To whenue Jesu sẹpọ Bẹtani bo pé Malta podọ to enẹgodo Malia, yé zọnpọ yì yọdò Lazalọsi tọn kọ̀n. Oslò de wẹ bọ zannu de tin to onù etọn. Jesu dọmọ: “Mì de zannu lọ sẹ̀.” Malta jẹagọdo, na e ma yọ́n nuhe Jesu to linlẹn nado wà wutu. E dọmọ: “Oklunọ, e na ko to wánlùn todin, na azán ẹnẹtọ die.” Ṣigba, Jesu dọna ẹn dọmọ: “Be yẹn ma dọna we dọ eyin hiẹ yise, hiẹ na mọ gigo Jiwheyẹwhe tọn ya?”—Johanu 11:39, 40.

Enẹwutu, zannu lọ yin didesẹ. Jesu sọ ze nukun etọn lẹ daga bo hodẹ̀ dọmọ: “Otọ́, yẹn dopẹna we dọ hiẹ ko sè ṣie. Nugbo, yẹn yọnẹn dọ hiẹ nọ sè ṣie to whepoponu; ṣigba na gbẹtọgun he ṣite lẹdo pé lẹ tọn wutu wẹ yẹn do dọho, na yé nido sọgan yise dọ hiẹ wẹ do mi hlan.” Odẹ̀ he  Jesu hò to gbangba dohia mẹhe to finẹ lẹ dọ huhlọn he wá sọn Jiwheyẹwhe dè wẹ na hẹn ẹn penugo nado wà nuhe e jlo na wà. Enẹgodo, Jesu dawhá po ogbè lélé po dọmọ: “Lazalọsi, tọ́njẹgbonu wá!” Lazalọsi sọ tọ́njẹgbonu wá bọ alọ po afọ etọn lẹ po gọna nukunmẹ etọn gbẹ́ pò to biblá to avọ̀ he mẹ oṣiọ etọn yin biblá do lẹ mẹ. Jesu dọmọ: “Mì tún in bo gbọ e ni yì.”—Johanu 11:41-44.

Ju susu he wá nado miọnhomẹna Malia po Malta po mọ azọ́njiawu he Jesu wà bo tindo yise to ewọ mẹ. Ṣigba, mẹdevo lẹ wleali bo yì dọ nuhe Jesu ko wà lẹ na Falesi lẹ. Falesi lẹ po yẹwhenọgán lẹ po ylọ hagbẹ Whẹdatẹn Daho Ju lẹ tọn lẹ pli, yèdọ Sanhedlin. Yẹwhenọ daho Kaifa yin dopo to hagbẹ enẹlẹ mẹ. Delẹ to yé mẹ wule dọmọ: “Etẹwẹ mí na wà, na dawe ehe to ohia susu lẹ basi? Eyin mí jo e do domọ, yemẹpo na tindo yise to ewọ mẹ, Lomunu lẹ nasọ wá bo yí nọtẹn mítọn po akọta mítọn po.” (Johanu 11:47, 48) Mahopọnna dọ yé ko sè sọn onù kunnudetọ jọnun lẹ tọn mẹ dọ Jesu “to ohia susu lẹ basi,” dawe ehelẹ ma jaya gando nuhe Jiwheyẹwhe to wiwà gbọn ewọ gblamẹ go. Otẹn po aṣẹpipa yetọn po wẹ to ahunmẹduna yé hugan.

Winyan daho wẹ Sadusi lẹ dù to whenue Lazalọsi yin finfọnsọnku, na yé ma yise to fọnsọnku mẹ. Todin, Kaifa he yin Sadusi de yihó bo dọmọ: “Mì ma yọ́n nudepope, mì masọ yọnẹn dọ alenu de wẹ e yin na mì dọ dawe dopo ni kú do ota gbẹtọ lẹ tọn mẹ hú dọ akọta lọ blebu ni yin vivasudo.”—Johanu 11:49, 50; Owalọ lẹ 5:17; 23:8.

Na otẹn azọngban tọn wiwe he mẹ Kaifa te wutu, Jiwheyẹwhe wẹ hẹn ẹn nado dọ onú mọnkọtọn—e ma dọho “sọn ojlo edetiti tọn mẹ.” Nuhe dọ Kaifa te wẹ yindọ, Jesu dona yin hùhù, na e nikaa de yẹyi sọn aṣẹpipa po ogántẹn sinsẹ̀ngán Ju lẹ tọn po go dogọ. Etomọṣo, dọdai Kaifa tọn dohia dọ gbọn okú Jesu tọn dali, e na wleawuna ofligọ de, e ma yin na Ju lẹ kẹdẹ gba, ṣigba na “ovi Jiwheyẹwhe tọn he gbàpe” lẹpo.—Johanu 11:51, 52.

Kaifa penugo nado yinuwado hagbẹ Sanhedlin lọ tọn lẹ ji na yé nido dewé nado hù Jesu. Be Nikodẹmi he yin dopo to hagbẹ Sanhedlin lọ tọn lẹ mẹ bo jihọntọn hẹ Jesu wẹ dọhona ẹn gando sébibla lọ go ya? Depope he whẹho lọ yin, Jesu tọ́n sọn lẹdo Jelusalẹm tọn mẹ bo gbọnmọ dali dapana okú jẹnukọnna ojlẹ dide Jiwheyẹwhe tọn.