To Ezekiẹli weta 23 mẹ, mí mọ whẹgbledomẹ sinsinyẹn he yin lilá sọta omẹ Jiwheyẹwhe tọn lẹ na nugbonọ-mayin yetọn wutu. To aliho susu mẹ, nudọnamẹ he to weta ehe mẹ lẹ sọgbe hẹ dehe weta 16tọ bẹhẹn lẹ. Kẹdẹdi weta he jẹnukọn enẹ, weta 23tọ lọsu yí apajlẹ galilọ tọn zan. Jelusalẹm yin alọdlẹndo taidi nọviyọnnu pẹvi bọ Samalia yin yiylọdọ mẹdaho etọn yọnnu. Weta awe lọ lẹ do lehe nọviyọnnu pẹvi lọ hodo apajlẹ galilọ mẹdaho etọn tọn kaka bo tlẹ wá zẹ̀ e go to kanyinylan po walọ gblezọn po mẹ do hia. To weta 23tọ mẹ, Jehovah do yinkọ na nọviyọnnu awe lọ lẹ: Mẹdaho lọ nọ yin Ohola, enẹ wẹ Samalia, yèdọ tatọ́-tònọ ahọluduta hẹnnu ao Islaeli tọn; nọviyọnnu lọ nọ yin Oholiba, enẹ wẹ Jelusalẹm, yèdọ tatọ́-tònọ Juda tọn. *—Ezek. 23:1-4.

Weta awe lọ lẹ sọ tindo nudevo lẹ to kọndopọ mẹ. Vlavo dehe jẹna ayidego hugan lẹ die: Galọtọ lọ lẹpo wẹ taidi asi na Jehovah to bẹjẹeji bo ma wá yin nugbonọ na ẹn to godo mẹ. Humọ, opagbe todido tọn yin dido. Dile etlẹ yindọ weta 23tọ ma hẹn todido mẹfligọ tọn lọ họnwun sọmọ, nuhe e bẹhẹn lẹ gbẹ́ tindo kanṣiṣa hẹ weta 16tọ, na Jehovah dọ to finẹ dọmọ: “Yẹn na hẹn walọ gblezọn towe po galilọ [towe] po wá opodo.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

To ojlẹ de mẹ wayi, owe mítọn lẹ dọ dọ nọviyọnnu awe lọ lẹ, yèdọ Ohola po Oholiba po, nọtena sinsẹ̀n Mẹylọhodotọklisti tọn lẹ to dọdai-liho, ehe má do ogbẹ́ voovo Katoliki po Plọtẹstant po tọn lẹ ji. Amọ́, to nulinlẹnpọn yinukọn dogọ to odẹ̀ mẹ gọna dodinnanu susu godo, mí wá mọdọ ehe fọ́n kanbiọ titengbe delẹ dote. Be Mẹylọhodotọklisti ko taidi asi na Jehovah to linlẹn de mẹ pọ́n ya? Be e ko nọ alẹnu de mẹ hẹ ẹ pọ́n ya? Paali. Sinsẹ̀n Mẹylọhodotọklisti tọn lẹ ma ko tin to whenue Jesu lẹzun whẹgbọtọ “alẹnu yọyọ” he yin bibasi hẹ Islaeli gbigbọmẹ tọn lọ tọn; mọdopolọ Mẹylọhodotọklisti ma yin apadewhe akọta gbigbọmẹ tọn he bẹ Klistiani yiamisisadode lẹ hẹn enẹ tọn pọ́n gbede. (Jel. 31:31; Luku 22:20) Ojlẹ dindẹn to okú apọsteli lẹ tọn godo wẹ Mẹylọhodotọklisti wá aimẹ. E jẹ aimẹ wá ji to owhe kanweko ẹnẹtọ W.M. tọn taidi titobasinanu atẹṣitọ he ko gblezọn de he bẹ “ogbé ylankan,” enẹ wẹ Klistiani oklọ tọn lẹ hẹn, kẹdẹdile Jesu ko dọ dọdai etọn do to apajlẹ likun po ogbé ylankan lẹ po tọn lọ mẹ.—Mat. 13:24-30.

Vogbingbọn ayidego tọn devo die: Jehovah na todido mẹfligọ tọn Jelusalẹm po Samalia po he ma yin nugbonọ na ẹn. (Ezek. 16:41, 42, 53-55) Be Biblu na todido mọnkọ de sinsẹ̀n Mẹylọhodotọklisti tọn lẹ ya? Lala! Nuhe to tepọn adà Babilọni Daho lọ tọn he pò lẹ wẹ to tepọn yelọsu.

Enẹwutu, Ohola po Oholiba po ma nọtena sinsẹ̀n Mẹylọhodotọklisti tọn lẹ to dọdai-liho. Ṣigba, yé yin yiyizan nado hẹn mí mọnukunnujẹ nuhe tlẹ sọ yin nujọnu taun humọ de mẹ: enẹ wẹ numọtolanmẹ he Jehovah nọ tindo gando mẹhe nọ do oyín wiwe etọn po nujinọtedo sinsẹ̀n-bibasi wiwe-ṣeke tọn etọn lẹ po hia to aliho agọ̀ mẹ lẹ go. Sinsẹ̀n Mẹylọhodotọklisti tọn lẹ hùwhẹ taun to whẹho ehe mẹ, na ṣọṣi madosọha yetọn lẹ sọalọakọ́n dọ emi to afọ Jiwheyẹwhe he go Biblu donù tọn zedai. Humọ, yé sọ nọ sọalọakọ́n dọ Visunnu yiwanna Jehovah tọn, yèdọ Jesu Klisti wẹ yin nukọntọ emitọn. Ṣigba to ojlẹ dopolọ mẹ, yé nọ mọ́n gbeyiyi yetọn enẹ gbọn Jesu didohia taidi apadewhe Jiwheyẹwhe atọ̀n-to-dopomẹ de tọn dali podọ gbọn tolivivẹ na gbedide he e na tlọlọ ma nado “yin apadewhe aihọn tọn” dali. (Joh. 15:19) Gbọn boṣiọ-sinsẹ̀n po nudido to tonudidọ mẹ majomajo yetọn po gblamẹ, sinsẹ̀n Mẹylọhodotọklisti tọn lẹ ko dohia dọ adà tangan “galọtọ daho lọ” tọn de wẹ yé yin. (Osọ. 17:1) Matin ayihaawe, dindọn dopolọ he to tepọn sinsẹ̀n aihọn tọn lẹpo to pọmẹ wẹ to tepọn yelọsu!