1, 2. Apajlẹ tẹwẹ dohia dọ nuhudo tin na nujinọtedo de nado didẹ whẹho sinsẹ̀n tọn?

 NAWẸ mí sọgan wá yọ́n Jiwheyẹwhe gbọn? Be dandan wẹ e yin nado dindona nuplọnmẹ sinsẹ̀n susu he tin lẹpo tọn ya? Ehe ma na yọnbasi. Eyin mí tlẹ sọgan wàmọ, nawẹ mí sọgan yọ́n nuplọnmẹ he sọgbe lọ gbọn?

² Matin ayihaawe, to pọndohlan mẹ na linlẹn voovo he tin gando Jiwheyẹwhe go lẹ, mí tindo nuhudo aliho de tọn nado yọ́n nugbo lọ, nujinọtedo de he gbẹtọ lẹ sọgan kẹalọyi. Di dohia: Mí ni dọ dọ nudindọn de wá aimẹ to ahimẹ gando tedidi avọ̀ de tọn go. Avọ̀satọ lọ dọ mẹtlu atọ̀n wẹ avọ̀ lọ, ṣigba nuhọtọ lọ lẹndọ e ma dite sọmọ. Nawẹ yé sọgan didẹ whẹho lọ gbọn? Gbọn avọ̀ lọ jijlẹ po nujlẹpo de po dali.

3. Etẹwutu wẹ Biblu yin kinkàn?

³ Be nujlẹpo de tin, yèdọ nujinọtedo de, nado didẹ whẹho sinsẹ̀n tọn lẹ ya? Mọwẹ, Biblu wẹ. Jiwheyẹwhe hẹn Biblu yin kinkàn na gbẹtọ lẹpo nido sọgan plọn nugbo gando ewọ go. Vọkan liva lẹ wẹ ko yin zinzinjẹgbonu. Blebu etọn kavi apadewhe etọn ko yin lilẹdogbedevomẹ do nuhugan ogbè 2 100 mẹ. Diblayin mẹlẹpo wẹ sọgan hia nugbo gando Jiwheyẹwhe go do ogbè yelọsu tọn titi mẹ.

4. Nudọnamẹ tẹlẹ wẹ Biblu bẹhẹn?

⁴ Biblu yin nunina họakuẹ de sọn Jiwheyẹwhe dè. E nọ basi zẹẹmẹ nuhe míwlẹ ma sọgan yọnẹn gbede to aliho devo mẹ lẹ tọn. E dọho gando mẹhe tin to  agblò gbigbọ tọn mẹ lẹ go. E nọ de linlẹn Jiwheyẹwhe tọn lẹ, mẹhe e yin, po lẹndai etọn po hia. E dọ lehe e yinuwa hẹ gbẹtọ lẹ na owhe fọtọ́n fọtọ́n lẹ do. E dọ nuhe na wá jọ to sọgodo lẹ. E sọ do lehe mí sọgan mọ aliho he nọ plamẹ yì ogbẹ̀ madopodo mẹ gbọn hia.

5. Apajlẹ tẹwẹ dohia dọ Biblu sọgbe to lẹnunnuyọnẹn-liho?

⁵ Whẹwhinwhẹ́n susu wẹ tin nado yise dọ Biblu yin Ohó Jiwheyẹwhe tọn nugbo. Whẹwhinwhẹ́n dopo wẹ yindọ Biblu sọgbe to lẹnunnuyọnẹn-liho. To hohowhenu, gbẹtọ lẹ lẹdo aihọn lọ pé nọ lẹndọ aigba lọ sinai do nude ji. Di apajlẹ, to whèyihọ Aflika tọn, gbẹtọ lẹ yise dai dọ aigba sinai do odàn he hásá ede de ji, yèdọ hihásá etọn 3 500 tin to aga bọ 3 500 devo sọ tin to odò na aigba lọ. Ṣigba, to kọndopọmẹ hẹ lẹnunnuyọnẹn, Biblu kàntọ de wlan to nuhugan owhe 3 500 lẹ die wayi dọ Jiwheyẹwhe “ze aigba plá do agbágbá ji.”—Job 26:7.

6. Etẹwẹ yin kunnudenu daho hugan lọ he dohia dọ Biblu wá sọn Jiwheyẹwhe dè?

⁶ Kunnudenu daho hugan he dohia dọ Biblu na taun tọn wá sọn Jiwheyẹwhe dè lọ wẹ yin kandai pipé dọdai sọgodo tọn etọn. To vogbingbọn mẹ na dọdai gbẹtọ tọn lẹ, Jiwheyẹwhe yọ́n sọgodo na nugbo tọn; nuhe e nọ dọ lẹpo wẹ nọ mọ hẹndi.

7. Etẹwẹ yin delẹ to dọdai Biblu tọn lẹ mẹ he ko mọ hẹndi yetọn yí to ojlẹ he wayi lẹ mẹ?

⁷ Dọdai Biblu tọn kanweko susu wẹ ko yin hinhẹndi to hohowhenu. Di apajlẹ, owhe 700 lẹ jẹnukọn wẹ Biblu ko dọ po gbesisọ po dọ Jesu na yin jiji to tòpẹvi Bẹtlẹhẹm tọn mẹ, podọ e sọ jọ domọ. (Mika 5:2; Matiu 2:3-9) To yidogọ mẹ na dọdai susu devo lẹ gando Jesu go, Biblu dọ dọ e na yin jiji gbọn yọnnu alọji de dali bo nasọ wá yin didehia na fataka-kuẹ 30. Dọdai enẹlẹ sọ mọ hẹndi yí ga. Na jide tọn, e ma sọgan yin gbẹtọvi de wẹ dọ dọdai onú enẹlẹ tọn gba!—Isaia 7:14; Zekalia 11:12, 13; Matiu 1:22, 23; 27:3-5.

8. Etẹwẹ yin delẹ to dọdai Biblu tọn lẹ mẹ he to hẹndi yetọn mọyi todin, podọ etẹwẹ ehelẹ dohia?

⁸ Dọdai Biblu tọn susu wẹ to hẹndi  mọyi to ojlẹ mítọn mẹ. Delẹ die to yé mẹ:

•   “Akọta de na fọ́n do akọta de ji [to awhànfunfun mẹ], ahọludu de do ahọludu de ji: aigba whinwhàn daho na tin to otẹn hunkọhunkọ mẹ, huvẹ po azọ̀n ylankan po.”—Luku 21:10, 11.

•   “Ylanwa na sudeji.”—Matiu 24:12.

•   ‘To azán godo tọn lẹ mẹ . . . gbẹtọ lẹ na lẹzun owanyi na yéde tọ́, nukunkẹnnọ, . . . tolivẹtọ do mẹjitọ go, . . . awumajainanọ, kanylantọ, vivlẹtọ mẹdagbe lẹ tọn, . . . goyitọ, wanyina aṣọ́ hú Jiwheyẹwhe tọ́.’—2 Timoti 3:1-5.

 Be hiẹ ma yigbe dọ onú ehelẹ to jijọ todin ya? Nugbo-yinyin po gbesisọ-yinyin dọdai Biblu tọn lẹ po dohia dọ Biblu ma yin owe paa de gba. Ohó gbọdo Jiwheyẹwhe tọn wẹ!—2 Timoti 3:16.

9, 10. Etẹwẹ dohia dọ Jiwheyẹwhe ma na dotẹnmẹ gbẹtọ lẹ nado diọ Biblu?

⁹ Mí ni dọ dọ hiẹ tindo azọ́nwhé de bọ hiẹ wleawu todohukanji nunọwhinnusẹ́n delẹ tọn na azọ́nwatọ towe lẹ bo tlẹ́ ẹ do núgo. Etẹwẹ hiẹ na wà eyin kẹntọ de wá diọ nuhe hiẹ ko kandai lẹ? Be hiẹ ma na basi vọjlado na nuhe yin didọ lẹ ya? To aliho dopolọ mẹ, Jiwheyẹwhe ma na dotẹnmẹ gbẹtọ lẹ nado diọ nugbo he tin to Ohó etọn, Biblu lọ mẹ gba.

¹⁰ Mẹhe ko tẹnpọn nado diọ nuplọnmẹ Ohó Jiwheyẹwhe tọn lẹ ma tindo kọdetọn dagbe. Eyin mí yí Biblu he míwlẹ tindo to egbehe jlẹdo vọkan hohowhenu tọn lẹ go, mí na mọ dọ nudopolọ wẹ yé yin. Ehe dohia dọ Biblu ma ko yin didiọ to owhe lẹ gblamẹ gba.