Jezebẹli tindo viyọnnu de he nọ yin Atalia, mẹhe ylanhùn taidi onọ̀ etọn. Atalia dà Ahọlu Juda tọn. Whenue asu etọn kú, visunnu etọn jẹ gandu ji. Ṣigba, to whenue visunnu etọn kú godo, Atalia hẹn ede zun ogán do Juda ji. Enẹgodo, e tẹnpọn nado và kúnkan ahọlu tọn pete sudo bo hù mẹdepope he gán wá yí ogántẹn sọn e si, yèdọ etlẹ yin ovivi etọn titi lẹ. Mẹlẹpo wẹ nọ dibuna ẹn.

Yẹwhenọ Daho Jehoiada po asi etọn Jehoṣeba po mọdọ nuhe wà Atalia te ylan taun. Enẹwutu, yé ze ogbẹ̀ yede tọn do owù mẹ nado whlá dopo to ovivi Atalia tọn lẹ mẹ, yèdọ Jehoaṣi he yin viyẹyẹ de to whenẹnu. Yé plọn ẹn whẹ́n to tẹmpli mẹ.

Whenue Jehoaṣi tindo owhe ṣinawe, Jehoiada bẹ ahọvi po Levinu lẹpo po pli bo dọna yé dọmọ: ‘Mì ṣọ́ ohọ̀n tẹmpli lọ tọn lẹ bo ma dike mẹde ni biọ e mẹ blo.’ To whenẹnu, Jehoiada yí Jehoaṣi do doahọlu do Juda ji bosọ ṣinyọ́n jẹgbakun de na ẹn. Omẹ Juda tọn lẹ sọ dawhá dọmọ: ‘Gbẹ̀gaa na ahọlu!’

Ahọsi Atalia sè awhágbe gbẹtọgun lọ tọn hlan bo họ̀nwezun yì tẹmpli mẹ. Whenue e mọ ahọlu yọyọ lọ, e dawhá dọmọ: “Sébibla! Sébibla wẹ!” Ahọvi lọ lẹ sọ wle ahọsi ylankan lọ bo dọ̀n ẹn tọ́n bosọ hù i. Ṣigba, etẹwẹ dogbọn nuyiwadomẹji ylankan he e ko tindo do akọta lọ ji dali?

Jehoiada gọalọna akọta lọ nado basi alẹnu de hẹ Jehovah, bo gbọnmọ dali dopà dọ Ewọ kẹdẹ wẹ yé na nọ sẹ̀n. Jehoiada sọ biọ dọ yé ni họ́ tẹmpli Baali tọn liai bo gbà boṣiọ etọn lẹ hányán. E de yẹwhenọ  lẹ po Levinu lẹ po nado wazọ́n to tẹmpli mẹ, na gbẹtọ lọ lẹ nido sọgan basi sinsẹ̀n to finẹ whladopo dogọ. E de họ̀njinọtọ lẹ nado họ́ tẹmpli lọ, na mẹdepope he yin mawé nikaa biọ e mẹ. Enẹgodo, Jehoiada po ahọvi lọ lẹ po plan Jehoaṣi yì họ̀nmẹ bo ze e do ofìn ji. Omẹ Juda tọn lẹ sọ jaya. Yé gán sẹ̀n Jehovah todin he yé ko wá vò sọn nuyiwadomẹji nawe kanylantọ lọ Atalia tọn mẹ podọ sọn sinsẹ̀n-bibasi Baali tọn mẹ. Be a mọ lehe adọgbigbo Jehoiada tọn gọalọna mẹsusu do ya?