1. Etẹwẹ na jọ eyin mí “sẹpọ Jiwheyẹwhe”?

 JEHOVAH yiwanna mẹhe nọ sẹ̀n ẹn lẹ. Eyin hiẹ sẹ̀n Jehovah, e na dona we todin podọ to sọgodo. Biblu dọmọ: “Mì sẹpọ Jiwheyẹwhe, ewọ nasọ sẹpọ mì.”—Jakobu 4:8.

2. Nawẹ mí sọgan dọnsẹpọ Jiwheyẹwhe gbọn, podọ nawẹ ehe na yinuwa do odẹ̀ mítọn lẹ ji gbọn?

² Nado dọnsẹpọ Jiwheyẹwhe, hiẹ dona plọn Ohó etọn bo yí ì do yizan mẹ. Eyin hiẹ nọ hodẹ̀ to kọndopọmẹ hẹ ojlo etọn, Jehovah na dotoaina odẹ̀ towe lẹ bo na na gblọndo yé. Apọsteli Klistiani Johanu wlan dọmọ: “Ehe sọ wẹ tudido he mí tindo to [Jiwheyẹwhe] mẹ, dọ, eyin mí biọ nudepope kẹdẹdi ojlo etọn, e sè mítọn: eyin mí yọnẹn dọ e sè mítọn, nudepope mí biọ, mí yọnẹn dọ mí [na] tindo kanbiọ he mí to bibiọ to e dè.”—1 Johanu 5:14, 15.

3-7. Nawẹ mí sọgan mọ nuyọnẹn Jiwheyẹwhe tọn yí gbọn, podọ nawẹ e sọgan gọalọna mí gbọn?

³ Humọ, dile hiẹ dọnsẹpọ Jiwheyẹwhe, e na na we nuyọnẹn nado pehẹ ninọmẹ egbesọ gbẹ̀mẹ tọn lẹ. Biblu dọmọ: “Eyin mẹde ma tindo nuyọnẹn to mì mẹ, ni kanbiọ to Jiwheyẹwhe dè.”—Jakobu 1:5.

⁴ Nawẹ nuyọnẹn Jiwheyẹwhe tọn sọgan gọalọna we gbọn? Onú dopo wẹ yindọ, e sọgan gọalọna we nado yọ́n nuhe nọ gblehomẹna Jehovah lẹ. Hiẹ sọgan sọ plọn nuhewutu onú ehelẹ ylan podọ nuhe hiẹ sọgan wà nado dapana yé. Oyọnẹn mọnkọtọn sọgan basi hihọ́na we sọn nuhahun he nọ dotukla gbẹtọ lẹ to paa mẹ si. Di apajlẹ, tonusisena ayinamẹ Jiwheyẹwhe tọn nado yin wiwe to walọyizan-liho nọ gọalọna omẹ Jiwheyẹwhe tọn lẹ nado yin hihọ́-basina sọta hòmimọ he yè ma jlo, asamẹzọ̀n lẹ, po ayajẹ ma tindo kavi gbakija alọwle tọn po.

⁵ Onú devo tẹwẹ nuyọnẹn he Jiwheyẹwhe nọ namẹ sọgan basi na we? E sọgan gọalọna we nado mọ ale dagbe susu sọn gbẹninọ mẹ. E sọgan gọalọna we nado basi nudide nuyọnẹn tọn lẹ to whẹho nujọnu tọn lẹ, taidi akuẹzinzan po nuyọnẹn po mẹ. Hiẹ na penugo nado doafọna yanwle he họakuẹ lẹ podọ nado gbẹkọ yanwle he ma tindo nuhọakuẹ dẹn-to-aimẹ lẹ go.

⁶ Nuyọnẹn Jiwheyẹwhe tọn sọgan sọ gọalọna we to haṣinṣan towe hẹ mẹdevo lẹ mẹ. Hiẹ sọgan duvivi gbẹzan whẹndo ayajẹnọ de tọn. Hiẹ sọgan wleawuna họntọnjihẹmẹ nujọnu tọn he nọ dẹn-to-aimẹ hẹ mẹdevo lẹ, podọ mẹdevo lẹ, yèdọ mẹhe ma tlẹ nọ sẹ̀n Jiwheyẹwhe lẹ sọgan nọ na sisi we.

⁷ Humọ, nuyọnẹn Jiwheyẹwhe tọn tintindo na hẹn pọndohlan gbẹninọ tọn towe pọnte. E na gọalọna we nado pehẹ nuhahun gbẹ̀mẹ tọn lẹ po flumẹjijẹ lẹ po. Podọ, hiẹ na tindo pọndohlan dagbe jlẹkaji tọn gando sọgodo go. Pọndohlan dagbe, to godo mẹ, na gọalọna we nado tindo agbasalilo to apọ̀nmẹ podọ to agbasamẹ.—Howhinwhẹn lẹ 14:30; Isaia 48:17.

8. Eyin hiẹ to Jiwheyẹwhe sẹ̀n, etẹlẹ wẹ hiẹ ma na dibuna?

⁸ Eyin hiẹ to Jiwheyẹwhe nugbo lọ sẹ̀n, hiẹ na jẹ mẹdekannu sọn obu he nọ dotukla mẹhe ma nọ sẹ̀n ẹn lẹ mẹ. Na hiẹ yọnẹn dọ oṣiọ lẹ ma yọ́n nudepope to yọdò mẹ wutu, hiẹ ma na nọ dibusi mẹhe ko kú  lẹ gba. Na hiẹ tindo jidide gando opagbe Jiwheyẹwhe tọn nado fọ́n oṣiọ lẹ go wutu, hiẹ ma na dibuna okú gba. Podọ to whenuena hiẹ yọnẹn dọ Jiwheyẹwhe wẹ yin huhlọnnọ hugan, hiẹ ma na dibusi azé po bojijlẹ po.—Johanu 8:32.

9-11. Mẹnu lẹ wẹ na nọgbẹ̀ to Paladisi mẹ, podọ mẹnu lẹ wẹ ma na nọ̀ e mẹ?

⁹ Eyin hiẹ dọnsẹpọ Jiwheyẹwhe, hiẹ ma na dibuna sọgodo. Dile mí ko mọ do, Biblu ko dọ dọdai suhugan nuhahun he mọ mí te to aigba ji to egbehe lẹ tọn. Jehovah dọna mí dọ ojlẹ gli wẹ onú ehelẹ na jọ na; Ahọluduta Jiwheyẹwhe tọn na lẹ́ aigba mítọn zun paladisi to madẹnmẹ.—Luku 21:10, 11, 31; 23:43.

¹⁰ Mẹhe dọnsẹpọ Jehovah bo sẹ̀n ẹn lẹ kẹdẹ wẹ na nọgbẹ̀ to Paladisi mẹ. Biblu dọmọ: “Whenu pẹde, mẹylankan lẹ ma na tin ba: nugbo, hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”—Psalm 37:10, 11.

¹¹ Mẹhe sinyẹnta bo ma setonuna osẹ́n dodonọ Jiwheyẹwhe tọn lẹ na hẹn ogbẹ̀ yetọn bu kakadoi. (2 Tẹsalonikanu lẹ 1:8, 9) Yé ma nasọ tin gbede ba. Yé na kú okú madopodo hẹ Satani po aovi etọn lẹ po. (Osọhia 20:10, 14) Ṣigba mẹhe plọnnu gando Jehovah go bosọ sẹ̀n ẹn lẹ na duvivi homẹhun susu tọn to Paladisi mẹ to aigba ji.

12. Etẹwẹ Biblu dọ dogbọn sọgodo dali?

¹² Jehovah ko wleawuna onú dagbedagbe lẹ do sẹdotẹn na mẹhe yiwanna ẹn lẹ! Saa pọ́n nuhe Ohó etọn dọ gando gbẹninọ to Paladisi aigba ji tọn mẹ go:

•   Núdùdù susugege na tin: “Gbado [kavi, núdùdù] susugege na tin finẹ to osó lẹ ji, sinsẹ́n etọn nasọ to mùmù.”—Psalm 72:16.

•   Ohọ̀ whanpẹnọ lẹ: “Yé na gbá ohọ̀, bosọ nọ nọ̀ yé mẹ.”—Isaia 65:21.

•   Azọ́n dagbe: “Omẹ ṣie lẹ na dugbẹ azọ́n alọ yetọn tọn dẹn. Yé ma na wazọ́n yaya.”—Isaia 65:22, 23.

•   Awutu ma nasọ tin ba: “Finẹnu lẹ ma to na dọmọ, yẹn to azọ̀njẹ.”—Isaia 33:24.

•   Madogán depope ma nasọ tin ba: “Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn nasọ hùn. Whenẹnu wẹ pòtẹn na lọ́n di agbanlin [asu], odẹ́ unbọpẹn tọn nasọ jihàn.”—Isaia 35:5, 6.

•   Awufiẹsa, awubla, okú ma nasọ tin ba: “Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.”—Osọhia 21:4.

•   Awhàn ma nasọ tin ba: “[Jiwheyẹwhe] hẹn awhàn gbọ̀ kakajẹ aigba podo.”—Psalm 46:9.

•   Ogbẹ̀ madopodo: “Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:29.

13. Mẹnu kẹdẹ wẹ sọgan lẹ́ aigba ehe zun paladisi de, podọ etẹwutu e do yinmọ?

¹³ Gbẹtọvi lẹ ma sọgan hẹn onú ehelẹ wá gbede, ṣigba Jehovah tindo huhlọn nado basi nudepope he e ko dọ. Nudepope ma sọgan glọnalina ẹn nado basi nuhe e jlo na wà. Biblu dọmọ: “Ohó de sọn Jiwheyẹwhe dè ma na gbọ̀vọ́ huhlọn tọn gba.”—Luku 1:37.

14. Nawẹ hiẹ sọgan wá aliho he nọ planmẹ sọyi ogbẹ̀ madopodo mẹ lọ ji gbọn?

¹⁴ Gbọn Kunnudetọ etọn lẹ yiyizan dali, Jehovah to dotẹnmẹ lọ hundote na gbẹtọ lẹ to filẹpo nado “gbọn họntonu bibó” lọ mẹ podọ nado zinzọnlin to aliho he nọ planmẹ sọyi ogbẹ̀ madopodo mẹ lọ ji. Na hiẹ ni tin to gbẹtọ ayajẹnọ he yigbena oylọ-basinamẹ ehe lẹ mẹ. Na hiẹ ni basi sinsẹ̀n nugbo lọ bo duvivi dona Jehovah tọn lẹ tọn kakadoi!—Matiu 7:13, 14.