1. Etẹwẹ yin delẹ to sinsẹ̀n he nọ yin bibasi to Aflika lẹ mẹ?

 DIBLAYIN mẹlẹpo to Aflika wẹ nọ yigbe dọ e yin nujọnu nado sẹ̀n Jiwheyẹwhe. Ṣigba gbekọndopọ vude wẹ tin gando lehe e na yin sinsẹ̀n do go. Mẹdelẹ nọ basi sinsẹ̀n to maṣalaṣi, bọ mẹdevo lẹ nọ yì agbà vodun tọn de kọ̀n. Ṣogan mẹdevo lẹ nọ yì ṣọṣi. Ṣigba e ma sọgbe nado lẹndọ sinsẹ̀n atọ̀n kẹdẹ wẹ tin to Aflika gba. To Malenu lẹ ṣẹnṣẹn, osẹ́n po nuyise voovo lẹ po wẹ tin. Sinsẹ̀n aṣa tọn nọ gbọnvo taun sọn fide jẹ fidevo. Kinklan daho wẹ tlẹ tin to ṣọṣi he ylọ yede dọ Klistiani lẹ ṣẹnṣẹn. Gbọnvona sinsẹ̀n he diyin lẹ, ṣọṣi klandovo fọtọ́n fọtọ́n lẹ wẹ tin lẹdo Aflika pé.

2. (a) Etẹ ji wẹ sinsẹ̀n mẹde tọn nọ saba sinai do? (b) Etẹlẹ wẹ ma nọ dohia dọ sinsẹ̀n mítọn yin alọkẹyi hlan Jiwheyẹwhe?

² Naegbọn gbẹtọ lẹ do nọ basi sinsẹ̀n dile yé nọ wà do? Suhugan gbẹtọ lẹ tọn wẹ tẹdo sinsẹ̀n mẹjitọ yetọn lẹ tọn go. Nuhe ko jọ wayi hoho lẹ sọ nọ yinuwa do sinsẹ̀n he gbẹtọ lẹ to bibasi to egbehe ji ga. Owe lọ Africains: un héritage triple [Glẹnsigbe] dọmọ: “Sinsẹ̀n Malenu lẹ tọn gbayipe gbọn agewaji Sahara tọn lẹpo mẹ gbọn awhàngbigba dali, . . . Sinsẹ̀n Klistiani tọn gbayipe gbọn hùwaji Sahara tọn lẹpo mẹ to aliho dopolọ mẹ. Kẹdẹdile sinsẹ̀n Malenu lẹ tọn gbayipe gbọn agewaji Sahara tọn lẹpo mẹ gbọn ohí  dali do, mọdopolọ wẹ sinsẹ̀n Klistiani tọn lọsu gbayipe gbọn hùwaji Sahara tọn lẹpo mẹ gbọn osò dali do niyẹn.” Ṣogan, suhugan mítọn lẹ wẹ nọ yise dọ Jiwheyẹwhe kẹalọyi sinsẹ̀n-bibasi mítọn. Ṣigba sinsẹ̀n de ma nọ yin nugbo, na mẹjitọ mítọn lẹ nọ basi i poun kavi na akọta jonọ delẹ sisẹ́ ẹ do tọgbo mítọn lẹ ji gannugannu wutu gba.

3-5. Apajlẹ tẹwẹ gọalọna mí nado mọ dọ e ma yin sinsẹ̀n lẹpo wẹ nọ plọnmẹ nugbo gba?

³ Dile etlẹ yindọ sinsẹ̀n lẹpo wẹ nọ sọalọakọ́n dọ yé to anademẹ dejidego zedonukọnnamẹ nado sẹ̀n Jiwheyẹwhe, linlẹn yetọn lẹ nọ gbọnvo. Yé nọ plọnmẹ onú voovo susu lẹ gando mẹhe Jiwheyẹwhe yin po nuhe e to bibiọ to mí si po go. Lẹnnupọndo ehe ji: Mí ni dọ dọ hiẹ mọ azọ́n to azọ́nwhé daho de. To azán tintan he gbè a bẹ azọ́n, hiẹ sè dọ azọ́ngán lọ tọ́nwhẹ̀n. Enẹwutu, hiẹ kanbiọ azọ́nwatọ atọ̀n nuhe hiẹ dona wà. Azọ́nwatọ tintan lọ dọna we dọ azọ́ngán lọ jlo dọ hiẹ ni nọ zàyí. Omẹ awetọ lọ dọ dọ hiẹ dona sá osẹ̀n do ohọ̀ lọ. Omẹ atọ̀ntọ dọna we dọ hiẹ ni má wekanhlanmẹ lẹ.

⁴ To godo mẹ, hiẹ kanhose azọ́nwatọ lẹ gando mẹhe hunkọ azọ́ngán lọ yin go. Omẹ tintan lọ dọna we dọ azọ́ngán lọ yin jọja de, bo yin omẹ gaa de, bosọ fiẹ. Omẹ awetọ lọ dọ dọ e whègli, bo poyọnho, bosọ yin homẹdagbenọ. Omẹ atọ̀ntọ lọ tlẹ dọna we dọ azọ́ngán lọ ma yin sunnu gba—dọ yọnnu wẹ azọ́ngán lọ yin. Vlavo, hiẹ na wá tadona lọ kọ̀n dọ azọ́nwatọ atọ̀n lẹpo ma to nugbo dọ gba. Eyin hiẹ jlo na hẹn agbasazọ́n towe yọyọ enẹ go, e yọnbasi dọ hiẹ na dindona nado yọ́n mẹhe hunkọ wẹ azọ́ngán lọ yin nugbonugbo podọ nuhe e jlo dọ hiẹ ni basi.

⁵ Nudopolọ wẹ whẹho sinsẹ̀n tọn yin. Na linlẹn lẹ sù taun gando mẹhe hunkọ Jiwheyẹwhe yin podọ nuhe e to bibiọ to mí si po go wutu, e biọ dọ mí ni hẹn ẹn diun dọ aliho he mẹ mí to sinsẹ̀n ẹn te sọgbe hẹ nugbo lọ. Ṣigba nawẹ mí sọgan yọ́n nugbo gando Jiwheyẹwhe go gbọn?