To jikun sinsinyẹn he ja to agewaji Italie tọn sẹpọ vivọnu novembre 2016 tọn lẹ godo, singigọ hẹnnugble to gbétatò he to hùwaji tòpẹvi Moncalieri tọn delẹ mẹ. To fidelẹ, osin gọ́ wá aga kaka na nudi mẹtlu dopo daa linlán. Linlinwe de na linlin dọ “fide kavi nude ma tin bọ osin lọ ma hẹngble.” Nudi gbẹtọ 1 500 wẹ aṣẹpatọ lẹdo lọ tọn lẹ sẹtẹnna to afọdopolọji, podọ na pipli alọgọtọ owù-nujijọ tọn lẹ yawu yinuwa wutu, mẹdepope ma kú to nujijọ lọ mẹ. Etomọṣo, whẹndo susu wẹ hẹn nutindo yetọn lẹ bu.

Kunnudetọ lẹdo lọ tọn lẹ bẹ azọ́n jẹeji to afọdopolọji nado gọalọ. Yé gọalọna whẹndo he go nujijọ lọ gando lẹ nado bẹ ogbọ̀n po gbakija lẹ po sẹ̀ sọn owhé yetọn lẹ gbè bo basi hihọ́na núzinzan yetọn lẹ. To whenue kunnudetọ delẹ he hẹn azọ́nwanu po núdùdù miyọ́nawu po jei alọgọ gbé bo jẹ fide he tohọluduta ko súali te, aṣẹpatọ lẹ nagbè yé nado yì gọalọna whẹndo he to nuhudo mẹ de. Mẹdezejotọ lọ lẹ gọalọna Kunnudetọ hatọ yetọn lẹ gọna kọmẹnu yetọn he ma tlẹ yin Kunnudetọ lẹ.

Di apajlẹ, petlezìn de tin bọ osin gọ́ ohọ̀ odò tọn etọn lẹpo mẹ. To whenue alọgọtọ owù-nujijọ tọn lẹ ko gbọ́n osin sẹ̀ sọn ohọ̀ lọ lẹ mẹ godo, pipli daho Kunnudetọ lẹ tọn de gọalọna yisenọ hatọ de he nọ yin Antonio po whẹndo etọn po nado bẹ gbakija lẹ sẹ̀ sọn họ̀nù yetọn mẹ. Enẹgodo, mẹdezejotọ lọ lẹ gọalọna mẹhe pò to owhé lọ gbè lẹ. Yé to yede debọdo-dego bo bẹ nuhe to họ̀nù lọ lẹ mẹ lẹpo tọ́n to gànhiho kleun de poun gblamẹ. Mẹlẹpo wẹ yọ́n pinpẹn alọgọ yetọn tọn. Viviana he yin dopo to mẹhe nọ nọ̀ owhé lọ gbè lẹ mẹ dọnsẹpọ asi Antonio tọn po dasin ayajẹ tọn lẹ po bo dọna ẹn dọmọ: “Mì jaale bo dọnudo mẹmẹsunnu mìtọn lẹ na mí​—mì gbọnvo taun!”

To gbétatò he mẹ singigọ lọ hẹnnugble te taun de mẹ, tòvi lẹ mọ whenue mẹdezejotọ Kunnudetọ lẹ to alọgọna mẹhe go nugbajẹmẹji lọ gando lẹ. Nuhe yé mọ lẹ yinuwado yé ji sọmọ bọ delẹ to yé mẹ ze yede jo nado gọalọ to azọ́n kọgbọ tọn lọ mẹ bo yí ayajẹ do hodo anademẹ he anadenanutọ pipli lọ tọn to nina lẹ.

Dawe de tin he owhé etọn gble taun bọ húnglintẹn etọn sọ gọ́ na ogbọ̀n. Awuji i to whenue e mọ bọ Kunnudetọ ṣinatọ̀n wazọ́n na gànhiho ẹnẹ madoalọte nado bẹ gbakija lẹ sẹ̀ sọn húnglintẹn lọ. Nado do pinpẹn-nutọn-yinyọnẹn etọn hia, e gbò delẹ to azọ́nwatọ lọ lẹ mẹ fán bo ze wekanhlanmẹ de do Intẹnẹt ji nado dọnudo yé na “alọgọ mayọnjlẹ” yetọn.

Kunnudetọ de dọmọ: “Mí gọalọna kọmẹnu mítọn susu he ma yin Kunnudetọ, ehe susu to yé mẹ ko tindo owhe 80 linlán. Dasin wayi do delẹ to yé mẹ whenue yé to nudọdo mí na alọgọ mítọn.” Kọmẹnu dopo he yin Katoliki akonka de dọna Kunnudetọ lọ lẹ dọ emi yọ́n pinpẹn alọgọ yetọn tọn taun bo wá yidogọ dọ: “E jiawu dọ dile etlẹ yindọ nuyise mítọn lẹ gbọnvo, mí gọalọna ode awetọ.” Dawe devo dọmọ: “E vẹna mi dọ dlapọn he mì nọ basi wá owhé mẹlẹ tọn gbè to Sẹgbe afọnnu lẹ kẹdẹ wẹ mẹsusu yí do yọ́n mì bọ e ma yin na alọ he mì nọ gọ́ namẹ.”