NUPINPLỌN 32
Nukọntọ Yọyọ de po Yọnnu Adọgbotọ Awe Po
To whenue Jọṣua ko deanana omẹ Jehovah tọn lẹ na owhe susu godo, e kú to whenue e tindo owhe 110. To ojlẹ he mẹ e nọgbẹ̀ te lẹpo, Islaelivi lẹ sẹ̀n Jehovah. Ṣigba, to okú Jọṣua tọn godo, yé wá jẹ boṣiọ lẹ sẹ̀n ji, taidi Kenaninu lẹ. Na Islaelivi lẹ ma zindonukọn nado nọ hodo Jehovah wutu, e dike bọ ahọlu Kenani tọn he nọ yin Jabini hẹn ogbẹ̀ vẹawuna yé. Yé sọ vẹ̀ Jehovah bo biọ alọgọ etọn. Enẹwutu, Jehovah na yé nukọntọ yọyọ de he nọ yin Balak. E na gọalọna yé nado lẹkọwa Jehovah dè.
Yẹwhegán-yọnnu de he nọ yin Debola domẹhlan nado yì ylọ Balak wá. E jlo na do owẹ̀n Jehovah tọn de na ẹn dọmọ: ‘Plan sunnu 10 000 hẹn, na mì ni yì pé awhànpa Jabini tọn to tọ̀sisa Kiṣọni tọn kọ̀n. To finẹ, a na gbawhàn Sisela tọn, yèdọ awhàngán awhànpa Jabini tọn.’ Balak dọna Debola dọmọ: ‘Eyin a hodo mi, n’na yì.’ Yọnnu lọ sọ dọmọ: ‘Yẹn na hodo we yì. Ṣigba, yọnẹn dọ e ma yin hiẹ wẹ na hù Sisela. Jehovah ko dọ dọ yọnnu de wẹ na hù i.’
Debola hodo Balak po awhànpa etọn po bọ yé hẹji yì Osó Taboli ji nado wleawufo na awhàn lọ. Tlolo he Sisela sè mọ, e bẹ osọ́-kẹkẹ awhàn tọn po awhànpa etọn lẹ po pli do agbàdo he to odò osó lọ tọn mẹ. Debola dọna Balak dọ: ‘Jehovah na na we awhàngbigba to azán egbehe tọn ji.’ Balak po sunnu 10 000 etọn lẹ po jẹte sọn osó lọ ji nado pé awhànpa huhlọnnọ Sisela tọn.
To whenẹnu, Jehovah hẹn tọ̀sisa Kiṣọni tọn gọfla. Osọ́-kẹkẹ awhàn tọn Sisela tọn lẹ sọ tlọ do ogbọ̀n mẹ. Sisela tọ́n sọn osọ́-kẹkẹ etọn mẹ bo doge-wezun mẹ. Balak po awhànfuntọ etọn lẹ po duto awhànpa Sisela tọn ji, ṣigba Sisela họnyi! E yì whlá ede do gòhọ yọnnu de he nọ yin Jaeli tọn mẹ. Yọnnu lọ sọ na ẹn anọ́sin bọ e nù, podọ e yí avọ̀ titli de ṣinyọ́n na ẹn. Awhànfuntọ he agbọ́ ko pé lọ jẹ amlọndọ ji. Enẹgodo, Jaeli zọ̀n dẹẹdẹ yì e dè bo whè opò tlọ́ntlọ́n gòhọ tọn de do tamẹ na ẹn, bọ e kú.
Balak dín Sisela kaka wá finẹ. Jaeli sọ tọ́n sọn gòhọ etọn mẹ bo dọmọ: ‘Biọ họmẹ. N’na do dawe he dín a te lọ hia we.’ Balak biọ họmẹ bo mọdọ Sisela ko kú do kọmẹ. Balak po Debola po sọ jihàn nado pà Jehovah, na e na awhàngbigba Islaelivi lẹ do kẹntọ yetọn lẹ ji wutu. To owhe 40 he bọdego lẹ mẹ, Islaeli tindo jijọho.
“Yọnnu he to wẹndagbe lọ lá lẹ yin awhànpa daho de.”—Salmu lẹ 68:11
