1. Nudide tẹwẹ gbẹtọ lẹ pannukọn egbehe gando sinsẹ̀n-bibasi go?

 JESU dọmọ: “Ewọ he ma nọ hẹ mi, e jẹagọ do ogo e.” (Matiu 12:30) Eyin mí ma to adà Jehovah tọn mẹ, be adà Satani tọn mẹ wẹ mí te. Mẹsusu nọ lẹndọ yé to Jehovah sẹ̀n to aliho he yin alọkẹyi de mẹ, ṣigba Biblu dọ dọ Satani “nọ to aihọn lẹpo klọ.” (Osọhia 12:9). Gbẹtọ livi susu lẹ nọ yise dọ yé to Jiwheyẹwhe sẹ̀n, ṣigba Satani Lẹgba sẹ̀n wẹ yé te na nugbo tọn! Gbẹtọ lẹ to egbehe dona basi nudide de: Vlavo yé dona sẹ̀n Jehovah, “Jiwheyẹwhe nugbo tọn” kavi Satani “otọ́ [lalo tọn].”—Psalm 31:5; Johanu 8:44.

2. Etẹwẹ yin dopo to aliho he Satani nọ yizan nado glọnalina gbẹtọ lẹ sọn Jehovah sinsẹ̀n mẹ?

² Nudide bibasi nado sẹ̀n Jehovah yin nudide nuyọnẹn tọn, he Jiwheyẹwhe nọ kẹalọyi lọ. Ṣigba homẹ ma nọ hùn Satani gando mẹdepope he to Jiwheyẹwhe sẹ̀n go; e nọ fọ́n nuhahun dote na mẹhe to mọwà lẹ. Dopo to aliho he mẹ e nọ wàmọ te lẹ wẹ yin nado hẹn mẹṣanko kavi homẹkẹn wá sọn mẹdevo lẹ dè, vlavo sọn họntọn kavi hagbẹ whẹndo tọn lẹ dè. Jesu na avase dọmọ: “Kẹntọ gbẹtọ de tọn wẹ yé he tin to owhé ewọ lọsu tọn gbè lẹ na yin.”—Matiu 10:36.

3. Eyin whẹndo kavi họntọn towe lẹ diọnukunsọ sinsẹ̀n-bibasi towe hlan Jiwheyẹwhe, etẹwẹ hiẹ na wà?

³ Eyin onú mọnkọ jọ do gowe, nawẹ hiẹ na yinuwa do? Mẹsusu yọnẹn dọ sinsẹ̀n yetọn ma sọgbe, ṣogan yé nọ whleawu nado jẹ mẹdekannu sọn e mẹ. Yé nọ lẹndọ e na yin nugbomadọ hlan whẹndo yetọn eyin yé wàmọ.  Be enẹ sọgbe hẹ lẹnpọn dagbe ya? Eyin hiẹ yọnẹn dọ hagbẹ whẹndo towe tọn delẹ to amasin adínọ lẹ yizan, be hiẹ ma na na yé avase dọ amasin enẹ na gbleawuna yé ya? Hiẹ ma na kọnawudopọ hẹ yé to amasin enẹlẹ yiyizan mẹ gba, kavi e mayin mọwẹ ya?

4. Etẹwẹ Jọṣua dọna Islaelivi lẹ gando sinsẹ̀n-bibasi go to azán etọn lẹ gbè?

⁴ Jọṣua dotuhomẹna Islaelivi lẹ nado jo nuwiwa po aṣa sinsẹ̀n tọgbo yetọn lẹ tọn he ma sọgbe lẹ po do. E dọmọ: “Dinvie dibusi OKLUNỌ, bo nọ sẹ̀n ẹn to dodo mẹ podọ to nugbo mẹ: bo de yẹwhe he otọ́ mìtọn lẹ sẹ̀n to Otọ̀ lẹ godo dọ́n sẹ̀, podọ to Egipti mẹ; mì ni bo sẹ̀n OKLUNỌ.” (Jọṣua 24:14) Jọṣua yin nugbonọ hlan Jehovah, bọ Jehovah sọ dona ẹn. Eyin mí yin nugbonọ hlan Jehovah, e na dona mílọsu.—2 Samuẹli 22:26.

5. Etẹwutu mí dona bẹ núzinzan afinyọn tọn lẹ dlan?

⁵ Mẹdekannujijẹ sọn sinsẹ̀n lalo mẹ sọ zẹẹmẹdo dọ mí dona fiọ núzinzan afinyọn tọn depope he mí tindo, taidi obó, dèfinfẹ̀n, alọkẹ́-didà po obó-gan lẹ po, gọna nuhe taidi ehe lẹpo. Ehe yin onú titengbe de na e nọ dohia dọ mí dejido Jehovah go mlẹnmlẹn.

6. Etẹwẹ Klistiani fliflimẹ tọn lẹ basi na owe afinyọnnuwiwa tọn yetọn lẹ?

⁶ Doayi nuhe Klistiani fliflimẹ tọn delẹ basi to whenuena yé de nado basi sinsẹ̀n nugbo lọ go. Biblu dọmọ: “Susu yetọn ga he nọ zan anà hunkọhunkọ bẹ owe yetọn lẹ plidopọ, bo mẹ̀ yé to gbẹtọ lẹpo nukọn.”—Owalọ lẹ 19:19.

7. Etẹwẹ mí sọgan wà eyin aovi lẹ to tuklado mí?

⁷ Aovi lẹ sọgan dotukla mẹdelẹ he ko tindo mahẹ to azé, owọ́n po obówiwa po mẹ dai, ṣigba bo wá jẹ Jehovah sẹ̀n ji todin. Eyin onú mọnkọtọn jọ do gowe, hodẹ̀ hlan Jehovah po gbèzeyiaga po, bo ylọ oyín etọn. E na gọalọna we.—Howhinwhẹn lẹ 18:10; Jakobu 4:7.

8. Nukun tẹwẹ Klistiani lẹ nọ yí do pọ́n boṣiọ, atinpipa, po yẹdide sinsẹ̀n tọn he nọ yin yiyizan to sinsẹ̀n lalo mẹ lẹ po?

⁸ Mẹhe jlo na sẹ̀n Jehovah lẹ ma dona tindo kavi yí boṣiọ, atinpipa, kavi yẹdide sinsẹ̀n tọn depope zan gba. “Yise dali wẹ [Klistiani nugbo lẹ] to zọnlinzin gbọn, e mayin gbọn mimọ dali gba.” (2 Kọlintinu lẹ 5:7) Yé nọ setonuna osẹ́n Jiwheyẹwhe tọn he gbẹ́ boṣiọ lẹ sinsẹ̀n.—Eksọdusi 20:4, 5.

9. Ayinamẹ tẹwẹ Biblu na mí nado lẹzun nuyọnẹntọ?

⁹ Biblu dọmọ: “Ewọ he to zọnlinzin hẹ nuyọnẹntọ na yọnnuin.” (Howhinwhẹn lẹ 13:20) Eyin mí jlo na yin nuyọnẹntọ, mí dona zinzọnlin, kavi dogbẹ́ hẹ Kunnudetọ Jehovah tọn lẹ. Yewlẹ wẹ to zọnlinzin to aliho he nọ planmẹ yì ogbẹ̀ mẹ lọ ji.—Matiu 7:14.

10. Nawẹ Kunnudetọ Jehovah tọn lẹ sọgan gọalọna we nado sẹ̀n Jiwheyẹwhe gbọn?

¹⁰ Kunnudetọ lẹ nọ hò gbẹtọ lẹ tọn pọ́n. Azọ́n yetọn wẹ yin nado gọalọna gbẹtọ ahunjijlọnọ lẹ nado mọnukunnujẹ nugbo Biblu tọn lẹ mẹ he nọ planmẹ sọyi ogbẹ̀ madopodo mẹ. Yé sọgan gọalọna we gbọn Biblu pinplọn hẹ we vọ́nu dali. Yé na na gblọndo kanbiọ towe lẹ tọn bo na dohia we lehe hiẹ na yí oyọnẹn Biblu tọn do yizan mẹ to gbẹzan towe mẹ do.—Johanu 17:3.

11. Nawẹ opli Klistiani tọn lẹ sọgan gọalọna we gbọn?

¹¹ To opli yetọn lẹ, he nọ saba yin bibasi to Plitẹnhọ Ahọluduta tọn mẹ, hiẹ na plọnnu dogọ gando aliho Jehovah tọn lẹ go. Hiẹ na yin hinhẹn lodo to ojlo towe nado basi sinsẹ̀n nugbo lọ mẹ. Podọ hiẹ nasọ yin azọ́nplọn gando lehe a sọgan gọalọna mẹdevo lẹ nado plọn nugbo Biblu tọn lẹ do go.—Heblu lẹ 10:24, 25.

12. Nawẹ dẹ̀hiho sọgan gọalọna we nado sẹ̀n Jiwheyẹwhe gbọn?

¹² Dile hiẹ plọn nususu gando ojlo po lẹndai Jehovah tọn po go, hiẹ na hẹn nukunnumọjẹnumẹ towe gando aliho owanyinọ etọn lẹ go siso dogọ. Hiẹ dona sọ whẹ́n deji to ojlo towe nado basi nuhe nọ hẹn homẹ etọn hùn lẹ mẹ bo nasọ dapana nuhe nọ gblehomẹ na ẹn lẹ. Flindọ hiẹ sọgan dọnsẹpọ Jehovah to odẹ̀ mẹ nado biọ alọgọ etọn nado wà nuhe  sọgbe bo gbẹkọ oylan go.—1 Kọlintinu lẹ 6:9, 10; Filippinu lẹ 4:6.

13. Nawẹ hiẹ sọgan hẹn homẹ Jehovah tọn hùn gbọn?

¹³ To madẹnmẹ, dile hiẹ to whinwhẹ́n to gbigbọ-liho, matin ayihaawe, hiẹ na wá mọ nuhudo lọ nado lẹzun Kunnudetọ Jehovah tọn he ko basi klandowiwe bo yí baptẹm de. Gbọn awukọndopọ hẹ omẹ etọn lẹ dali, hiẹ na hẹn homẹ Jehovah tọn hùn. (Howhinwhẹn lẹ 27:11) Hiẹ na tin to gbẹtọ ayajẹnọ lẹ mẹ, he Jiwheyẹwhe dọho gando yé go dọmọ: “Yẹn na nọ nọ̀ yé mẹ, bosọ nọ to zọnlinzin to yé mẹ; yẹn na yin Jiwheyẹwhe yetọn yewlẹ nasọ yin omẹ ṣie.”—2 Kọlintinu lẹ 6:16.