DEJI dọ Jehovah na kẹalọyi we to whenue a na lẹkọwa ewọ dè. E na gọalọna we nado pehẹ magbọjẹ lẹ po kọdetọn dagbe po, nado duto homẹgble lẹ ji, podọ nado duvivi jijọho ayiha mẹ po ahun mẹ po tọn he ayihadawhẹnamẹnu wiwe de tintindo nọ hẹnwa. Enẹgodo, e yọnbasi dọ hiẹ na yin whinwhàn nado sẹ̀n Jehovah whladopo dogọ to pọmẹ hẹ sinsẹ̀n-basitọ hatọ towe lẹ. Ninọmẹ towe na taidi Klistiani owhe kanweko tintan whenu tọn lẹ tọn, mẹhe go apọsteli Pita kanwe gando dọmọ: “Na mì ko taidi lẹngbọ he to dindanbu lẹ dai; ṣigba todin mì ko lẹkọ do lẹngbọhọtọ po nugopọntọ alindọn mìtọn lẹ tọn po dè.”—1 Pita 2:25.

Matin ayihaawe, onú dagbe hugan he a sọgan wà wẹ nado lẹkọwa Jehovah dè. Etẹwutu? Na gbọnmọ dali a na hẹn homẹ Jehovah tọn hùn. (Howhinwhẹn lẹ 27:11) Dile hiẹ lọsu yọnẹn do, Jehovah nọ tindo numọtolanmẹ, enẹwutu nuhe mí nọ wà lẹ nọ yinuwado ewọ ji. Etomọṣo, Jehovah ma nọ hẹn mí po huhlọn po nado yiwanna ẹn kavi sẹ̀n ẹn. (Deutelonomi 30:19, 20) Weyọnẹntọ he nọ basi zẹẹmẹ do Biblu ji de dọmọ: “Mẹde ma sọgan hùn ahun towe na we. Hiẹ lọsu wẹ dona hùn in.” Mí sọgan basi nudide nado hùn ahun mítọn gbọn Jehovah sinsẹ̀n po ahun he gọ́ na owanyi po dali. To whenue mí wàmọ, mí nọ na ẹn nunina họakuẹ de, enẹ wẹ mẹdezejo mlẹnmlẹn mítọn, podọ mí nọ hẹn ayajẹ daho wá na ẹn. Na nugbo tọn, nudepope ma sọgan yin yiyijlẹdo ayajẹ he Jehovah sinsẹ̀n to aliho he jẹ mẹ nọ hẹnwa go.—Owalọ lẹ 20:35; Osọhia 4:11.

Humọ, to whenue a vọ́ sinsẹ̀n-bibasi towe bẹjẹeji taidi Klistiani de, a na hẹn pekọ wá na nuhudo gbigbọmẹ tọn towe. (Matiu 5:3) To aliho tẹ mẹ? Gbẹtọ lẹ lẹdo aihọn pé nọ kanse dọ, ‘Naegbọn mí do tin to aigba ji?’ Yé tindo nuhudo nado mọ gblọndo na kanbiọ he gando lẹndai ogbẹ̀ tọn go lẹ. Gbẹtọvi lẹ tindo nuhudo enẹ, na Jehovah dá yé domọ wutu. E dá mí to aliho de mẹ bọ mí dona nọ sẹ̀n ẹn nado tindo ayajẹ. Ayajẹ de ma tin he klo hugan ayajẹ he mí nọ tindo to whenue mí yọnẹn dọ mí to Jehovah sẹ̀n, na mí yiwanna ẹn wutu.—Psalm 63:1-5.

Jaale, yọnẹn dọ Jehovah jlo dọ a ni lẹkọwa emi dè. Nawẹ a sọgan wagbọn do yọnẹn dọ ojlo etọn niyẹn nugbo? Lẹnnupọndo ehe ji: To odẹ̀ susu hihò godo wẹ alọnuwe ehe yin awuwlena po sọwhiwhe po. Enẹgodo mẹde yí i na we, vlavo mẹho agun tọn de kavi yisenọ hatọ de. Todin, a tindo ojlo nado hia ẹ bo yinuwa sọgbe hẹ nudọnamẹ he e bẹhẹn. Ehe lẹpo yin kunnudenu dọ Jehovah ma wọnji gowe. Kakatimọ, e to dindọn we dẹẹdẹ nado lẹkọwa ewọ dè.—Johanu 6:44.

To whenue mí yọnẹn dọ Jehovah ma nọ wọn devizọnwatọ etọn he danbú lẹ gbede, enẹ sọgan miọnhomẹna mí. Nugbo he mẹmẹyọnnu Donna wá yọ́n pinpẹn etọn niyẹn. E dọmọ: “Vudevude wẹ n’danbú sọn nugbo lọ mẹ, ṣigba sọn ojlẹ de mẹ jẹ devo mẹ, n’nọ to nulẹnpọn do Psalm 139:23, 24 ji, he dọmọ: ‘Dindona mi, Jiwheyẹwhe E, bo yọ́n ahun ṣie. Gbeje mi pọ́n bo yọ́n magbọjẹ ṣie lẹ. Pọ́n eyin aliho ylankan de ma to ohò ṣie mẹ, bosọ plan mi gbọn aliho madopodo lọ ji.’ N’yọnẹn dọ n’ma yin apadewhe aihọn tọn, n’ma tlẹ vò depope to whenue n’to dọ́n, podọ n’yọnẹn dọ titobasinanu Jehovah tọn mẹ wẹ n’dona nọ. N’jẹ ayidego ji dọ Jehovah ma jo mi do; nuhe pò na mi poun wẹ nado tẹnpọn bo lẹkọwa ewọ dè. Podọ homẹ ṣie hùn dọ n’wàmọ!”

Odẹ̀ ahundopo tọn mítọn wẹ yindọ hiẹ lọsu ni duvivi “ayajẹ Jehovah tọn” whladopo dogọ. (Nẹhemia 8:10) E ma na vẹna we gbede dọ a lẹkọwa Jehovah dè.