Mẹhe nọ dọyẹwheho wẹndagbe Ahọluduta Jiwheyẹwhe tọn to gbesisọ mẹ to osun dopodopo mẹ lẹ kẹdẹ wẹ mí nọ hia taidi Kunnudetọ Jehovah tọn. (Matiu 24:14) Ehe bẹ mẹhe ko yí baptẹm taidi Kunnudetọ lẹ hẹn, gọna mẹdevo lẹ he yin alọkẹyi nado nọ tindo mahẹ to azọ́n yẹwhehodidọ tọn lọ mẹ bo ma ka ko yí baptẹm.

Lala. Mí ma nọ pọ́n do nunina he mẹde nọ basi lẹ go do nọ hia mẹlọ di Kunnudetọ kavi do nọ na ẹn azọngban kavi lẹblanulọkẹyi vonọtaun de to titobasinanu mítọn mẹ gba. (Owalọ lẹ 8:18-20) Nugbo lọ wẹ yindọ yè ma tlẹ nọ yọ́n yinkọ mẹhe dè suhugan nunina lẹ tọn nọ wá sọn lẹ tọn. Kunnudetọ dopodopo wẹ nọ desọn ojlo mẹ sọgbe hẹ ninọmẹ etọn nado yí whenu, huhlọn, po nutindo etọn devo lẹ po zan nado nọgodona azọ́n he mí nọ wà lẹdo aihọn pé lọ.​—2 Kọlintinu lẹ 9:7.

To sunmẹsunmẹ, Kunnudetọ dopodopo nọ na linlin obá he mẹ e wà azọ́n yẹwhehodidọ tọn lọ jẹ to osun lọ mẹ tọn to agun he mẹ e tin te. Mẹdopodopo wẹ nọ desọn ojlo mẹ nado na linlin ehe.

Linlin agun lọ blebu tọn nọ yin bibẹdopọ, bọ lẹndopọ yetọn nọ yin didohlan wekantẹn alahọ tọn. Wekantẹn lọ nọ do lẹndopọ linlin otò kavi aigba-denamẹ dopodopo tọn hlan tatọ́-tẹnnọ mítọn.

To vivọnu owhe sinsẹ̀nzọn tọn dopodopo tọn, * linlin lọ lẹ nọ gọalọ nado yọ́n whenue sọha Kunnudetọ lẹ tọn yiaga hugan to otò dopodopo mẹ to owhe lọ mẹ. Sọha he yiaga hugan to otò dopodopo mẹ nọ yin bibẹdopọ nado yọ́n Kunnudetọ nẹmu he tin lẹdo aihọn pé. Nudọnamẹ gigọ́ lẹ gando linlin otò dopodopo tọn go, gọna numimọ lẹ gando azọ́n yẹwhehodidọ tọn lọ go, nọ yin zinzinjẹgbonu do Owhewé mítọn he yin Annuaire des Témoins de Jéhovah mẹ. Linlin enẹlẹ nọ na tuli mí, kẹdẹdile linlin mọnkọtọn lẹ na tuli Klistiani dowhenu tọn lẹ do.​—Owalọ lẹ 2:41; 4:4; 15:3.

Dile etlẹ yindọ mí ma nọ hia omẹ enẹlẹ do sọha Kunnudetọ lẹ tọn mẹ, mí nọ kẹalọyi yé po zohunhun po to agun mítọn lẹ mẹ. Suhugan yetọn nọ wá hùnwhẹ Oflin Okú Klisti tọn to whemẹwhemẹ, enẹwutu mí nọ yọ́n sọha yetọn jẹ obá de mẹ, eyin mí de sọha Kunnudetọ lẹ tọn sọn sọha mẹhe wá hùnwhẹ enẹ tẹnmẹ lẹpo tọn mẹ. To 2023, sọha mẹhe wá hùnwhẹ Oflin tọn lẹ tọn wẹ 20 461 767.

Susu mẹhe ma nọ wá opli mítọn lẹ tọn wẹ nọ duvivi tito Biblu pinplọnmẹ vọnu tọn mítọn to owhé yetọn lẹ gbè. To madozẹnzẹn mẹ to owhe 2023 gblamẹ, mí deanana tito Biblu pinplọnmẹ tọn 7 281 212 to sunmẹsunmẹ, bọ delẹ to yé mẹ nọ yin bibasi hẹ mẹsusu dopọ.

Nado yọ́n omẹ nẹmu he sinsẹ̀n dopodopo bẹhẹn, azọ́nwhé sọhayinanú tọn ahọlu tọn lẹ nọ saba kanse mẹdopodopo sinsẹ̀n he mẹ e nọ hia ede do. Di apajlẹ, Azọ́nwhé Sọhayinanú Tọn États-Unis tọn dọ dọ to sọhayinanú emitọn lẹ whenu, emi nọ “tẹnpọn nado yọnẹn eyin vlavo mẹhe emi kanhose lẹ nọ pọ́n yede hlan taidi hagbẹ sinsẹ̀n de tọn,” bo yidogọ dọ sọha blebu he emi nọ mọ to godo mẹ lẹ “nọ sọgbe poun hẹ nuhe mẹlẹ dọ, bo sọgan nọma yin sọha nujọnu tọn lọ dandan.” Amọ́ nulinlẹn mítọn gbọnvo, na mẹhe nọ yì dọyẹwheho na mẹdevo lẹ bo nọ na linlin azọ́n yẹwhehodidọ tọn yetọn tọn lẹ kẹdẹ wẹ mí nọ hia do sọha Kunnudetọ Jehovah tọn lẹ tọn mẹ. Mí ma nọ hia mẹhe nọ pọ́n yede hlan poun taidi Kunnudetọ lẹ demẹ.