Eyin a zín todohukanji ogbè he mẹ jw.org tin te lẹ tọn to weda ehe ji, a na mọdọ ogbè 300 linlán yin sislẹ do finẹ. Nọtẹn Intẹnẹt tọn devo depope ma ko tin to ogbè sọha enẹ mẹ!

Nawẹ sọha enẹ yiaga hú sọha ogbè he mẹ nọtẹn he tlẹ yin yinyọnẹn ganji lẹ tin te tọn gbọn? To juillet 2013, ogbè ṣidopo poun mẹ wẹ nọtẹn Intẹnẹt tọn Plidopọ Akọta lẹ tọn tin te. Nọtẹn Intẹnẹt tọn Europa he yin nọtẹn Pipli Europe tọn tin to ogbè 24 mẹ. Google tin to ogbè 71 mẹ, bọ Wikipedia tin to ogbè 287 mẹ.

E nọ biọ azọ́nwiwa na gànhiho susu nado basi lẹdogbedevomẹ nọtẹn Intẹnẹt tọn de tọn do ogbè 300 linlán mẹ! Suhugan azọ́n enẹ tọn nọ yin wiwà gbọn Kunnudetọ Jehovah tọn kanweko susu lẹ dali lẹdo aihọn pé, na yé jlo na hẹn pipà wá na Jehovah wutu. Yé nọ wazọ́n to pipli he yin tito-basina ganji voovo mẹ sọgbe hẹ ogbè dopodopo, bo nọ yí azọ́nyinyọnẹn yetọn do lilẹ́ nudọnamẹ he to glẹnsigbe mẹ lẹ do ogbè devo mẹ.

JW.ORG bẹ weda nudọnamẹ tọn susu he yin lilẹdo ogbè 300 linlán mẹ lẹ hẹn. Enẹwutu, sọha weda lẹpo tọn to nọtẹn lọ ji sù taun, e lán to 200 000 ji!

JW.ORG tin to ogbè susu mẹ, podọ mẹsusu wẹ nọ yì e ji. Azọ́nwhé Alexa, he nọ dindona nọtẹn Intẹnẹt tọn lẹ lẹdo aihọn pé nado pọ́n dehe ji mẹsusu nọ yawu yì lẹ do nugbo enẹ hia. To dodinnanu azọ́nwhé lọ tọn godo, e basi todohukanji nọtẹn Intẹnẹt tọn 87 000 tọn to adà etọn “Sinsẹ̀n po Gbigbọnu lẹ po” glọ. Adà ehe bẹ nọtẹn Intẹnẹt tọn sinsẹ̀n daho aihọn tọn lẹ tọn hẹn gọna zinjẹgbonutọ owe sinsẹ̀n tọn lẹ po titobasinanu mọnkọ devo lẹ po tọn. To juillet 2013, jw.org wẹ tin to otẹn awetọ mẹ to todohukanji lọ mẹ! Nọtẹn ajọwiwa tọn de he nọ bẹ lẹdogbedevomẹ Biblu tọn voovo lẹ do Intẹnẹt ji wẹ tin to otẹn tintan mẹ.

To octobre 2013, gbẹtọ 890 000 linlán wẹ nọ yì jw.org ji to azán dopodopo ji. Mí na zindonukọn nado nọ hẹn nudọnamẹ yọ́n-na-yizan he tin to Biblu mẹ lẹ tin-to-aimẹ na gbẹtọ lẹ vọnu to filẹpo.