ADÀ 9
Jelemia Ma Jo Ohó Jehovah Tọn Didọ Do
Naegbọn yé do gblehomẹ do Jelemia go?
Jehovah gọalọ bọ Jelemia yin whinwhlẹngán
To whedelẹnu, eyin mí to ohó Jehovah tọn dọna gbẹtọ lẹ, yé nọ kò mí kavi nọ gblehomẹ do mí go. Ehe sọgan zọ́n bọ mí ma na jlo nado dọ ohó Jehovah tọn ba. Be enẹ ko jọ do gowe pọ́n ya?— Biblu dọhona mí gando jọja sunnu de go. Ewọ yiwanna Jehovah, amọ́ to ojlẹ de mẹ, e lẹn nado jo ohó Jehovah tọn didọ do. Yinkọ etọn nọ yin Jelemia. Gbọ mí ni dọhodo ewọ ji.
To whenue Jelemia to jọja mẹ, Jehovah dọna ẹn dọ ewọ dona gbẹnuna mẹhe to nuylankan wà lẹ. Mọwiwà vẹawuna Jelemia taun, podọ obu sọ di i. E dọna Jehovah dọmọ: ‘Yẹn ma yọ́n nuhe n’na dọ. Yọpọvu de poun wẹ n’yin.’ Amọ́, Jehovah dọna ẹn dọmọ: ‘Ma dibu blo. Yẹn na gọalọna we.’
Enẹwutu, Jelemia jẹ didọna gbẹtọ lẹ ji dọ Jehovah na sayana yé eyin yé ma diọ walọ yetọn. Be a lẹndọ gbẹtọ lọ lẹ wà nuhe Jelemia dọna yé ya?— Lala. Mẹdelẹ kò e, podọ mẹdevo lẹ gblehomẹ do e go sinsinyẹn. Mẹdelẹ tlẹ jlo na hù i! Numọtolanmẹ tẹwẹ a lẹndọ Jelemia na ko tindo?— Obu di i bọ e dọmọ: ‘Yẹn ma nasọ dọ ohó Jehovah tọn ba.’ Amọ́, be e jo ohó Jehovah tọn didọ do nugbo wẹ ya?— Lala, e ma wàmọ. E yiwanna Jehovah sọmọ bọ e ma sọgan doalọtena ohó etọn didọ. Podọ, na Jelemia ma jo ohó Jehovah tọn didọ do wutu, Jehovah gọalọ bọ ewọ yin whinwhlẹngán.
Di apajlẹ to gbèdopo, sunnu ylankan delẹ ze Jelemia dlan do odò he siso bo gọ́ na ogbọ̀n de mẹ. Núdùdù kavi sin-nùnù depope ma to finẹ. Sunnu enẹlẹ jlo dọ Jelemia ni nọ finẹ bo kú. Amọ́ po alọgọ Jehovah tọn po, ewọ gán!
Etẹwẹ a sọgan plọn sọn apajlẹ Jelemia tọn mẹ?— Dile etlẹ yindọ ewọ dibu to whedelẹnu, e ma jo ohó Jehovah tọn didọ do. Eyin a to ohó Jehovah tọn dọ, mẹdelẹ sọgan kò we kavi gblehomẹ do gowe. Winyan sọgan hù we kavi obu tlẹ sọgan di we. Amọ́, ma jo ohó Jehovah tọn didọ do gbede blo. Ewọ na gọalọna we to whepoponu, dile e gọalọna Jelemia do.
