WHLASUSU wẹ Jehovah ko yí ede jlẹdo lẹngbọhọtọ mọnkọtọn de go. To Ohó etọn mẹ, e na mí jide dọmọ: “Yẹnlọsu wẹ na dín lẹngbọ ṣie lẹ mọ bo nasọ penukundo yé go.”—Ezekiẹli 34:11, 12.

Mẹnu lẹ wẹ yin lẹngbọ Jehovah tọn? Do glido, lẹngbọ Jehovah tọn lẹ wẹ mẹhe yiwanna ẹn bo nọ sẹ̀n ẹn lẹ. Biblu dọmọ: “Mì gbọ mí ni basi sinsẹ̀n bo dẹ́ do odò; mì gbọ mí ni jẹklo to Jehovah, Mẹdatọ mítọn nukọn. Na ewọ wẹ Jiwheyẹwhe mítọn, podọ míwlẹ wẹ omẹ etọn lẹ, bọ ewọ nọ penukundo mí go di lẹngbọ lẹ to kanlindugbo de mẹ.” (Psalm 95:6, 7) Kẹdẹdile lẹngbọ paa lẹ nọ hodo lẹngbọhọtọ de do, sinsẹ̀n-basitọ Jehovah tọn lẹ nọ yí zohunhun do hodo Lẹngbọhọtọ yetọn. Be yé ma nọ ṣinuwa wẹ ya? Lala. To ojlẹ delẹ mẹ, devizọnwatọ Jiwheyẹwhe tọn lẹ ko lẹzun ‘lẹngbọ he vúnvún pé lẹ,’ ‘lẹngbọ he bu lẹ,’ podọ “taidi lẹngbọ he to dindanbu lẹ.” (Ezekiẹli 34:12; Matiu 15:24; 1 Pita 2:25) Etomọṣo, to whenue  mẹde danbú, Jehovah ma nọ gbẹ́ ẹ dai taidi dọ e ma sọgan lẹkọwa emi dè ba.

Be a gbẹ́ nọ pọ́n Jehovah hlan taidi Lẹngbọhọtọ towe ya? Nawẹ Jehovah nọ do ede hia taidi Lẹngbọhọtọ de to egbehe gbọn? Lẹnnupọndo aliho atọ̀n ehelẹ ji:

E nọ penukundo mí go to gbigbọ-liho. Jehovah dọmọ: “Fie kanlindugbo dagbedagbe tin te wẹ yẹn na nọ na núdùdù yé te, . . . Yé na nọ mlọnai to aigba he ji kanlindugbo sù te, podọ yé na nọ dù amà to fie kanlindugbo dagbe hugan lẹ te.” (Ezekiẹli 34:14) Jehovah ma gboawupo gbede nado nọ na mí núdùdù gbigbọmẹ tọn voovo lẹ to ojlẹ sisọ mẹ, ehe nọ hẹn mí lodo. Be a sọgan flin hosọ owe de tọn, hodidọ he yin nina de, kavi video de he mẹ a mọ gblọndo na odẹ̀ he a hò nado biọ alọgọ te ya? Be ehe ma hẹn we kudeji dọ Jehovah nọ penukundo gowe ya?

E nọ basi hihọ́na mí bo nọ gọalọna mí. Jehovah dopà dọmọ: “[Yẹn] na nọ gọ̀ dehe danbú lẹ wá apó lọ mẹ, yẹn na nọ blá apà na dehe gbleawu lẹ bo na nọ hẹn madogánnọ lẹ lodo.” (Ezekiẹli 34:16) Jehovah nọ na huhlọn madogánnọ kavi mẹhe jẹflumẹ na magbọjẹ wutu lẹ. E nọ blá apà na lẹngbọ etọn lẹ, bo nọ gọalọna yé nado gọ̀ jẹgangan eyin yé gbleawu, eyin etlẹ yindọ yisenọ hatọ lẹ wẹ wàmọ na yé. E sọ nọ hẹn mẹhe danbú lẹ lẹkọwa, gọna mẹhe to ahidi hẹ numọtolanmẹ agọ̀ lẹ.

E nọ mọdọ emi wẹ dona penukundo mí go. Jehovah dọmọ: “Yẹn na whlẹn yé sọn fie yè ko vúnvún yé pé gbọn lẹpo.” E yidogọ dọmọ: “Yẹn na nọ dín dehe bu lẹ mọ.” (Ezekiẹli 34:12, 16) To nukun Jehovah tọn mẹ, lẹngbọ he bu ma yin lẹngbọ he dọ̀n. E nọ yọnẹn to whenue lẹngbọ de danbú, bo nọ dín in, podọ e nọ jaya to whenue e mọ ẹn. (Matiu 18:12-14) Hú popolẹpo, e ylọ sinsẹ̀n-basitọ nugbo etọn lẹ dọ “lẹngbọ he go yẹn nọ penukundo lẹ.” (Ezekiẹli 34:31) Hiẹ lọsu yin dopo to lẹngbọ enẹlẹ mẹ.

Naegbọn Jehovah to dindin we bo to yiylọ we nado lẹkọwa emi dè? Na e jlo dọ a ni tindo ayajẹ wutu wẹ. E dopà dọ “dona lẹ na nọ ja di jikun” do lẹngbọ emitọn lẹ ji. (Ezekiẹli 34:26) Ehe ma yin opagbe ovọ́ de gba. Hiẹ lọsu yọ́n kunnudenu he do enẹ hia lẹ.

Flin numimọ he a tindo lẹ to whenue a wá yọ́n Jehovah. Di apajlẹ, numọtolanmẹ tẹwẹ a tindo to whenue a ṣẹṣẹ plọn nugbo ojlofọndotenamẹ tọn lẹ gando yinkọ Jiwheyẹwhe tọn po lẹndai etọn na gbẹtọvi lẹ po go? Be a flin lehe pọninọ hẹ Klistiani hatọ lẹ to plidopọ lẹ ji nọ yin awuvivinu do ya? Eyin a penugo bo lá wẹndagbe lọ na mẹhe do ojlo nujọnu tọn hia de, be a ma nọ tindo ayajẹ po pekọ nujọnu tọn po to whenue a lẹkọwa whégbè ya?

Hiẹ sọgan duvivi ayajẹ enẹlẹ tọn whladopo dogọ. Devizọnwatọ Jiwheyẹwhe tọn lẹ hodẹ̀ to hohowhenu dọmọ: “Jehovah E, hẹn mí gọwá dè we bọ míwlẹ nasọ lẹkọ do dè we sọn ojlo mẹ wá. Hẹn azán mítọn lẹ jẹ yọyọ taidi azán hohowhenu tọn lẹ.” (Avigbè Jelemia Tọn 5:21) Jehovah na gblọndo odẹ̀ enẹ tọn, bọ omẹ etọn lẹ lẹkọwa bo yí ayajẹ vonọtaun do sẹ̀n ẹn. (Nẹhemia 8:17) Jehovah na wàmọ na hiẹ lọsu.

Ṣigba, kọlilẹwa Jehovah dè bọawu nado dọ hú nado wà. Todin, gbadopọnna delẹ to avùnnukundiọsọmẹnu he kọlilẹwa nọ bẹhẹn lẹ mẹ po lehe a sọgan duto yé ji do po.