La Ceiba wẹ yè ji mi te to Honduras, podọ yẹn wẹ yin pòdevi bosọ yin sunnu dopo gee to ovi atọ́n mẹjitọ ṣie lẹ tọn mẹ. Yẹnṣo wẹ yin tókunọ to whẹndo lọ mẹ. Lẹdo he mẹ whẹndo mítọn nọ ylan taun podọ mí sọ jẹhẹ́n taun. Nulẹ sọ ylan dogọ whenue baba ṣie kú to azọ́nmẹ to whenue n’do nudi owhe ẹnẹ.

 Iya ṣie nọ wà nue go e pé lẹpo nado penukundo yẹn po mẹdaho ṣie lẹ po go, amọ́ e ma nọ do akuẹ to whelẹponu nado họ̀ avọ̀ na mi. Enẹwutu, eyin jikun to jija, avivọ nọ hù mi taun, na n’ma nọ do avivọwu he n’na do wutu.

 Lee n’to whinwhẹ́n, n’plọn tókunọ-gbè Honduras tọn LESHO, enẹ zọ́n bọ n’gán nọ dọho hẹ tókunọ devo lẹ. Iya ṣie po mẹdaho ṣie lẹ po ma sè LESHO, enẹwutu alọ kleun janwẹ yé gán bayi do dọho hẹ mi. Amọ́, iya ṣie yiwanna mi bo ma nọ jlo dọ nuylankan de ni jọ do go e. Iya ṣie yí alọ kleun he e nọ bayi lọ do gbẹna mi dọ, na ma nọ nuahàn sinsinyẹn zẹjlẹgo kavi nù-azọ̀ blo. Enẹ zọ́n bọ n’ma doalọ to aṣa enẹlẹ depope mẹ.

 Dee n’gbẹ́ to pẹvi, iya ṣie nọ plan mi yì Ṣọṣi Katoliki tọn, amọ́ n’ma nọ sè nude na mẹde ma nọ segbè na mi do tókunọ-gbè mẹ wutu. Ṣọṣi yìyì wá ṣiapọna mi whenue n’do owhe ao bọ n’masọ nọ yì ba. Amọ́, n’gbẹ́ jlo na yọ́n nususu gando Jiwheyẹwhe go.

 Whenue n’do owhe 23 to 1999, n’mọ nawe de he wá sọn États-Unis bo nọ yì ṣọṣi evangelisti tọn. E na mi owe de he mẹ otàn Biblu tọn lẹ te bosọ plọn mi tókunọ-gbè Amelika tọn. N’yiwanna nuhe n’plọn gando Biblu go lẹ sọmọ bọ n’de nado lẹzun sinsẹ̀ngán. Enẹwutu, n’sẹtẹn yì Porto Rico nado yì wehọmẹ he nọ plọnazọ́n Klistiani tókunọ lẹ. Whenue n’lẹkọwa La Ceiba to 2002, họntọn ṣie delẹ gọalọna mi bọ n’do ṣọsi tókunọ lẹ tọn ai. Patricia yin dopo to họntọn ehelẹ mẹ, podọ e wá lẹzun asi ṣie.

 Yẹn wẹ yin sinsẹ̀ngán ṣọṣi lọ tọn bo nọ dọyẹwheho to tókunọ-gbè LESHO mẹ, n’sọ nọ do yẹdide otàn he to Biblu mẹ lẹ tọn hia bosọ nọ dọhodo yé ji, na tókunọ lẹ nido mọnukunnujẹemẹ. N’nọ yì pọ́n tókunọ he to otò he to yakẹ lẹ mẹ bo nọ na yé tuli bosọ nọ gọalọ nado didẹ nuhahun yetọn lẹ. N’tlẹ sọ tọ́nwhẹ̀n yì États-Unis po Zambie po. Amọ́ nado dọ hójọhó, n’ma yọ́n onú kaka de gando Biblu go. Nue yè plọn mi po nue n’yọnẹn gando yẹdide lọ lẹ go po, wẹ n’nọ vọ́ plọnmẹ poun. Nugbo lọ wẹ yindọ, kanbiọ ṣie lẹ sù hugan gblọndo ṣie lẹ.

 To gbèdopo, delẹ to mẹhe nọ wá ṣọṣi ṣie lẹ mẹ jẹ lalo fúnfún pé gando go e ji. Yé dọ dọ n’yin ahànnumunọ bo masọ to gbèji na asi e. E vẹna mi taun bọ n’gblehomẹ. E ma dẹn bọ yẹn po Patricia po jo ṣọṣi lọ do.

 Kunnudetọ Jehovah tọn lẹ nọ saba wá yẹn po Patricia po dè, amọ́ mí ma nọ jlo na sè ohó yetọn. Whenue mí jo ṣọṣi mítọn do godo, Patricia yigbe dọ emi na plọn Biblu hẹ Kunnudetọ asu po asi po de he nọ yin Thomas po Liccy po. E vivi na mi taun, na yé ma yin tókunọ bo ka sè tókunọ-gbè. Enẹwutu, e ma dẹn bọ yẹnsu wá gọna Patricia to nupinplọn lọ mẹ.

 Mí zan video tókunọ-gbè Amelika tọn do plọnnu na osun delẹ. Amọ́, mí wá jo Biblu pinplọn do whenue họntọn mítọn delẹ mọhodọdo Kunnudetọ Jehovah tọn lẹ go dọ, hodotọ gbẹtọ tọn wẹ yé yin. Thomas na mi kunnudenu delẹ nado dohia mi dọ Kunnudetọ Jehovah tọn lẹ ma nọ hodo gbẹtọ, amọ́ n’ma yí i sè.

 To osun delẹ godo, apọṣi Patricia taun bọ e hodẹ̀ hlan Jiwheyẹwhe dọ ni sẹ́ Kunnudetọ Jehovah tọn lẹ do emi. Ojlẹ kleun de godo, kọmẹnu mítọn de he yin Kunnudetọ Jehovah tọn wá Patricia dè bo dọ dọ emi na dọna Liccy dọ ni wá e dè. Họntọn dagbe de wẹ Liccy yin na ẹn. Osẹ lẹpo mẹ wẹ e nọ wá Patricia dè bo nọ na ẹn tuli bosọ nọ plọn Biblu hẹ ẹ. Amọ́, n’gbẹ́ do ayihaawe gando Kunnudetọ lẹ go.

 To 2012, Kunnudetọ Jehovah tọn lẹ bayi nujijla vonọtaun de bo do video alọnuwe pẹvi lọ Be Hiẹ Jlo Na Yọ́n Nugbo lọ Ya? tọn hia to tókunọ-gbè LESHO mẹ. Liccy na mí video lọ dopo. Whenue n’pọ́n video lọ, e paṣa mi nado mọdọ susu to nue n’nọ plọn mẹlẹ mẹ, taidi olọnzomẹ po alindọn jọmaku po ma to Biblu mẹ.

 To osẹ he bọdego mẹ, n’yì Plitẹnhọ Ahọluduta tọn Kunnudetọ Jehovah tọn lẹ tọn mẹ bo dọho na Thomas. N’dọna ẹn dọ n’jlo na plọn nugbo he to Biblu mẹ tókunọ lẹ, amọ́ e ma yin nado yin dopo to Kunnudetọ Jehovah tọn lẹ mẹ. Nue lẹn n’te wẹ nado do ṣọṣi yọyọ de ai na tókunọ lẹ dovo. Thomas dọnudo mi na ojlo dagbe ṣie bo wá do Efesunu lẹ 4:5 hia mi, he dohia dọ agun Klistiani nugbo tọn lẹ dona to kọndopọ mẹ.

 Thomas sọ na mi video lọ Kunnudetọ Jehovah Tọn Lẹ—Azọ́n Yise Tọn Lẹ, Apa 1: Tintọ́n sọn Zinvlu Mẹ to tókunọ-gbè Amelika tọn mẹ. Video lọ dohia dọ sunnu delẹ yiagbọji bo hia Biblu nado yọ́n nugbo lọ gando nue sinsẹ̀n lẹ nọ plọnmẹ go. Dee n’pọ́n video lọ fó, n’kọngbedopọ hẹ nue sunnu lọ lẹ mọ. Yẹnsu to nugbo lọ dín taidi yelọsu. Video lọ hẹn mi kudeji dọ Kunnudetọ lẹ nọ plọnmẹ nugbo lọ, na Biblu kẹdẹ ji wẹ nuyise yetọn lẹ sinai do. Enẹwutu, n’gọ̀ Biblu pinplọn bẹ, podọ to 2014 yẹn po Patricia po yí baptẹm bo lẹzun Kunnudetọ Jehovah tọn.

 N’yiwanna agun Kunnudetọ Jehovah tọn lẹ tọn, na walọ yetọn wé taidi lee Jiwheyẹwhe yin mẹwiwe do. Ohó gbigble ma nọ tọ́n sọn onù yetọn mẹ, yé sọ nọ wà dagbe na mẹdevo lẹ. Yé nọ dín jijọho bosọ nọ na tuli ode awetọ. Kunnudetọ lẹ to kọndopọ mẹ, podọ yemẹpo wẹ nọ plọnmẹ nugbo Biblu tọn dopolọ mahopọnna otò he mẹ yé te kavi ogbè he yé nọ do.

 N’yiwanna nue n’plọn to Biblu mẹ lẹ taun. Di apajlẹ, n’plọn dọ Jehovah wẹ yin Jiwheyẹwhe Ganhunupotọ, podọ Nupojipetọ wẹkẹ lọ tọn. E yiwanna tókunọ po mẹhe ma yin tókunọ lẹ po. N’yọ́n pinpẹn owanyi he Jiwheyẹwhe do na mi tọn. N’sọ plọn dọ aigba na wá yọnwhanpẹ bo na lẹzun paladisi, podọ mí na duvivi ogbẹ̀ tọn kakadoi bọ agbasa mítọn nasọ to jogún-jogún. N’to jejeji nado mọ whenue onú enẹlẹ na jọ.

 Yẹn po Patricia po yiwanna hodidọ na tókunọ lẹ gando Biblu go. Todin, mí nọ plọn Biblu hẹ delẹ to mẹhe nọ wá ṣọṣi mítọn dai lẹ mẹ. Kanbiọ susu wẹ n’do gando nue n’nọ plọnmẹ lẹ go whenue n’gbẹ́ yin sinsẹ̀ngán, amọ́ e masọ yin mọ todin ba. To godo mẹ, n’wá mọ gblọndo na kanbiọ ṣie lẹ, na n’plọn Biblu hẹ Kunnudetọ Jehovah tọn lẹ wutu.