“E Vivi Hú Sinima”
To whemẹwhemẹ, Kunnudetọ Jehovah tọn lẹ nọ wleawuna video delẹ he nọ yin yiyizan to plidopọ yetọn lẹ ji. Glẹnsigbe mẹ wẹ suhugan video enẹlẹ tọn nọ yin awuwlena do jẹnukọn. Nawẹ mẹhe nọ basi plidopọ to ogbè kanweko susu devo lẹ mẹ gbọnvona Glẹnsigbe nọ wá mọnukunnujẹ video lọ lẹ mẹ gbọn lo? Na susu omẹ enẹlẹ tọn, hoyidokanji hodidọ he to video lọ mẹ lẹ tọn nọ yin awuwlena do ogbè yetọn mẹ nado diọtẹnna Glẹnsigbe tọn lọ. Nawẹ video he yin awuwlena do ogbè voovo mẹ lọ lẹ nọ yinuwado plidopọ-watọ lẹ ji gbọn?
Nuyiwadomẹji Video He Yin Lilẹdogbedevomẹ lọ lẹ Tọn
Pọ́n nuhe mẹhe ma yin Kunnudetọ delẹ dọ to whenue yé wá plidopọ daho mítọn lẹ to Mexique po Amérique centrale po:
“E ma yin dọ n’mọnukunnujẹ video lọ mẹ poun wẹ gba, amọ́ e taidi dọ n’to nujijọ lọ tẹnmẹ tlọlọ wẹ nkọ. E jẹ ahun ṣie mẹ tlọlọ.”—Plidopọ-watọ Popoluca-gbè tọn de to Veracruz, Mexique.
“E di na mi dọ otò ṣie titi mẹ wẹ n’te bo to hodọ hẹ họntọn vivẹ́ de nkọ. E vivi hú sinima na n’mọnukunnujẹ nuhe video lọ bẹhẹn lẹpo mẹ.”—Plidopọ-watọ Nahuatl-gbè tọn de to Nuevo León, Mexique.
“Whenue n’pọ́n video lọ lẹ to ogbè ṣie mẹ, e taidi dọ mẹhe to e mẹ lẹ to hodọna mi tlọlọ wẹ nkọ.”—Plidopọ-watọ Chol-gbè tọn de to Tabasco, Mexique.
“Titobasinanu ehe nọ dovivẹnu nado gọalọna mẹlẹ nado plọnnu to ogbè yetọn titi mẹ. Titobasinanu mọnkọ ma pé awe!”—Plidopọ-watọ Cakchiquel-gbè tọn de to Sololá, Guatemala.
To whenuena e yindọ Kunnudetọ Jehovah tọn lẹ ma nọ zọ́n azọ́n sinima-zọ́nwatọ kavi aihundatọ paa lẹ bo nọ saba basi hoyidokanji lẹ to fie to olá bo ma hunnukun sọmọ lẹ, nawẹ yé nọ wagbọn bọ hoyidokanji yetọn lẹ do nọ yọ́n sọmọ?
“Azọ́n He Nọ Hẹn Pekọ Wá Hugan”
To agọe, alahọ Kunnudetọ Jehovah tọn lẹ tọn Amérique centrale tọn deanana lẹdogbedevomẹ video plidopọ tọn lẹ do Espagne-gbè po akọgbè 38 po mẹ. Nudi mẹdezejotọ 2 500 wẹ gọalọ to azọ́n ehe mẹ. Hoyidokanjitọ lẹ po pipli lẹdogbedevomẹ-basitọ lẹ tọn po wleawuna hoyidokanji voovo lọ lẹ to wekantẹn alahọ tọn, azọ́nwatẹn lẹdogbedevomẹ tọn he to olá lẹ po nọtẹn devo lẹ po gbọn azọ́nwanu hoyidokanji tọn he gán yin zizepé lẹ yiyizan dali. To lẹndopọ mẹ, yé basi hoyidokanji lẹ to nọtẹn voovo 20 mẹ to Bélize, Guatemala, Honduras, Mexique po Panama po.
Hoyidokanji to wekantẹn alahọ Amérique centrale tọn
Azọ́nwanu hoyidokanji tọn he nọ yin zizepé lẹ yiyizan nọ biọ azọ́n sinsinyẹn wiwà po ayiha kinkan po. Nuyizan depope he tin-to-aimẹ, vlavo avọ̀-ṣinṣinyọn titli kavi adọzan (matelas) lẹ, wẹ nọ yin yiyizan nado wleawuna fie hoyidokanji lọ na yin bibasi te to aliho de mẹ bọ nudidọ devo lẹ ma na biọ e mẹ.
Susu mẹhe yin yiyizan nado hia adà voovo video lọ lẹ tọn do kanji lẹ tọn wẹ ma do alọnu sọmọ bo dona yí nususu do sanvọ́ nado dohún wá fie hoyidokanji lọ na yin bibasi te. Delẹ to yé mẹ zingbejizọnlin na gànhiho 14! Di apajlẹ, otọ́ de po visunnu etọn po zọ̀n afọ na nudi gànhiho ṣinatọ̀n whẹpo do jẹ fie hoyidokanji lọ na yin bibasi te.
Sọn ovu whenu wẹ Naomi ko nọ gọalọ to whẹndo etọn mẹ nado wleawuna fie hoyidokanji na yin bibasi te na ojlẹ gli lẹ. E flindọ: “Mí nọ yí jejejininọ do nọtepọn osẹ he mẹ hoyidokanji lọ na yin bibasi te. Baba ṣie nọ yí ede zan taun nado deanana tito lọ lẹpo. To whedelẹnu, iya ṣie nọ dà núdùdù na mẹdezejotọ diblayi 30.” Todin, Naomi lọsu yin mẹdezejotọ to azọ́nwatẹn lẹdogbedevomẹ tọn de to Mexique. E dọmọ: “Homẹ ṣie nọ hùn taun nado yí whenu ṣie do gọalọna mẹdevo lẹ nado sè owẹ̀n Biblu tọn to ogbè yetọn titi mẹ. Azọ́n he nọ hẹn pekọ wá hugan he ji n’gán lẹnnupọndo lọ die.”
Plidopọ daho Kunnudetọ Jehovah tọn lẹ tọn nọ yin bibasi to ofi voovo lẹ lẹdo aihọn pé to whemẹwhemẹ podọ mẹdepope wẹ sọgan wá. Pọ́n adà lọ PLIDOPỌ DAHO LẸ nado mọ nudọnamẹ dogọ.