APÁ 7
Mẹnu lẹ Wẹ to Sinsẹ̀n Nugbo lọ Basi?
1. Etẹwẹ mí dona basi nado mọ alọkẹyi Jiwheyẹwhe tọn?
NADO duvivi haṣinṣan pẹkipẹki, owanyinọ de hẹ Jiwheyẹwhe, mí ma dona tindo kanṣiṣa depope hẹ sinsẹ̀n lalo. Mí dona basi sinsẹ̀n nugbo. Gbẹtọ livi susu wẹ to mọwà lẹdo aihọn pé to egbehe.
2. Fie wẹ Kunnudetọ Jehovah tọn lẹ sọgan yin mimọ te, podọ azọ́n tẹ wà wẹ yé te?
2 Dile Biblu dọ dọdai etọn do, sinsẹ̀n-basitọ nugbo lẹ yin “gbẹtọ susugege” lẹ he wá “sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ.” (Osọhia 7:9) To aigba 235 ji, Kunnudetọ Jehovah tọn livi livi lẹ to alọgọna mẹdevo lẹ nado plọnnu gando aliho po nubiọtomẹsi owanyinọ Jehovah tọn lẹ po go.
Yinyọ́n Sinsẹ̀n-Basitọ Nugbo Lẹ
3. Mẹnu wẹ Kunnudetọ lẹ nọ basi sinsẹ̀n hlan, podọ sinsẹ̀n-bibasi wunmẹ tẹlẹ wẹ yé nọ dapana?
3 Kunnudetọ lẹ yọnẹn dọ Jehovah kẹdẹ wẹ dona yin sinsẹ̀n. Yé nọ gbẹ́ nado litaina boṣiọ lẹ po yẹdide sinsẹ̀n tọn lẹ po. (1 Johanu 5:21) Yé ma nọ gbògbéna oṣiọ lẹ gbọn mahẹ tintindo to jọnu-didọ kavi hùnwhẹ devo lẹ he nọ nọgodona nuyise sinsẹ̀n lalo lẹ tọn po “oplọn aovi tọn” lẹ po mẹ dali gba. (1 Timoti 4:1) Ṣigba yé nọ miọnhomẹna mẹhe to aluẹmẹ lẹ gbọn zẹẹmẹ bibasina yé gando opagbe Jiwheyẹwhe tọn nado fọ́n oṣiọ lẹ sọnku do paladisi aigba ji tọn de mẹ dali.—Johanu 5:28, 29; Owalọ lẹ 24:15.
4. Etẹwẹ yin teninọ omẹ Jiwheyẹwhe tọn lẹ tọn gando bojijlẹ go?
4 Kunnudetọ lẹ ma nọ doalọ to bojijlẹ, azé kavi owọ́n mẹ gba, na yé yọnẹn dọ Lẹgba dè wẹ onú ehelẹ wá sọn. Yé ma nọ ganjẹ obó go nado basi hihọ́na yé gba—Jehovah go wẹ yé dejido.—Howhinwhẹn lẹ 18:10.
5. Aliho tẹmẹ wẹ Kunnudetọ Jehovah tọn lẹ “mayin aihọn tọn” te?
5 Jesu dọ dọ hodotọ etọn lẹ “mayin aihọn tọn.” (Johanu 17:16) Jesu lọsu gbẹ́ nado tindo mahẹ to tonudidọ azán etọn gbè tọn lẹ mẹ. (Johanu 6:15) Mọdopolọ, Kunnudetọ lẹ ma nọ doalọ to tonudidọ, owanyi akọta mẹtọn tọn, po avùnhiho aihọn ehe tọn nado do vogbingbọn hia to hagbẹ lẹ ṣẹnṣẹn po mẹ. Ṣigba, yé nọ sú takuẹ yetọn bo nọ setonuna osẹ́n otò he mẹ yé tin te tọn lẹ.—Johanu 15:19; Lomunu lẹ 13:1, 7.
6. Anademẹ tẹlẹ wẹ devizọnwatọ Jiwheyẹwhe tọn lẹ nọ hodo gando alọwle po gbẹdai po go?
6 Na yé setonu na anademẹ tohọluduta tọn wutu, Kunnudetọ lẹ nọ hẹn ẹn diun dọ yé basi kandai na alọwle yetọn. (Titu 3:1) Yé nọ setonuna anademẹ Jiwheyẹwhe tọn lẹ, bo nọ gbọnmọ dali dapana yọnnu-bibẹpli. (1 Timoti 3:2) Humọ, na yé nọ hodo nujinọtedo Biblu tọn lẹ to gbẹzan yetọn mẹ wutu, gbẹdai alọwle tọn bibasi ma gbayipe to devizọnwatọ Jiwheyẹwhe tọn lẹ ṣẹnṣẹn gba.
7. Aliho tẹmẹ wẹ Kunnudetọ lẹ nọ do owanyi hia ode awetọ te?
7 Kunnudetọ lẹ nọ yiwanna ode awetọ yetọn lẹ. Owanyi ehe, gọna owanyi yetọn na Jiwheyẹwhe, nọ kọ̀n yé dopọ to mẹmẹsunnu-yinyin nujọnu tọn mẹ, dile yé tlẹ wá sọn hẹnnu po akọta susu po mẹ sọ. Eyin nugbajẹmẹji de jọ kavi nuhudo delẹ sọawuhia, Kunnudetọ lẹ nọ yawu nado gọalọna yenọzo. Kunnudetọ lẹ nọ do owanyi hia to aliho he mẹ yé to gbẹnọ te.—Johanu 13:35.
Kunnudetọ Jehovah tọn lẹ yin kinkọndopọ to mẹmẹsunnu-yinyin lẹdo aihọn pe tọn de mẹ
8. Nuyiwa ylankan tẹlẹ wẹ omẹ Jiwheyẹwhe tọn lẹ nọ dapana?
8 Omẹ Jehovah tọn lẹ nọ dovivẹnu sinsinyẹn nado yin nugbonọ, bo zan gbẹzan jijlọ. Yé nọ dapana ajojijẹ, lalodido, fẹnnuwiwa, ahànnumu, po nuwiwa nugbomadọ ajọwiwa tọn lẹ po. Asu lẹ ma nọ hò asi yetọn. Whẹpo mẹdelẹ do lẹzun Kunnudetọ lẹ, yé nọ basi onú ehelẹ dai, ṣigba yé ko dote po alọgọ Jehovah tọn po. Yé ko yin ‘kiklọ wé’ to Jiwheyẹwhe nukọn.—1 Kọlintinu lẹ 6:9-11.
Ojlo Jiwheyẹwhe Tọn Basitọ Lẹ
9. Etẹwẹ owe de dọ gando sinsẹ̀n Klistiani Aflika tọn lẹ go?
9 Nugbo wẹ dọ sinsẹ̀n susu nọ sọalọakọ́n nado tindo nugbo lọ. Yé sọgan dlẹnalọdo azọ́njiawu lẹ nado nọgodona alọsọakọ́n yetọn lẹ. Taidi apajlẹ, owe de dọho gando sinsẹ̀n Klistiani Aflika tọn go dọmọ: “Azọ́n bojlẹtọ kavi bokọnọ tọn ma sọ nọ sà sọmọ ba na [sinsẹ̀n Klistiani tọn yọyọ lẹ] ko yitẹn to yé si taun. . . . Yé nọ sọalọakọ́n nado nọ mọnú namẹ bosọ nọ wà azọ́njiawu lẹ. Yẹwhegán yetọn lẹ nọ mọnú namẹ bosọ nọ detana odlọ lẹ. Yé nọ yí osin wiwe, amì wiwe, atin-sisọ, vẹla po nuyọ́nwán po zan nado hẹnazọ̀ngbọnamẹ podọ nado glọnalina awutu.
10, 11. Etẹwutu wẹ nuhe yin yiylọdọ azọ́njiawu to egbehe lẹ ma nọ dohia dọ Jiwheyẹwhe kẹalọyi sinsẹ̀n de?
10 Hagbẹ sinsẹ̀n ehelẹ tọn nọ sọalọakọ́n dọ azọ́njiawu yetọn lẹ dohia dọ Jiwheyẹwhe to didona sinsẹ̀n yetọn. Ṣigba nuhe yin yiylọdọ azọ́njiawu ehelẹ ma nọ dohia dọ Jehovah kẹalọyi sinsẹ̀n de gba. Satani gọalọna sinsẹ̀n lalonọ delẹ nado basi ‘ohia jiawu lẹ’. (2 Tẹsalonikanu lẹ 2:9) Humọ, Biblu ko dọdai dọ nunina jiawu lẹ sọn Jiwheyẹwhe dè, taidi dọdai didọ, ogbè hunkọhunkọ dido, po oyọnẹn vonọtaun lẹ po na “gbọ̀vọ́.”—1 Kọlintinu lẹ 13:8.
11 Jesu na avase dọmọ: “E ma yin mẹdepope he ylọ mi, Oklunọ, Oklunọ, wẹ na biọ ahọludu olọn tọn mẹ gba; adavo ewọ he wà ojlo Otọ́ ṣie he tin to olọn mẹ tọn. Omẹ susu wẹ na dọ hlan mi to azán nẹ gbè, dọ, Oklunọ, Oklunọ, be míwlẹ ma ko dọdai gbọn oyín towe mẹ? podọ gbọn oyín towe mẹ mí ko yàn [aovi] lẹ jẹgbonu? Podọ oyín towe mẹ mí wà azọ́n huhlọnnọ susu te? Whenẹnu wẹ yẹn na yigbe hlan yé dọ, Yẹn ma yọ́n mì gbede, mì tọ́nsọn dè e, mì azọ́n ylankan wàtọ.”—Matiu 7:21-23.
12. Mẹnu lẹ wẹ na biọ Ahọluduta olọn tọn mẹ?
12 To whelọnu lo, mẹnu lẹ wẹ na biọ Ahọluduta olọn tọn mẹ? Mẹhe nọ basi ojlo Jiwheyẹwhe tọn lẹ wẹ.
Yẹwhehodọtọ Ahọluduta Jiwheyẹwhe Tọn Lẹ
13. Azọ́n tẹwẹ Jiwheyẹwhe dena omẹ etọn lẹ to egbehe, podọ mẹnu lẹ wẹ to azọ́n enẹ wà?
13 Etẹwẹ Jiwheyẹwhe jlo dọ omẹ etọn lẹ ni wà todin? Jesu dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo.” (Matiu 24:14) Azọ́n ehe wẹ Kunnudetọ Jehovah tọn lẹ to wiwà po zohunhun po.
14. Etẹwẹ yin Ahọluduta Jiwheyẹwhe tọn, podọ mẹnu lẹ wẹ na dugán to Ahọluduta lọ mẹ?
14 Lẹdo “aigba fininọ lẹpo” pé, Kunnudetọ Jehovah tọn lẹ nọ lá wẹndagbe Ahọluduta Jiwheyẹwhe tọn taidi gandudu olọn mẹ tọn de he na dugán do aigba lọ pete ji to dodo mẹ. Yé nọ plọnmẹ dọ Jehovah ko de Klisti Jesu nado yin Ahọlu Ahọluduta enẹ tọn to pọmẹ hẹ gbẹdohẹmẹtọ etọn 144 000 lẹ he yin ṣinṣinyan sọn gbẹtọvi lẹ mẹ.—Daniẹli 7:14, 18; Osọhia 14:1, 4.
15. Etẹwẹ Ahọluduta lọ na vasudo?
15 Gbọn Biblu yiyizan dali, Kunnudetọ lẹ nọ dohia gbẹtọ lẹ dọ Ahọluduta Jiwheyẹwhe tọn na và titonu Satani tọn pete sudo. Sinsẹ̀n lalo na yin didesẹ po nuplọnmẹ etọn he ma nọ gbògbéna Jiwheyẹwhe bo nọ pagigona Lẹgba lẹ po! (Osọhia 18:8) Mọdopolọ, gandudu gbẹtọvi tọn he jẹagọdo Jiwheyẹwhe lẹpo na yin didesẹ!—Daniẹli 2:44.
16. Mẹnu lẹ wẹ na yin mẹjidugando Klisti Jesu tọn lẹ, podọ fie wẹ yé na nọgbẹ̀ te?
16 Humọ, Kunnudetọ Jehovah tọn lẹ nọ lá dọ Klisti Jesu na hẹn alemọyi jiawu wá na mẹhe basi nuhe Jiwheyẹwhe biọ lẹpo. Yé na yin mẹjidugando etọn lẹ to aigba ji. Biblu dopagbe dọmọ: “E na whlẹn agbátọnọ lọ whenu e to awhádo; oyanọ ga, podọ ewọ he ma tindo alọgọnamẹtọ de. Ewọ na tindo lẹblanu to oyanọ po agbátọnọ po ji; e nasọ whlẹn ayiha agbátọnọ tọn gán.”—Psalm 72:12, 13.
17. Mẹnu lẹ kẹdẹ wẹ to Ahọluduta Jiwheyẹwhe tọn lá?
17 Pipli gbẹtọ tọn devo depope masọ tin he to ojlo Jiwheyẹwhe tọn wà gbọn wẹndagbe Ahọluduta lọ tọn lilá dali gba. Kunnudetọ Jehovah tọn lẹ kẹdẹ wẹ to Ahọluduta Jiwheyẹwhe tọn lá lẹdo aihọn pé.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Nawẹ N’Sọgan Mọ Sinsẹ̀n Nugbo lọ Gbọn?
Be ‘sinsẹ̀n ehe ko yọ́n na mi’ kẹdẹ wẹ yin whẹho lọ ya?
