀nhúhú, e na yin hùnhùn na ẹn.”—Luku 11:9, 10.

To enẹgodo, Jesu zinnudo nuagokun etọn ji gbọn nuyijlẹdonugo he gando otọ́ gbẹtọvi de tọn go yiyizan dali dọmọ: “Otọ́ tẹwẹ to mì mẹ bọ eyin visunnu etọn biọ whèvi, e na ze odàn na ẹn do whèvi tẹnmẹ? Kavi eyin e biọ azìn, bọ e na ze aklekle na ẹn? Enẹwutu, eyin mìwlẹ, he tlẹ yin mẹylankan, yọ́n lehe yè nọ na nunina dagbe ovi mìtọn lẹ do, nẹmunẹmu wẹ Otọ́ he to olọn mẹ ma nado na gbigbọ wiwe mẹhe to bibiọ ẹ lẹ!” (Luku 11:11-13) Jidenamẹ nankọ die nado yọnẹn dọ Otọ́ mítọn nọ tindo ojlo nado dotoaina mí bosọ nọ na mí nuhe mí tindo nuhudo etọn lẹ!