5 To whenuena e mọ gbẹtọgun lẹ, e hẹji yì osó lọ ji; podọ to whenue e ko sinai godo, devi etọn lẹ wá e dè. 2 Enẹgodo, e kẹ̀ onù etọn bo jẹ nuplọn yé ji, dọmọ:

3 “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ, a na yetọn wẹ Ahọluduta olọn tọn.

4 “Ayajẹnọ wẹ mẹhe to aluẹmẹ lẹ, na yé na yin homẹmiọnna.

5 “Ayajẹnọ wẹ homẹmimiọnnọ lẹ, na yé na dugu aigba tọn.

6 “Ayajẹnọ wẹ mẹhe huvẹ po nugbla dodowiwa tọn po to hùhù lẹ, na yé na yin pekọhẹnwana. b

7 “Ayajẹnọ wẹ lẹblanunọ lẹ, na lẹblanu na yin didohia yé.

8 “Ayajẹnọ wẹ mẹhe wé-ṣeke to ahun mẹ lẹ, na yé na mọ Jiwheyẹwhe.

9 “Ayajẹnọ wẹ jijọho-dintọ lẹ, na yé na yin yiylọdọ visunnu Jiwheyẹwhe tọn lẹ.

10 “Ayajẹnọ wẹ mẹhe ko yin homẹkẹndo na dodowiwa wutu lẹ, na yetọn wẹ Ahọluduta olọn tọn.

11 “Ayajẹnọ wẹ mìwlẹ to whenuena gbẹtọ lẹ vlẹ mì kò bo dohomẹkẹn mì bosọ gbọn lalo dali dọ nuylankan wunmẹwunmẹ lẹ do mì go, na yẹn tọn wutu. 12 Mì nọ jaya bosọ nọ gọ́ na ayajẹ, na daho wẹ ale mìtọn to olọn mẹ, na mọ wẹ yé ko dohomẹkẹn yẹwhegán he jẹnukọnna mì lẹ do.

13 “Mìwlẹ wẹ ojẹ̀ aigba tọn, ṣigba eyin ojẹ̀ hẹn huhlọn etọn bu, nawẹ otọ́n etọn na yin hinhẹngọwa gbọn? E masọ yọ́n-na-yizan na nudepope ba, adavo nado yin zizedlan gbonu na gbẹtọ lẹ nido tùnafọ e ji.

14 “Mìwlẹ wẹ hinhọ́n aihọn tọn. Tòdaho he yin didoai do osó ji de ma sọgan yin whiwhla. 15 Gbẹtọ lẹ ma nọ tá miyọ́ngbán bo nọ ze e do ohà c glọ gba, ṣigba do miyọ́ngbán-tin ji, bọ e nọ na hinhọ́n mẹhe tin to owhé lọ gbè lẹpo. 16 Mọdopolọ, mì dike hinhọ́n mìtọn ni họnwun to gbẹtọ lẹ nukọn, na yé nido sọgan mọ azọ́n dagbe mìtọn lẹ bo na gigo Otọ́ mìtọn he tin to olọn mẹ.

17 “Mì lẹndọ yẹn wá nado và Osẹ́n lọ kavi Yẹwhegán lẹ sudo blo. Yẹn wá, e ma yin nado vasudo, ṣigba nado hẹndi. 18 Nugbo wẹ yẹn dọna mì dọ, e na bọawu dọ olọn po aigba po ni juwayi hú dọ wekun pẹvi pete kavi adà tiuntiun wekun tọn dopo ni juwayi sọn Osẹ́n lọ mẹ kaka nuhe tin to e mẹ lẹpo nido yin hinhẹndi. 19 Enẹwutu, mẹdepope he nọ tùnafọ dopo to gbedide he whè hugan ehelẹ mẹ ji bo nọ plọn mẹdevo lẹ nado wàmọ na yin yiylọdọ mẹhe whè hugan to d Ahọluduta olọn tọn mẹ. Ṣigba, mẹdepope he nọ yìn yé bo nọ plọn yé omẹ na yin yiylọdọ mẹhe klo to e Ahọluduta olọn tọn mẹ. 20 Na yẹn dọna mì dọ, eyin dodowiwa mìtọn ma sù hú wekantọ lẹ po Falesi lẹ po tọn, mìwlẹ ma na biọ Ahọluduta olọn tọn mẹ to aliho depope mẹ.

  21 “Mì ko sè bọ e yin didọna omẹ hohowhenu tọn lẹ dọ: ‘Hiẹ ma dona hùhlọ̀n, ṣigba mẹdepope he hùhlọ̀n  na dogbè to whẹdatẹn.’ 22 Ṣigba, yẹn dọna mì dọ mẹdepope he zindonukọn to homẹgble mẹ sọta mẹmẹsunnu etọn na dogbè to whẹdatẹn; podọ mẹdepope he nọ yí hogbe vlẹko tọn he ma yọ́n dọtọ́n f zan na mẹmẹsunnu etọn na dogbè to Whẹdatẹn Daho Hugan; to whenuena mẹdepope he dọ, ‘Hiẹ nulunọ nuvọ́nọ!’ na jẹna Gẹhẹnna g miyọ́n tọn.

23 “To whelọnu lo, eyin hiẹ hẹn nunina towe ja agbà lọ kọ̀n bo flin to finẹ dọ mẹmẹsunnu towe tindo nude sọta we, 24 jo nunina towe do finẹ to agbà lọ nukọn, bo tọ́nyi. Yì dín jijọho hẹ mẹmẹsunnu towe whẹ́, podọ to enẹgodo, lẹkọwa bo wá na nunina towe.

25 “Yawu gbọwhẹ hẹ mẹhe pé-whẹ̀ hẹ we to whenue hiẹ tin to aliji hẹ ẹ jei owhẹ̀ nukọn, na eyin e ma yinmọ, mẹhe pé-whẹ̀ hẹ we lọ sọgan ze we do alọmẹ na whẹdatọ, bọ whẹdatọ na ze we do alọmẹ na devizọnwatọ whẹdatẹn tọn, bọ hiẹ nasọ yin zizedlan gànpamẹ. 26 Nugbo wẹ yẹn dọna we dọ, hiẹ ma na tọ́n sọn finẹ to aliho depope mẹ kaka hiẹ nado sú abọgan-kuẹ pẹvi towe godo tọn.

27 “Mì ko sè bọ e yin didọ dọ: ‘Hiẹ ma dona deayọ.’ 28 Ṣigba, yẹn dọna mì dọ mẹdepope he zindonukọn nado to yọnnu de pọ́n kaka bo tindo ojlo zogbe de na ẹn ko deayọ hẹ ẹ dote to ahun etọn mẹ. 29 Todin, eyin nukun towe adusiwhé tọn to hinhẹn we dahli, sún in sẹ̀ bo ze e dlan sọn dewe go. Na e pọnte na we nado hẹn dopo to awutugonu towe lẹ mẹ bu hú dọ agbasa towe blebu ni yin dindọn dlan Gẹhẹnna h mẹ. 30 Mọdopolọ, eyin adusilọ towe to hinhẹn we dahli, sán ẹn sẹ̀ bo ze e dlan sọn dewe go. Na e pọnte na we nado hẹn dopo to awutugonu towe lẹ mẹ bu hú dọ agbasa towe blebu ni yì Gẹhẹnna i mẹ.

31 “Humọ, e ko yin didọ dọ: ‘Mẹdepope he gbẹ́ asi etọn dai, gbọ e ni na ẹn owe gbẹdai tọn de.’ 32 Ṣigba, yẹn dọna mì dọ mẹdepope he gbẹ́ asi etọn dai, bọ e ma yin na whẹho fẹnnuwiwa zanhẹmẹ tọn j wutu, hẹn ẹn tin to owù ayọdide tọn mẹ, podọ mẹdepope he wlealọ hẹ yọnnu he yin gbigbẹdai, e deayọ.

33 “Mọdopolọ, mì ko sè bọ e yin didọna omẹ hohowhenu tọn lẹ dọ: ‘Hiẹ ma dona whlé bo nọma hẹndi, ṣigba hiẹ dona de opà towe lẹ hlan Jehovah.’ 34 Amọ́, yẹn dọna mì dọ: Mì whlé paali blo, vlavo gbọn olọn dali, na e yin ofìn Jiwheyẹwhe tọn wutu; 35 kavi gbọn aigba dali, na e yin tokloafọligbe afọ etọn lẹ tọn wutu; kavi gbọn Jelusalẹm dali, na e yin tòdaho Ahọlu daho lọ tọn wutu. 36 A sọ yí ota towe do whlé blo, to whenuena e yindọ hiẹ ma sọgan diọ oda dopo zun wewe kavi yuu. 37 Mì kúkú gbọ hogbe mìtọn ‘Mọwẹ’ ni yin mọwẹ, podọ ‘Lala’ mìtọn ni yin lala, na nuhe hú ehelẹ, mẹylankan lọ dè wẹ yé wá sọn.

38 “Mì ko sè bọ e yin didọ dọ: ‘Nukun na nukun podọ adú na adú.’ 39 Ṣigba, yẹn dọna mì dọ: Mì diọavunnukunsọ  mẹhe yin mẹylankan blo, ṣigba eyin mẹdepope hò alaka adusiwhé tọn na we, lẹ́ amiyọnwhé tọn na ẹn ga. 40 Podọ eyin mẹde jlo na hẹn we yì owhẹ̀ nukọn nado yí awù odò tọn towe, jo awugbó towe lọsu na ẹn ga; 41 podọ eyin mẹde he tin to otẹn aṣẹpipa tọn mẹ yí huhlọn do hẹn we nado wadevizọn na kilomẹtlu dopo, basi kilomẹtlu awe hẹ ẹ. 42 Nanú mẹhe to nubiọ we, podọ a dogodo mẹhe jlo na yàn k sọn dè we blo.

43 “Mì ko sè bọ e yin didọ dọ: ‘Hiẹ dona yiwanna kọmẹnu towe bo gbẹwanna kẹntọ towe.’ 44 Ṣigba, yẹn dọna mì dọ: Mì zindonukọn nado nọ yiwanna kẹntọ mìtọn lẹ bo nọ hodẹ̀ na mẹhe to homẹkẹndo mì lẹ, 45 na mì nido do mìde hia taidi visunnu Otọ́ mìtọn he tin to olọn mẹ lọ tọn lẹ, na e nọ hẹn owhè etọn zẹ̀ do mẹylankan lẹ po mẹdagbe lẹ po ji bosọ nọ hẹn jikun ja do dodonọ lẹ po mawadodonọ lẹ po ji. 46 Na eyin mì nọ yiwanna mẹhe yiwanna mì lẹ, ale tẹwẹ mì tindo? Be tòkuẹ-ṣinyantọ lẹ ma nọ wà nudopolọ ga? 47 Podọ eyin mì nọ dọnudo mẹmẹsunnu mìtọn lẹ kẹdẹ, onú vonọtaun tẹwẹ mì to wiwà? Be omẹ akọta lẹ tọn lọsu ma nọ wà nudopolọ ga? 48 Enẹwutu, mì dona yin pipé, l kẹdẹdile Otọ́ mìtọn olọn tọn yin pipé do.

6 “Mì payi dọ mì do dodowiwa mìtọn hia to gbẹtọ lẹ nukọn na yé nido doayi mì go blo; eyin e ma yinmọ, mì ma na tindo ale de sọn Otọ́ mìtọn he tin to olọn mẹ dè. 2 Enẹwutu, to whenue hiẹ to nunina lẹblanu tọn lẹ basi, a a kún opẹ̀n to nukọn towe blo, dile yẹnuwatọ lẹ nọ wà do to sinagọgu lẹ mẹ podọ to tòhomẹ-liho lẹ ji, na yé nido sọgan yin gigopana gbọn gbẹtọ lẹ dali. Nugbo wẹ yẹn dọna mì dọ, yé ko mọ ale yetọn yí to gigọ́ mẹ. 3 Ṣigba, hiẹ, to whenue hiẹ to nunina lẹblanu tọn lẹ na, a dike amiyọnlọ towe yọ́n nuhe adusilọ towe to wiwà blo, 4 na nunina lẹblanu tọn towe lẹ nido sọgan yin to nuglọ. Whenẹnu, Otọ́ towe he nọ mọnú to nuglọ na suahọ etọn we.

5 “Mọdopolọ, to whenue mì to dẹ̀ho, mì yinuwa di yẹnuwatọ lẹ blo, na yé yiwanna nado nọ ṣite do hodẹ̀ to sinagọgu lẹ mẹ podọ to aliklan alihogbó lẹ tọn ji nado yin mimọ gbọn gbẹtọ lẹ dali. Nugbo wẹ yẹn dọna mì dọ, yé ko mọ ale yetọn yí to gigọ́ mẹ. 6 Ṣigba, whenue hiẹ to dẹ̀ho, biọ abò towe mẹ podọ, to whenuena hiẹ ko sú ohọ̀n towe godo, hodẹ̀ hlan Otọ́ towe he tin to fiwhiwhlá. Whenẹnu, Otọ́ towe he nọ mọnú to nuglọ na suahọ etọn we. 7 Eyin mì to dẹ̀ho, mì dọ dọvọdọ nudopolọ lẹ tọn dile omẹ akọta lẹ tọn nọ wà do blo, na yé nọ lẹndọ ohó susu didọ wẹ na zọ́n bọ odẹ̀ yetọn na yin sisè. 8 Enẹwutu, mì basi di yewlẹ blo, na Otọ́ mìtọn yọ́n nuhe mì tindo nuhudo etọn lẹ, yèdọ whẹpo mì tlẹ do biọ sọn e dè.

9 “Enẹwutu, lehe mìwlẹ dona nọ hodẹ̀ do die:

“‘Otọ́ mítọn he tin to olọn mẹ, na oyín towe ni yin kinklandowiwe. b 10 Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji. 11 Na núdùdù mítọn egbehe tọn mí to egbé; 12 podọ jo ahọ́ mítọn lẹ na mí, dile míwlẹ ko jona ahọ́tọnọ mítọn lẹ do ga. 13 A sọ hẹn mí biọ whlepọn mẹ blo, ṣigba whlẹn mí sọn mẹylankan lọ si.’

14 “Na eyin mì jo sẹ́nmẹjijẹ gbẹtọ lẹ tọn na yé, Otọ́ mìtọn olọn tọn na jona mì ga; 15 Ṣigba eyin mì ma jo sẹ́nmẹjijẹ gbẹtọ lẹ tọn na yé, mọdopolọ Otọ́  mìtọn olọn tọn ma na jo sẹ́nmẹjijẹ mìtọn lẹ na mì.

16 “To whenue mì to nùbla, mì sọ hẹn nukunmẹ kúṣiọ di yẹnuwatọ lẹ ba blo, na yé nọ diọ awusọhia nukunmẹ yetọn tọn c na gbẹtọ lẹ nido sọgan mọdọ yé to nùbla. Nugbo wẹ yẹn dọna mì dọ, yé ko mọ ale yetọn yí to gigọ́ mẹ. 17 Ṣigba hiẹ, to whenuena hiẹ to nùbla, sá amisisa do ota towe bo fún nukunmẹ towe, 18 na hiẹ nikaa sọawuhia di mẹhe to nùbla to gbẹtọ lẹ nukọn, adavo to Otọ́ towe he tin to fiwhiwhlá lọ kẹdẹ nukọn. Whenẹnu, Otọ́ towe he nọ mọnú to nuglọ na suahọ etọn we.

19 “Mì sọ bẹ adọkunnu lẹ pli na mìde do aigba ji ba blo, fie okọ́ nọ dùnú bọ nulẹ nọ jẹkò te, podọ fie ajotọ lẹ nọ gbò adó bo nọ fìnnú te. 20 Kakatimọ, mì bẹ adọkunnu lẹ pli na mìde do olọn mẹ, fie okọ́ ma nọ dùnú bọ nulẹ ma nọ jẹkò te, podọ fie ajotọ lẹ ma nọ gbò adó bo nọ fìnnú te. 21 Na fie adọkunnu towe te, finẹ wẹ ahun towe na te ga.

22 “Nukun wẹ miyọ́ngbán agbasa tọn. Enẹwutu, eyin nukun towe tin to fidopo, d agbasa towe pete na gọ́ na hinhọ́n 23 Ṣigba, eyin nukun towe gọ́ na nukunkẹn, e agbasa towe pete na gọ́ na zinvlu. Nugbonugbo, eyin hinhọ́n he tin to hiẹ mẹ yin zinvlu, lehe zinvlu enẹ yin daho sọ!

24 “Mẹdepope ma sọgan yin afanumẹ na ogán awe; adavo ewọ na gbẹwanna ode bo yiwanna awetọ, kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.

25 “Na ehe wutu, yẹn dọna mì dọ: Mì sọ yin magbọjẹnọ na ogbẹ̀ mìtọn gando nuhe mì na dù kavi nuhe mì na nù go kavi na agbasa mìtọn gando nuhe mì na do go ba blo. Be ogbẹ̀ ma yin nujọnu hú núdùdù podọ agbasa hú avọ̀? 26 Mì pọ́n ohẹ̀ agahomẹ tọn lẹ tlintlin; yé ma nọ do jinukun kavi gbẹ̀n kavi bẹpli do agbànhọ lẹ mẹ, ṣogan Otọ́ mìtọn olọn tọn nọ na núdùdù yé. Be mìwlẹ ma họakuẹ hú yé? 27 Mẹnu to mì mẹ wẹ sọgan gbọn magbọjẹnọ-yinyin dali yí awagbà dopo dogọ tedidi gbẹzan etọn tọn? 28 Humọ, naegbọn mì do yin magbọjẹnọ na nuhe dù avọ̀dido? Mì plọnnu sọn vounvoun danji tọn lẹ dè, lehe yé nọ whẹ́n do; yé ma nọ do magbọjẹ na yede, mọjanwẹ yé ma nọ gbẹ̀n sekan; 29 Ṣigba yẹn dọna mì dọ Sọlomọni lọsu to gigo etọn lẹpo mẹ ma tlẹ yin aṣọ́dona di dopo to ehelẹ mẹ. 30 Todin, eyin Jiwheyẹwhe nọ doaṣọ́na ogbé danji tọn lẹ he tin tofi to egbé bosọ nọ yin zizedlan adò mẹ to osọ he ja domọ, be ewọ ma na doaṣọ́na mì humọ, mì yise pẹvinọ? 31 Enẹwutu, mì yin magbọjẹnọ gbede blo, dọ, ‘Etẹ mí na dù?’ kavi, ‘Etẹ mí na nù?’ kavi, ‘Etẹ mí na do?’ 32 Na ehe lẹpo wẹ nuhe akọta lẹ nọ to afọdona vẹkuvẹku. Otọ́ mìtọn olọn tọn yọnẹn dọ mì tindo nuhudo onú ehe lẹpo tọn.

33 “Enẹwutu, mì zindonukọn nado to Ahọluduta lọ po dodowiwa etọn po dín whẹ́, podọ nudevo ehe lẹpo na yin yiyidogọ na mì. 34 Enẹwutu, mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.

7 “Mì sọ dawhẹnamẹ ba blo, na mì nikaa yin whẹdana; 2 na whẹdida he nkọ mì yí do to whẹdanamẹ wẹ yè na yí do dawhẹna mì, podọ nujlẹnu he mì to yíyí do jlẹ namẹ wẹ yé na yí do jlẹ na mì. 3 To whelọnu lo, naegbọn hiẹ do to núyọ he tin to nukun mẹmẹsunnu towe tọn ji pọ́n, ṣigba bo ma doayi atinpo he tin to nukun towe titi ji go? 4 Kavi nawẹ hiẹ sọgan dọna mẹmẹsunnu  towe do dọ, ‘Dike ma de núyọ sẹ̀ sọn nukun towe ji,’ to whenuena, pọ́n! atinpo de tin to nukun towe titi ji? 5 Yẹnuwatọ! De atinpo sẹ̀ sọn nukun towe titi ji whẹ́, podọ to enẹgodo hiẹ na mọnú gblegede nado de núyọ sẹ̀ sọn nukun mẹmẹsunnu towe tọn ji.

6 “Mì ze nuhe yin wiwe na avún lẹ blo, kavi yìn peali mìtọn lẹ donukọnna ohàn lẹ blo, na yé nikaa tùnafọ yé ji bosọ lẹgodo bo tlẹ́n mì.

7 “Mì to bibiọ zọnmii, e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn na mì; 8 na mẹdepope he to bibiọ nọ mọyi, podọ mẹdepope he to dindin nọ mọ, podọ mẹdepope he to họ̀nhúhú, e na yin hùnhùn na ẹn. 9 Na nugbo tọn, mẹnu to mì mẹ wẹ visunnu etọn na biọ ẹ akla bọ ewọ na ze zannu na ẹn? 10 Kavi, eyin e biọ ẹ whèvi, ewọ ma na ze odàn na ẹn, kavi e na wàmọ wẹ? 11 Enẹwutu, eyin mìwlẹ, he tlẹ yin mẹylankan, yọ́n lehe yè nọ na nunina dagbe ovi mìtọn lẹ do, nẹmunẹmu wẹ Otọ́ mìtọn he tin to olọn mẹ ma nado na nudagbe mẹhe to bibiọ ẹ lẹ!

12 “Enẹwutu, nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do. Ehe, na taun tọn, wẹ nuhe Osẹ́n lọ po Yẹwhegán lẹ po zẹẹmẹdo.

13 “Mì gbọn họntonu bibó lọ nù biọ e mẹ, na gbigblo wẹ họntonu lọ podọ gblagada wẹ aliho lọ he nọ planmẹ yì vasudo, mẹsusu wẹ sọ to gbingbọn e nù biọ e mẹ; 14 to whenuena e yindọ bibó wẹ họntonu lọ podọ jinján wẹ aliho lọ he nọ planmẹ yì ogbẹ̀ mẹ, omẹ vude wẹ sọ to dindin in mọ.

15 “Mì họ́ mìde gando yẹwhegán lalo lẹ go he nọ wá mì dè to avọ̀ lẹngbọ tọn mẹ, ṣigba ohla nuwledutọ lẹ wẹ yé to homẹ. 16 Gbọn sinsẹ́n yetọn lẹ dali wẹ mì na yọ́n yé. Gbẹtọ lẹ ma nọ gbẹ̀n ovẹn sinsẹ́n to tẹwùn lẹ ji, kavi ovò sinsẹ́n to vẹwùn lẹ ji gbede gba, kavi e ma yin mọ wẹ? 17 Mọdopolọ, atin dagbe lẹpo nọ de sinsẹ́n dagbe tọ́n, ṣigba atin ylankan lẹpo nọ de sinsẹ́n gbigble tọ́n. 18 Atin dagbe de ma sọgan sẹ́n sinsẹ́n gbigble, mọjanwẹ atin ylankan de ma sọgan de sinsẹ́n dagbe tọ́n do niyẹn. 19 Atin depope he ma nọ de sinsẹ́n dagbe tọ́n nọ yin sinsánliai bo nọ yin zizedlan miyọ́n mẹ. 20 To whelọnu lo, na nugbo tọn, gbọn sinsẹ́n yetọn lẹ dali wẹ mì na yọ́n omẹ enẹlẹ.

21 “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ Ahọluduta olọn tọn mẹ gba, adavo ewọ he to ojlo Otọ́ ṣie he tin to olọn mẹ tọn wà kẹdẹ. 22 Mẹsusu wẹ na dọna mi to azán enẹ gbè dọ: ‘Oklunọ, Oklunọ, be míwlẹ ma ko dọ dọdai to oyín towe mẹ bo ko yàn aovi lẹ jẹgbonu to oyín towe mẹ bo ko sọ wà azọ́n huhlọnnọ susu lẹ to oyín towe mẹ ya?’ 23 Whenẹnu wẹ yẹn na dọna yé dọ: ‘Yẹn ma yọ́n mì gbede! Mì tọ́n sọn dè e, mì mẹhe nọ wazọ́n sẹ́nhẹngba tọn lẹ!’

24 “Enẹwutu, mẹdepope he sè ohó he yẹn to didọ ehelẹ bo basi yé, na taidi dawe nuyọnẹntọ de, he gbá ohọ̀ etọn do osé ji. 25 Podọ jikun sinsinyẹn ja bọ osin gọ́ bọ jẹhọn sọ yìn bo hò jẹ ohọ̀ lọ go, ṣigba e ma họ́jai, na e ko yin dido do osé ji wutu. 26 To alọ devo mẹ, mẹdepope he to ohó he yẹn to didọ ehelẹ sè bo ma basi yé, na taidi dawe nulunọ de, he gbá ohọ̀ etọn do tọkẹ́n ji. 27 Podọ jikun sinsinyẹn ja bọ osin gọ́ bọ jẹhọn sọ yìn bo hò jẹ ohọ̀ lọ go, podọ e họ́jai, daho sọ wẹ hihọliai etọn.”

28 To whenue Jesu dotana ohó ehelẹ, kọdetọn lọ wẹ yindọ awuji gbẹtọgun lẹ, na aliho mẹpinplọn tọn etọn wutu, 29 na e to nuplọn yé taidi mẹhe tindo aṣẹ, e ma yin taidi wekantọ yetọn lẹ gba.