JIWHEYẸWHE GANHUNUPOTỌ wẹ Ogán wẹkẹ lọ tọn. Ogbẹ̀ mítọn todin podọ to sọgodo, tin to alọ etọn mẹ. E tindo nugopipe lọ nado suahọ mí podọ nado sayana mí. E tindo nugopipe lọ nado namẹ ogbẹ̀ podọ nado yí ogbẹ̀. Eyin mí tindo alọkẹyi etọn, míwlẹ na duale; eyin mí ma tindo alọkẹyi etọn, e na yin awugblenamẹnu de na mí. Lehe e yin nujọnu do sọ dọ sinsẹ̀n-bibasi mítọn ni yin alọkẹyi gbọn ewọ dali!

Gbẹtọ lẹ nọ basi sinsẹ̀n to aliho susu lẹ mẹ. Eyin sinsẹ̀n yin jijlẹ do aliho de go, be aliho sinsẹ̀n tọn lẹpo wẹ Jiwheyẹwhe kẹalọyi ya? Lala, e ma yinmọ. Jesu, yẹwhegán Jiwheyẹwhe tọn, dohia dọ aliho awe kẹdẹ wẹ tin. E dọmọ: “Gbigblo wẹ họntonu lọ, gblagada sọ wẹ ali lọ, he hẹn omẹ yì dindọn mẹ, susu sọ wẹ yé he to zọnlinzin gbọn finẹ lẹ. Na bibó wẹ họntonu lọ, jijlọ sọ wẹ ali lọ, he hẹn omẹ yì ogbẹ̀ mẹ, pẹvide wẹ yé he dín in mọ lẹ.”—Matiu 7:13, 14.

Sinsẹ̀n wunmẹ awe kẹdẹ wẹ tin: yèdọ dehe nọ planmẹ sọyi ogbẹ̀ mẹ po dehe nọ planmẹ sọyi dindọn mẹ po. Lẹndai alọnuwe ehe tọn wẹ nado gọalọ na we nado mọ aliho lọ he nọ planmẹ yì ogbẹ̀ madopodo mẹ.