To whenue e ko hẹnazọ̀ngbọna dawe he to jijizọ̀n jẹ lọ godo, Jesu gbẹ́ pò to owhé Falesi lọ tọn gbè. Jesu doayi e go dọ jonọ he pò lẹ to otẹn yiaga lẹ dín na yede to núdùdù lọ whenu, podọ e yí dotẹnmẹ ehe zan nado plọnnumẹ gando whiwhẹ go.

Jesu dọmọ: “To whenue mẹde basi oylọna we wá hùnwhẹ alọwle tọn, a jagla do otẹn he yiaga hugan mẹ blo. Vlavo ewọ sọgan ko basi oylọna mẹhe yin nukundeji hugan we de, podọ mẹhe basi oylọna hiẹ po ewọ po na wá bo dọna we dọ, ‘Gbọ dawe ehe ni yí otẹn lọ.’ To whenẹnu, hiẹ na dedo otẹn he yìdo hugan lọ mẹ po winyan po.”—Luku 14:8, 9.

Enẹgodo, Jesu dọmọ: “To whenue hiẹ yin oylọ-basina, yì bo jagla do otẹn he yìdo hugan lọ mẹ, bọ whenue dawe he basi oylọna we lọ wá, e na dọna we dọ, ‘Họntọn, yì otẹn he yiaga mẹ.’ To whenẹnu, hiẹ na tindo gbégbò to jonọ hatọ towe lẹpo nukọn.” Whẹho ehe yiaga tlala hugan walọ dagbe didohia poun. Jesu basi zẹẹmẹ dọmọ: “Na mẹdepope he ze ede daga wẹ yè na whiwhẹ, podọ ewọ he whiwhẹ ede wẹ yè na zedaga.” (Luku 14:10, 11) Na nugbo tọn, e to tulina todoaitọ etọn lẹ nado wleawuna whiwhẹ.

Enẹgodo, Jesu dọhodo nuplọnmẹ devo ji na Falesi he basi oylọna ẹn lọ, enẹ wẹ lehe e na wleawuna jonọyiyi he sọgbe nugbonugbo to nukun Jiwheyẹwhe tọn mẹ de do. “To whenue hiẹ wleawuna núdùdù whèmẹ tọn kavi whèjai tọn de, a ylọ họntọn towe lẹ, nọvisunnu towe lẹ, hẹnnumẹ towe lẹ, kavi kọmẹnu towe adọkunnọ lẹ blo. Vlavo to gbèdopo, yelọsu sọgan basi oylọna we bọ e na lẹzun ahọsumẹ de na we. Ṣigba, to whenue hiẹ wleawuna hùnwhẹ de, basi oylọna wamọnọ lẹ, pòtẹnnọ lẹ, sẹkunọ lẹ, nukuntọ́nnọ lẹ, hiẹ nasọ yin ayajẹnọ, na yé ma tindo nudepope he yé na yí do suahọ we.”—Luku 14:12-14.

Jọwamọnu wẹ e yin nado basi oylọna họntọn lẹ, hẹnnumẹ lẹ, kavi kọmẹnu mítọn lẹ wá núdùdù de tẹnmẹ, podọ Jesu ma to didọ dọ nude ylan to enẹ mẹ. Ṣigba, e to nùzindeji dọ eyin yè wleawu núdùdù tọn na mẹhe tin to nuhudo mẹ lẹ, taidi wamọnọ lẹ, sẹkunọ lẹ, kavi nukuntọ́nnọ lẹ, enẹ sọgan hẹn dona daho wá. Jesu dọna mẹhe basi oylọna ẹn lọ dọmọ: “Yè na suahọ we to fọnsọnku dodonọ lẹ tọn whenu.” Jonọ hatọ devo kọngbedopọ dọmọ: “Ayajẹnọ wẹ ewọ he na dùnú to Ahọluduta Jiwheyẹwhe tọn mẹ.” (Luku 14:15) E mọdọ lẹblanulọkẹyi de wẹ enẹ na yin. Ṣigba, e ma yin mẹlẹpo wẹ wleawuna pinpẹn-nutọn-yinyọnẹn mọnkọtọn, dile Jesu zindonukọn nado dohia do dọmọ:

“Dawe de wleawuna núdùdù whèjai tọn daho de, bo basi oylọna mẹsusu. E sọ do afanumẹ etọn hlan . . . nado dọna mẹhe yin oylọ-basina lẹ dọ, ‘Mì wá, na onú lẹ ko sọgbe todin.’ Ṣigba, yemẹpo jẹ ogbè biọ ji to aliho dopolọ mẹ. Tintan dọna ẹn dọ, ‘Yẹn họ̀ ogle de bo dona yì pọ́n ẹn; yẹn vẹ̀ we, Nagbè mi.’ Podọ awetọ dọ, ‘Yẹn họ̀ zẹgẹ oyìn tọn atọ́n bọ yẹn jlo na yì tẹ́n yé pọ́n; yẹn vẹ̀ we, Nagbè mi.’ Mẹdevo sọ dọ, ‘Yẹn ṣẹṣẹ dà asi podọ na ehe wutu, yẹn ma sọgan wá.’”—Luku 14:16-20.

Whẹwhinwhẹ́n ehelẹ ma sọgbe! Whẹpo mẹde do nọ họ̀ ogle de kavi kanlin yìnyìn de, e nọ pọ́n ẹn ganji whẹ́, enẹwutu e ma yin whẹho niyaniya tọn de nado pọ́n yé to enẹgodo. Dawe atọ̀ntọ lọ ma to awuwlena alọwle. E ko wlealọ, enẹwutu nude ma dona glọnalina ẹn nado kẹalọyi oylọ-basinamẹ vonọtaun enẹ. To whenue oklunọ lọ sè whẹjijọ dindin ehelẹ, e yí homẹgble do dọna afanumẹ etọn dọmọ:

“Tọ́nyi po awuyiya po bo yì alihogbó lẹ po ali pẹvi tòdaho lọ tọn lẹ po ji, bosọ plan wamọnọ lẹ, pòtẹnnọ lẹ, nukuntọ́nnọ lẹ, po sẹkunọ lẹ po wáfi.” To whenue afanumẹ lọ wàmọ godo, tẹnmẹ susu gbẹ́ pò. Oklunọ lọ sọ dọna afanumẹ etọn dọmọ: “Tọ́nyi aliho lẹ ji podọ fie yè dopá lẹdo lẹ, bo vẹ̀ yé nado wá, na ohọ̀ ṣie nido sọgan gọ́. Na yẹn dọna mì dọ: Depope to mẹhe yin oylọ-basina enẹlẹ mẹ ma na dọ́ núdùdù whèjai tọn ṣie pọ́n.”—Luku 14:21-24.

 Apajlẹ he Jesu ṣẹṣẹ na lọ do lehe Jehovah Jiwheyẹwhe ko biọ to Jesu Klisti si nado basi oylọna gbẹtọ lẹ dopodopo nado wá tin to hukan ji na Ahọluduta olọn tọn do hia. Jẹnukọnna mẹlẹpo, sinsẹ̀ngán Ju lẹ wẹ yin omẹ tintan he yin oylọ-basina lẹ. Suhugan yetọn wẹ gbẹ́ oylọ-basinamẹ ehe dai to lizọnyizọn Jesu tọn whenu. Ṣigba, oylọ-basinamẹ lọ ma na nọte do yewlẹ kẹdẹ ji. Jesu to didohia hezeheze dọ to nukọn mẹ oylọ-basinamẹ awetọ na yin bibasi na agbátọnọ he tin to akọta Juvi lẹ tọn mẹ lẹ po mẹdiọzun Ju lẹ po. Enẹgodo, oylọ-basinamẹ atọ̀ntọ he yin godo tọn na yin bibasi na mẹhe Ju lẹ nọ pọnhlan taidi mẹhe ma yin alọkẹyi to nukun Jiwheyẹwhe tọn mẹ lẹ.—Owalọ lẹ 10:28-48.

Na nugbo tọn, nuhe dọ Jesu te sọgbe hẹ nuhe jonọ hatọ etọn dopo dọ, dọmọ: “Ayajẹnọ wẹ ewọ he na dùnú to Ahọluduta Jiwheyẹwhe tọn mẹ.”