ADÀ 3
Lahabi Tindo Yise to Jehovah Mẹ
Mí ni dọ dọ mí tin to tòdaho Jẹliko tọn mẹ. Tòdaho ehe tin to aigba Kenani tọn ji, podọ mẹhe nọ nọ̀ finẹ lẹ ma tindo yise to Jehovah mẹ. Yọnnu de nọ nọ̀ finẹ bo nọ yin Lahabi.
To whenue Lahabi to jọja mẹ, yè pìntàn na ẹn gando lehe Mose má Ohù Vẹẹ do awe bo plan Islaelivi lẹ tọ́n sọn Egipti do go. E sọ sè lehe Jehovah gọalọna Islaelivi lẹ nado gbawhàn kẹntọ yetọn lẹ tọn do. Todin, e sè dọ Islaelivi lẹ ko sẹpọ Jẹliko!
Lahabi whlá amẹ́ lọ lẹ na ewọ tindo yise to Jehovah mẹ wutu
To whèjai dopo, Islaelivi awe yì Jẹliko nado yì fìn tòdaho lọ pọ́n. Mẹhe nọ yì fìn fide pọ́n lẹ nọ yin yiylọdọ amẹ́. Yé wá Lahabi dè. Ewọ plan yé biọ owhé etọn gbè bo dọna yé dọ yé ni nọ finẹ. Amọ́ to zánmẹ, ahọlu Jẹliko tọn sè dọ amẹ́ lẹ wá tòdaho lọ mẹ bo biọ owhé Lahabi tọn gbè. Enẹwutu, ahọlu lọ do sunnu delẹ hlan nado yì wle yé. Lahabi whlá amẹ́ awe lọ lẹ do họta owhé etọn tọn ji, bo dọna sunnu he ahọlu dohlan lẹ dọmọ: ‘Amẹ́ lọ lẹ wá dè e, amọ́ yé ko yì sọn tòdaho lọ mẹ. Eyin mì yawu yì din, mì sọgan wle yé!’ Be a yọ́n nuhewutu Lahabi whlá amẹ́ lọ lẹ ya?— Na ewọ tindo yise to Jehovah mẹ bo yọnẹn dọ Ewọ na yí aigba Kenani tọn na Islaelivi lẹ.
Whẹpo amẹ́ lọ lẹ na yì sọn owhé Lahabi tọn gbè, yé dopà na ẹn dọ ewọ po hẹnnumẹ etọn lẹ po ma na kú to whenue Jẹliko na yin vivasudo. Be a yọ́n nuhe yé dọna ẹn dọ ni wà ya?— Yé dọna ẹn dọmọ: ‘Yí okàn vẹẹ ehe bo sìn in do fleṣe towe go. Eyin hiẹ wàmọ, mẹdepope he na tin to owhé towe gbè ma na kú.’ Lahabi wà nuhe amẹ́ lọ lẹ dọna ẹn pẹpẹ. Be a yọ́n nuhe wá jọ bọdego ya?—
Jehovah whlẹn Lahabi po hẹnnumẹ etọn lẹ po gán
To azán vude godo, Islaelivi lẹ nabọẹ whii bo deawhànfọ lẹdo tòdaho lọ. Yé deawhànfọ lẹdo tòdaho lọ whladopo to gbèdopo na azán ṣidopo. Amọ́ to azán ṣinawetọ gbè, yé deawhànfọ lẹdo tòdaho lọ whla ṣinawe. Enẹgodo, yemẹpo dawhá gángán. Jehovah hẹn adó he lẹdo tòdaho lọ lẹpo họ́. Amọ́, owhé he yè sìn okàn vẹẹ do fleṣe etọn go lọ ma họ́! Be a mọ owhé lọ to yẹdide lọ mẹ ya?— Lahabi po hẹnnumẹ etọn lẹ po yin whinwhlẹngán!
Etẹwẹ a sọgan plọn sọn apajlẹ Lahabi tọn mẹ?— Lahabi tindo yise to Jehovah mẹ na onú jiawu he e sè dọ Jehovah wà lẹ wutu. Hiẹ lọsu to nuplọn gando onú jiawu susu he Jehovah wà lẹ go. Be hiẹ lọsu tindo yise to Jehovah mẹ dile Lahabi wà do ya?— N’deji dọ mọ wẹ e yin na we!
