ADÀ 2
Lebeka Jlo Na Hẹn Homẹ Jehovah Tọn Hùn
Lebeka yin yọnnu de he yiwanna Jehovah. Asu etọn nọ yin Isaki. Ewọ lọsu yiwanna Jehovah. Nawẹ Lebeka lẹzun asi Isaki tọn gbọn? Nawẹ e dohia dọ emi jlo na hẹn homẹ Jehovah tọn hùn gbọn? Gbọ mí ni dọhodo asu etọn Isaki ji whẹ́.
Ablaham po Sala po wẹ ji Isaki. Otò Kenani tọn mẹ wẹ yé nọ nọ̀, podọ gbẹtọ lẹ ma nọ sẹ̀n Jehovah to finẹ. Amọ́, Ablaham jlo dọ visunnu emitọn ni dà yọnnu de he nọ sẹ̀n Jehovah. Enẹwutu, e do devizọnwatọ etọn hlan nado yì dín asi de na Isaki to Halani, fie hẹnnumẹ Ablaham tọn delẹ nọ nọ̀, podọ e yọnbasi dọ Eliezẹli wẹ e na ko dohlan.
Lebeka wazọ́n sinsinyẹn nado dàsin na kanklosọ́ lọ lẹ
Eliezẹli zingbejizọnlin lọ po devizọnwatọ Ablaham tọn devo lẹ po. Gbejizọnlin lọ dẹn taun. Yé hẹn kanklosọ́ ao he ji yé doagban núdùdù po nunina lẹ po tọn do. Nawẹ Eliezẹli na wagbọn do yọ́n yọnnu he e na de na Isaki? Whenue Eliezẹli po devizọnwatọ he pò lẹ po jẹ Halani, yé nọte to dotọ̀ de tó, na Eliezẹli yọnẹn dọ ojlẹ he mẹ yọnnu lẹ nọ wá dàsin te ko to sisẹpọ. E hodẹ̀ hlan Jehovah dọmọ: ‘Eyin n’dọna awhli de dọ ni na mi osin bọ e na mi bosọ na kanklosọ́ ṣie lẹ, yẹn na yọnẹn dọ yọnnu he a de lọ niyẹn.’
Enẹgodo, awhli de he nọ yin Lebeka wá dotọ̀ lọ tó. Biblu dọ dọ e yọnwhanpẹ taun. Eliezẹli biọ ẹ sìn-nùnù bọ e yigbe dọmọ: ‘N’na na we osin lọ bo nasọ yì dà na kanklosọ́ towe lẹ ga.’ Azọ́n daho wẹ ehe yin! Na eyin sinnugbla hù kanklosọ́ lẹ, osin he yé nọ nù nọ sù taun. Enẹwutu, Lebeka dona basi yigọyigọ susu nado dàsin na yé. Be a mọ lehe e to azọ́n sinsinyẹn wà do to yẹdide lọ mẹ ya?— Lehe Jehovah na gblọndo na odẹ̀ Eliezẹli tọn do hẹn homẹ etọn hùn taun.
Eliezẹli na nususu Lebeka. Lebeka dọna Eliezẹli po devizọnwatọ he pò lẹ po dọ yé ni hodo emi yì owhé otọ́ emitọn tọn gbè. Eliezẹli dọ nuhewutu Ablaham do dó e hlan po lehe Jehovah na gblọndo na odẹ̀ etọn do po na whẹndo Lebeka tọn. Homẹ yetọn hùn taun bọ yé yigbe dọ Lebeka ni dà Isaki.
Lebeka hodo Eliezẹli yì Kenani bo lẹzun asi Isaki tọn
Amọ́, be a lẹndọ Lebeka jlo na dà Isaki ya?— Lebeka yọnẹn dọ Jehovah wẹ deanana Eliezẹli wá finẹ. Enẹ wẹ zọ́n bọ to whenue whẹndo etọn kanbiọ ẹ eyin e jlo na yì Kenani bo lẹzun asi Isaki tọn, ewọ yigbe dọ: ‘Mọwẹ, yẹn na yì.’ To afọdopolọji, ewọ yì po Eliezẹli po. To whenue yé jẹ Kenani, e lẹzun asi Isaki tọn.
Na Lebeka wà nuhe Jehovah jlo dọ ewọ ni wà wutu, Jehovah dona ẹn. To owhe susu lẹ godo, Jesu wá yin jiji sọn kúnkan etọn mẹ! Eyin a nọ wanu taidi Lebeka bo nọ hẹn homẹ Jehovah tọn hùn, ewọ na dona hiẹ lọsu ga.
