Lalo: Kunnudetọ Jehovah tọn lẹ ma nọ dù Paaki na yé ma yin Klistiani wutu.

 Nugbo lọ: Mí yise dọ Jesu Klisti wẹ yin Mẹwhlẹngántọ mítọn, podọ mí nọ wà nuhe go mí pé lẹpo nado “hodo afọdòmẹ etọn lẹ pẹkipẹki.”—1 Pita 2:21; Luku 2:11.

 Lalo: Mì ma yise dọ Jesu yin finfọnsọnku.

 Nugbo lọ: Mí yise to fọnsọnku Jesu tọn mẹ, bo nọ pọ́n fọnsọnku enẹ hlan taidi onú titengbe de he mẹ Klistiani de dona tindo yise te, podọ mí sọ nọ zinnudeji to whenue mí to yẹwhehodọ.—1 Kọlintinu lẹ 15:3, 4, 12-15.

 Lalo: E ma nọ di nude na mì dọ ayajẹ he Hùnwhẹ Paaki tọn nọ hẹnwa ni gbọ ovi mìtọn lẹ go.

 Nugbo lọ: Mí yiwanna ovi mítọn lẹ, na mí nọ plọnazọ́n yé bo nọ gọalọna yé nado yin ayajẹnọ.—Titu 2:4.

•   Hùnwhẹ Paaki tọn ma sinai do Biblu ji.

•   Jesu biọ dọ mí ni nọ flin okú etọn, e ma yin fọnsọnku etọn. Mí nọ basi Hùnwhẹ Oflin tọn enẹ to owhe dopodopo mẹ to azán he gbè e kú sọgbe hẹ sunzanhiawe osun Biblu tọn egbezangbe tọn.—Luku 22:19, 20.

•   Mí yise dọ Jiwheyẹwhe ma kẹalọyi Hùnwhẹ Paaki tọn, na e wá sọn aṣa hohowhenu tọn de mẹ, yèdọ aṣa lọ nado nọ biọ nugopipe vijiji tọn sọn yẹwhe lẹ dè. Jiwheyẹwhe nọ biọ ‘mẹdezejo mlẹnmlẹn’ sọn mí si, podọ e nọ gblehomẹ gando sinsẹ̀n-bibasi he nọ bẹ aṣa he e ma kẹalọyi lẹ hẹn go.—Eksọdusi 20:5; 1 Ahọlu lẹ 18:21.

 Mí yise dọ nudide mítọn ma nado nọ dù Paaki sinai do Biblu ji, yèdọ owe de he dotuhomẹna mí nado nọ yí “nuyọnẹn he pé po zinzin po” zan kakati nado nọ hodo aṣa gbẹtọ tọn lẹ poun. (Howhinwhẹn lẹ 3:21; Matiu 15:3) To whenue mí to nuyise mítọn lẹ dọna mẹdevo lẹ gando nuhewutu mí ma do nọ dù Paaki go, mí sọ nọ na sisi jlọjẹ mẹdopodopo tọn nado de eyin e na dù Paaki kavi lala.—1 Pita 3:15.