Kunnudetọ Jehovah tọn lẹ ko yí lẹdogbedevomẹ Biblu tọn voovo lẹ zan nado plọnnu. Amọ́, Owe-Wiwe lẹ Lẹdogbedevomẹ Aihọn Yọyọ Tọn wẹ mí yiwanna nado nọ yizan hugan, eyin e tin-to-aimẹ to ogbè de mẹ, na e bẹ oyín Jiwheyẹwhe tọn hẹn, bo sọgbe bosọ họnwun wutu.

•   E bẹ oyín Jiwheyẹwhe tọn hẹn. Mẹdelẹ gboawupo nado jlayinna mẹhe e jẹ dọ yé ni jlayinna to zinjẹgbonu Biblu tọn he yé wleawuna lẹ mẹ. Di apajlẹ, to lẹdogbedevomẹ Biblu tọn de mẹ, yinkọ gbẹtọ 70 linlán delẹ tọn yin sislẹ, na yé gọalọ to aliho de kavi devo mẹ nado de Biblu lọ tọ́n wutu. Etomọṣo, oyín Dowatọ lọ, Jehovah Jiwheyẹwhe tọn yin didesẹ mlẹnmlẹn sọn Biblu ehe mẹ!

   To vogbingbọn mẹ, Lẹdogbedevomẹ Aihọn Yọyọ Tọn gọ̀ oyín Jiwheyẹwhe tọn do otẹn etọn mẹ to ofi fọtọ́n susu he e sọawuhia te to kandai dowhenu tọn lọ mẹ lẹ, bo ma ka de yinkọ mẹhe nọpọ́ do basi lẹdogbedevomẹ lọ lẹ tọn hia.

•   E sọgbe. E ma yin lẹdogbedevomẹ Biblu tọn lẹpo wẹ dọ nuhe tin to kandai dowhenu tọn lẹ mẹ pẹpẹ. Di apajlẹ, lẹdogbedevomẹ de lilẹ́ Matiu 7:13 to aliho ehe mẹ dọmọ: “Mì gbọn họntonu bibó lọ nù biọ e mẹ, na họntonu he nọ planmẹ yì zòmẹ lọ to gblagada podọ aliho he planmẹ yì finẹ lọ bọawu.” Ṣigba, hogbe lọ “vasudo” wẹ kandai dowhenu tọn lọ yizan, e ma yin “zòmẹ.” Vlavo lẹdogbedevomẹ-basitọ lọ lẹ yí hogbe lọ “zòmẹ” zan, na yé yise dọ mẹylankan lẹ na yin yasana kakadoi to olọnzomẹ wutu. Ṣigba, Biblu ma nọgodona linlẹn enẹ. Enẹwutu Lẹdogbedevomẹ Aihọn Yọyọ Tọn lilẹ́ wefọ ehe po gbesisọ po dọmọ: “Mì gbọn họntonu bibó lọ nù biọ e mẹ; na gbigblo wẹ họntonu lọ podọ gblagada wẹ aliho lọ he nọ planmẹ yì vasudo.”

•   E họnwun. Gbọnvona dọ lẹdogbedevomẹ dagbe de dona sọgbe, e sọ dona họnwun bọ yè sọgan mọnukunnujẹemẹ po awubibọ po. Lẹnnupọndo apajlẹ de ji. To Lomunu lẹ 12:11 mẹ, apọsteli Paulu yí hodidọ de zan bọ eyin lilẹdogbedevomẹ etọn yin bibasi to aliho tlọlọ tọn mẹ, e na zẹẹmẹdo “gbigbọ he hùnagbán.” Amọ́, na hodidọ enẹ ma tindo zẹẹmẹ sọmọ to Gungbe mẹ wutu, Lẹdogbedevomẹ Aihọn Yọyọ Tọn basi lẹdogbedevomẹ wefọ lọ tọn to aliho he bọawu de mẹ, na yè nido mọnukunnujẹemẹ. E dọ dọ Klistiani lẹ dona “hunzo to gbigbọ-liho.”

 Gbọnvona dọ Lẹdogbedevomẹ Aihọn Yọyọ Tọn bẹ oyín Jiwheyẹwhe tọn hẹn, bo sọgbe bosọ họnwun, nudevo sọ tin he hẹn ẹn gbọnvo na Biblu devo lẹ: E ma nọ yin sisà. Enẹ zọ́n bọ gbẹtọ livi susu sọgan hia Biblu to ogbè yetọn titi mẹ, kakajẹ mẹhe ma na ko penugo nado mọ akuẹ do họ̀ Biblu lẹ ji.