Ablaham po Sala po ko dà yede sọn owhe susu die. Yé ko jo owhé dagbe yetọn do to Uli bo nọ nọ̀ gòhọ de mẹ todin. Amọ́, Sala ma wule, na e dejido Jehovah go wutu.

Vijiji to jijlo Sala sọmọ bọ e dọna Ablaham dọmọ: ‘Eyin deviyọnnu ṣie Hagali ji ovi de, n’sọgan pọ́n ẹn hlan taidi ṣie titi.’ To nukọn mẹ, Hagali wá ji visunnu de. Yinkọ visunnu lọ tọn wẹ Iṣmaeli.

To owhe susu godo, whenue Ablaham tindo owhe 99 bọ Sala tindo owhe 89, jonọ atọ̀n delẹ wá dla yé pọ́n. Ablaham basi oylọna yé nado wá gbọjẹ to atin de sá, na e nido yí jonọ yetọn. Be a yọ́n mẹhe jonọ lọ lẹ yin ya? Angẹli lẹ wẹ! Yé dọna Ablaham dọmọ: ‘To owhe he ja mẹ to ojlẹ ehe mẹ, hiẹ po asi towe po na ji visunnu de.’ Sala to gòhọ mẹ bo to nuhe dọ yé te sè. E konu to ohò ede tọn mẹ bo dọmọ: ‘Be nugbonugbo yẹn sọgan jivi dile etlẹ yindọ yẹn ko poyọnho sọle ya?’

To owhe he bọdego mẹ, Sala ji visunnu de, kẹdẹdile angẹli Jehovah tọn ko dopagbe etọn do. Ablaham do yinkọ na visunnu lọ dọ Isaki, ehe zẹẹmẹdo “Nukiko.”

 To whenue Isaki tindo nudi owhe atọ́n, Sala mọ bọ Iṣmaeli to vivlẹ ẹ kò. Na e jlo na basi hihọ́na visunnu etọn wutu, e yì Ablaham dè bo biọ to e si nado yàn Hagali po Iṣmaeli po sọn whégbè. To tintan whenu, Ablaham ma jlo na wàmọ. Ṣigba, Jehovah dọna Ablaham dọmọ: ‘Dotoaina Sala. Yẹn na penukundo Iṣmaeli go. Amọ́, Isaki gblamẹ wẹ opagbe ṣie lẹ na mọ hẹndi gbọn.’