MẸLẸPO wẹ nọ pehẹ magbọjẹ, etlẹ yin omẹ Jiwheyẹwhe tọn lẹ lọsu. Psalm-kantọ lọ wlan dọmọ: “Magbọjẹ lẹ húagbọ́ mi.” (Psalm 94:19) Jesu sọ dọ dọ to azán godo tọn lẹ mẹ, “magbọjẹ gbẹ̀mẹ tọn lẹ” sọgan hẹn ẹn vẹawu taun na gbẹtọ lẹ nado sẹ̀n Jehovah. (Luku 21:34) Hiẹ lo? Be a nọ mọdọ nuhahun akuẹzinzan tọn, whẹndo tọn, kavi agbasalilo tọn lẹ nọ húagbọ́ we wẹ ya? Nawẹ Jehovah sọgan gọalọna we nado doakọnnanu gbọn?

Mí tindo nuhudo alọgọ tọn nado pehẹ magbọjẹ mítọn lẹ. Apọsteli Paulu wlan dọmọ: “Mí yin finfinyọ́n to aliho lẹpo mẹ, . . . mí jẹflumẹ . . . ; mí yin zinzindai.” Etomọṣo, e sọ dọ dọ mí “ma yin ginglọn mlẹnmlẹn ma nado sẹtẹn gba,” “e ma yindọ mí ma tindo ali họ̀ngán tọn depope wẹ gba;” podọ “mí ma yin huhusudo.” Etẹwẹ nọ gọalọna mí nado doakọnnanu? “Huhlọn he hú jọwamọ tọn” wẹ, yèdọ huhlọn he Jehovah, Jiwheyẹwhe Ganhunupotọ mítọn nọ na mí.—2 Kọlintinu lẹ 4:7-9.

Lẹnnupọndo lehe a mọ “huhlọn he hú jọwamọ tọn” enẹ yí to ojlẹ de mẹ wayi do ji. Be a flin lehe hodidọ tulinamẹ tọn de hẹn we nado tindo pinpẹn-nutọn-yinyọnẹn dogọ na owanyi nugbo Jehovah tọn do ya? Be yise he a tindo to opagbe Jehovah tọn lẹ mẹ nọ lodo dogọ to whenue a plọnnu mẹdevo lẹ gando todido Paladisi tọn go ya? To whenue mí yì opli Klistiani tọn lẹ bo dọhodo nuyise mítọn lẹ ji hẹ mẹdevo lẹ, mí nọ mọ huhlọn yí nado doakọnna magbọjẹ gbẹ̀mẹ tọn lẹ, bosọ nọ tindo jijọho ahun mẹ tọn he na gọalọna mí nado sẹ̀n Jehovah po ayajẹ po.

Na nugbo tọn, hiẹ sọgan nọ mọdọ onú susu wẹ yin bibiọ to emi si nado wà to ojlẹ dopolọ mẹ. Di apajlẹ, Jehovah biọ to mí si nado nọ dín Ahọluduta lọ whẹ́, podọ nado nọ tindo mahẹ to nuwiwa gbigbọmẹ tọn lẹ mẹ to gbesisọ mẹ. (Matiu 6:33; Luku 13:24) Ṣigba etẹwẹ lo, eyin nukundiọsọmẹ, azọ̀n, kavi nuhahun whẹndo tọn lẹ ko hẹn nuṣikọna we to agbasa-liho? Kavi etẹwẹ lo eyin agbasazọ́n towe nọ yí whenu po huhlọn he a dona ko yizan to agun lọ mẹ po? To whenuena e yindọ nususu wẹ a dona wà bo ma ka tindo whenu po huhlọn susu po nado wà onú enẹlẹ, a sọgan mọdọ yé húagbọ́ emi. A tlẹ sọgan nọ lẹndọ e taidi dọ nuhe Jehovah biọ sọn asi we lẹ sù gbau.

Jehovah nọ mọnukunnujẹ ninọmẹ mítọn lẹ mẹ. E ma nọ donukun nuhe hugan huhlọn mítọn sọn mí si gbede. Podọ, e yọnẹn dọ e nọ yí whenu to mí si nado gọ̀ jẹgangan to whenue mí jẹflumẹ to agbasa-liho podọ to numọtolanmẹ-liho.—Psalm 103:13, 14.

Di apajlẹ, lẹnnupọndo lehe Jehovah penukundo yẹwhegán Elija go do ji. To whenue Elija gbọjọ bo họnyi zungbo mẹ na obu wutu, be Jehovah gblewhẹdo yẹwhegán lọ bo degbena ẹn nado lẹkọ do azọ́ndenamẹ etọn kọ̀n wẹ ya? Lala. Whla awe wẹ Jehovah do angẹli de hlan nado fọ́n Elija dẹẹdẹ podọ nado na ẹn núdùdù. Etomọṣo, to azán 40 godo, Elija gbẹ́ to nuhà bo to budi. Nudevo tẹwẹ Jehovah  wà nado gọalọna ẹn? Tintan, Jehovah dohia ẹ dọ emi sọgan basi hihọ́na ẹn. Awetọ, Jehovah yí ‘ogbè fifá he yìdo de’ do dọhona Elija nado miọnhomẹna ẹn. Podọ atọ̀ntọ, Jehovah hẹn ẹn nado mọnukunnujẹemẹ dọ gbẹtọ fọtọ́n devo lẹ to Jiwheyẹwhe sẹ̀n po nugbonọ-yinyin po. To ojlẹ vude godo, Elija gọ̀ sinsẹ̀nzọn etọn bẹ whladopo dogọ taidi yẹwhegán zohunhunnọ de. (1 Ahọlu lẹ 19:1-19) Etẹwẹ mí plọn sọn ehe mẹ? To whenue magbọjẹ Elija tọn lẹ hẹn ẹn jẹflumẹ, Jehovah yí homẹfa po awuvẹmẹ po do yinuwa hẹ ẹ. Jehovah ma ko diọ. E nọ penukundo mí go to aliho dopolọ mẹ.

Nọ yin lẹnpọn dagbenọ to whenue a to nulẹnpọn do nuhe a sọgan na Jehovah ji. Ma nọ yí nuhe a sọgan wà to egbehe jlẹdo nuhe a ko nọ wà dai go blo. Di apajlẹ, wezundotọ he ko doalọtena wezundido na osun susu lẹ kavi owhe lẹ ma sọgan fọ́n to gbèdopo bo dowezun dile e ko nọ wà do dai. Kakatimọ to bẹjẹeji, e na nọ dowezun vudevude, ehe na zọ́n bọ huhlọn po akọndonanu etọn po na gọwá. Klistiani lẹ taidi wezundotọ lẹ. Yé nọ tindo yanwle tangan de to whenue yé to wezundo. (1 Kọlintinu lẹ 9:24-27) Be e ma na yọ́n dọ bẹsọn din, a ni doafọna yanwle gbigbọmẹ tọn de he kọ̀n a lẹndọ emi sọgan jẹ ya? Di apajlẹ, hiẹ sọgan ze yanwle dai nado nọ yì dopo to opli Klistiani tọn lẹ mẹ. Biọ to Jehovah si nado gọalọna we na a nido jẹ yanwle towe kọ̀n. Dile huhlọn towe to gigọwa to gbigbọ-liho, a na “dọ́pọ́n bo mọdọ Jehovah yọ́n.” (Psalm 34:8) Nọ flindọ nudepope he a wà nado do owanyi he a tindo na Jehovah hia, mahopọnna lehe e sọgan whè sọ, ewọ nọ yọ́n pinpẹn etọn taun.—Luku 21:1-4.

Nawẹ Jehovah na huhlọn June nado lẹkọwa ewọ dè gbọn? E dọmọ: “N’nọ to dẹ̀ho hlan Jehovah, bo nọ biọ to e si nado gọalọna mi. Enẹgodo, asi visunnu ṣie tọn dọhona mi gando plidopọ de go he na yin bibasi to tòpẹvi he mẹ n’nọ nọ̀. N’de nado yì dotoaina tito-to-whinnu azán dopo tọn plidopọ lọ tọn. Ayajẹ daho de wẹ e yin na mi nado lẹkọwa omẹ Jehovah tọn lẹ mẹ! N’mọ tudohomẹnamẹ he n’tindo hudo etọn yí to plidopọ enẹ ji. Todin, n’to Jehovah sẹ̀n po ayajẹ po whladopo dogọ. Podọ ogbẹ̀ tindo zẹẹmẹ nujọnu tọn na mi dogọ. Hugan gbede pọ́n, n’yọnẹn dọ n’tindo nuhudo mẹmẹsunnu po mẹmẹyọnnu ṣie lẹ po tọn, podọ n’dona nọ kẹalọyi alọgọ yetọn. N’dopẹ́ dọ whenu ma ko fẹ́ whẹpo n’do lẹkọwa.”