Kunnudetọ Jehovah tọn ṣinẹnẹ mọ gbedewema mẹpipa tọn yí, na “alọgọ ayidego tọn” he yé nọ na mẹhe tin to dopo to opá daho hugan he mẹ jonọ lẹ nọ yin ginglọndo to Australie lẹ mẹ. Opá Daho Mẹginglọn tọn he sẹpọ tòdaho Derby tọn to whèyihọ-waji Australie tọn wẹ na gbedewema lọ Kunnudetọ lọ lẹ. a

To osẹ dopodopo mẹ, Kunnudetọ lẹ nọ dla jonọ he yin ginglọn lẹ pọ́n nado sè nuhe yé to pipehẹ lẹ bo nọ lá owẹ̀n homẹmiọn po todido po tọn he to Biblu mẹ na yé. Christopher Riddoch, he nọ penukundo whẹho sinsẹ̀n tọn po aṣa tọn lẹ po go to opá lọ mẹ dọmọ: “Kọdetọn he dlapọn yetọn nọ hẹnwa lẹ nọ sọawuhia to walọ jonọ he yin ginglọn lọ lẹ tọn mẹ to afọdopolọji.” E dọ dọ numọtolanmẹ jonọ lọ lẹ tọn nọ diọ bọ yé nọ gọ́ na ayajẹ to dlapọn lọ lẹ godo, na “yé nọ mọdọ mẹdelẹ to gbonu dọ́n bo nọ hò dagbemẹninọ yetọn pọ́n nugbonugbo.”

Mẹdaho Riddoch sọ dọ dọ gbedewema lọ yin ohia kleun de nado dọnudo Kunnudetọ lọ lẹ. E dọmọ: “Yé hẹn gbẹzan mẹhe go mí to nukunpedo lẹ tọn pọnte.” E yidogọ dọ nuyiwa Kunnudetọ lẹ tọn “nọ hẹn pipà wá na whẹndo yetọn lẹ, agun yetọn po yise yetọn po.”