N’yin jiji to San Juan Chancalaito, yèdọ tòpẹvi de he tin to ayimatẹn Chiapas tọn mẹ, to Mexique. Whẹndo ṣie yin Chol-nu, enẹ wẹ akọ̀ de he wá sọn kúnkan Maya lẹ tọn mẹ. Ovi 12 wẹ mẹjitọ ṣie lẹ tindo, podọ yẹn wẹ yin atọ́ntọ. Whenue n’to pẹvi, yẹn po nọvi ṣie lẹ po nọ plọn Biblu hẹ Kunnudetọ Jehovah tọn lẹ. E blawu dọ n’ma yí ayinamẹ Biblu tọn lẹ do yizan mẹ to jọja whenu ṣie.

 To whenue n’tindo owhe 13, n’nọ zan amasin adínọ lẹ bosọ nọ jẹajo do mẹlẹ. Ojlẹ enẹ mẹ wẹ n’tọ́n sọn whégbè te bo nọ to yìyì sọn fide jẹ fide. Whenue n’tindo owhe 16, n’jẹ azọ́nwa ji to ogle marijuana tọn de mẹ. N’nọ finẹ na nudi owhe dopo bọ to zánmẹ gbèdopo he mí to agbàn marijuana tọn daho de kùn jei gbọn bato mẹ, ogbẹ́ amasin adínọ sàtọ lẹ tọn devo he sọawhànnu taun bo to agbàwhlẹn hẹ mí de jẹ sòdedo mí ji. N’lọ́n biọ tọ̀ mẹ nado họ̀ngán sọn sòpẹ́n yetọn si bo lìnsin yì fidindẹn whẹpo do tọ́n. Enẹgodo, n’họnyi États-Unis.

 To États-Unis, n’zindonukọn to amasin adínọ lẹ sisà mẹ bo wá tlọ biọ nuhahun susu mẹ. Whenue n’tindo owhe 19, n’yin wiwle do gànmẹ, na n’hùwhẹ ajojijẹ po tintẹnpọn nado hùmẹ po tọn wutu. To gànpamẹ, n’kọnawudopọ hẹ jaguda-gbẹ́ de bo doalọ to nuyiwa danuwiwa sinsinyẹn tọn devo lẹ mẹ dogọ. Enẹwutu, ogán gànpa lọ tọn lẹ diọtẹnna mi yì gànpa otò tọn he nọ yin hihọ́-basina taun de mẹ to Lewisburg, to Pennsylvanie.

 To gànpa Lewisburg tọn lọ mẹ, walọ ylankan ṣie lẹ sọ vantan dogọ. Na n’tindo nukinkan jaguda-gbẹ́ he mẹ n’nọ to gànpa diẹ mẹ lọ tọn to agbasago wutu, n’vọ́ awukọndopọ hẹ jaguda-gbẹ́ dopolọ to gànpa otò tọn lọ mẹ. N’wá lẹzun danuwatọ penjege bo nọ to avùnho sinsinyẹn hẹ mẹlẹ poun. To gbèdopo, n’do mahẹ to avùnhiho jaguda-gbẹ́ lẹ tọn de mẹ to awánu gànpa lọ tọn mẹ. Mí hò míde gli, gbọn opò bọlu hihò tọn po ogán pinpẹn he yè nọ ze do na huhlọn agbasakàn lẹ po yiyizan dali. Nado dá avùn lọ, gàntọ-ṣọ́tọ lẹ fún gaz he nọ fiẹ nukun taun de do ṣẹnṣẹn mítọn. Enẹgodo, ogán gànpa lọ tọn lẹ sú mi do gànhọ ṣokẹdẹninọ tọn gàntọ he nọ wadanu do hatọ yetọn lẹ tọn de mẹ. N’nọ yawu gblehomẹ taun bo nọ yí hogbe gbigble lẹ zan. E nọ bọawuna mi nado hò mẹlẹ. Na nugbo tọn, n’nọ mọ awuvivi to e mẹ. Walọ ylankan ṣie masọ nọ vẹna mi.

 Diblayin azán lọ blebu wẹ n’nọ yizan to gànhọ ṣokẹdẹninọ tọn gàntọ he nọ wadanu do hatọ yetọn lẹ tọn lọ mẹ, enẹwutu n’jẹ Biblu hia ji ma nado doayi e go dọ whenu to yìyì. To nukọn mẹ, gàntọ-ṣọ́tọ de na mi owe lọ Hiẹ Sọgan Nọgbẹ̀ Kakadoi to Paladisi mẹ to Aigba Ji. a Dile n’to owe sinai do Biblu ji enẹ hia, n’flin susu nuhe n’plọn to whenue n’plọn Biblu hẹ Kunnudetọ lẹ to ovu whenu lẹ tọn. To enẹgodo, e nọ blawuna mi nado mọ obá he mẹ n’ko tlọ dee do danuwiwa mẹ jẹ. N’sọ lẹnnupọndo whẹndo ṣie ji. Na nọviyọnnu ṣie awe ko lẹzun Kunnudetọ Jehovah tọn lẹ wutu, n’nọ dọna dee dọ, ‘Yé na nọgbẹ̀ kakadoi.’ Enẹgodo, n’nọ kanse dee dọ, ‘Naegbọn yẹnlọsu ma na nọgbẹ̀ kakadoi?’ Whenẹnu wẹ n’magbe mlẹnmlẹn nado diọ.

 Amọ́, n’yọnẹn dọ n’do hudo alọgọ tọn nado diọ. Enẹwutu, n’hodẹ̀ hlan Jehovah Jiwheyẹwhe jẹnukọn bo vẹ̀ ẹ dọ ni gọalọna mi. Enẹgodo, n’kanwehlan alahọ Kunnudetọ Jehovah tọn lẹ tọn États-Unis tọn bo biọ plọnmẹ Biblu de. Alahọ lọ basi tito na hagbẹ agun he sẹpọ mi de tọn nido wá dla mi pọ́n. To ojlẹ lọ mẹ, hẹnnumẹ ṣie lẹ kẹdẹ wẹ sọgan dla mi pọ́n, enẹwutu Kunnudetọ he to agun lọ mẹ de jẹ wekanhlan mi ji nado na mi tuli bosọ nọ do owe sinai do Biblu ji lẹ hlan mi bọ ehe yidogọna gbemima ṣie nado diọ.

 Dopo to afọdide titengbe he n’ze nado diọ lẹ mẹ wẹ nado tọ́n sọn jaguda-gbẹ́ he mẹ n’ko nọ na owhe susu lọ mẹ. Ogán jaguda-gbẹ́ lọ tọn lọsu tin to gànhọ ṣokẹdẹninọ tọn he mẹ n’tin te nkọ de mẹ, enẹwutu n’dọnsẹpọ ẹ to ojlẹ gbọjẹyíyí kleun tọn de whenu bo dọna ẹn dọ n’jlo na lẹzun dopo to Kunnudetọ Jehovah tọn lẹ mẹ. E paṣa mi taun dọ e dọna mi dọ: “Eyin nugbo dọ ján a te, n’yigbena. N’ma gán glọnalina Jiwheyẹwhe sinsẹ̀n. Amọ́, eyin nado tọ́n sọn jaguda-gbẹ́ lọ mẹ poun wutu wẹ, hiẹ lọsu yọ́n nuhe na jẹgodona.”

 To owhe awe he bọdego lẹ mẹ, mẹhe nọ wazọ́n to gànpa lọ mẹ lẹ doayi e go dọ gbẹtọ-yinyin ṣie ko diọ. Taidi kọdetọn de, yé jẹ homẹdagbe dohia mi ji. Di apajlẹ, gàntọ-ṣọ́tọ lẹ masọ nọ do pẹ́npẹ́ alọ na mi ba to whenue yé jlo na plan mi yì awulẹpa mẹ. Dopo to gàntọ-ṣọ́tọ lọ lẹ mẹ tlẹ dọnsẹpọ mi bo na mi tuli nado zindonukọn to diọdo he basi n’te lẹ mẹ. Na nugbo tọn, ogán gànpa lọ tọn lẹ diọtẹnna mi yì adà gànpa lọ tọn devo he mẹ yè ma nọ ṣọ́ mẹ te sọmọ de mẹ, to owhe godo tọn he n’yizan to gànpamẹ lọ whenu. To 2004, to whenue n’ko nọ gànmẹ na owhe ao godo, n’yin tuntundote bọ yè lẹkọna mi yì Mexique to mọto gànpa lọ tọn de mẹ.

 Ojlẹ vude to whenue n’jẹ Mexique godo, n’dín Plitẹnhọ Ahọluduta tọn Kunnudetọ Jehovah tọn lẹ tọn de mọ. Awù gàntọ tọn ṣie wẹ n’do yì opli whla tintan—yèdọ awù dopo gee he pọnte to asi e. Mahopọnna awusọhia ṣie, Kunnudetọ lọ lẹ yí zohunhun do dokuavọna mi. Homẹdagbe yetọn zọ́n bọ n’mọdọ Klistiani nugbo lẹ ṣẹnṣẹn wẹ n’te. (Johanu 13:35) To opli enẹ ji, mẹho agun tọn lẹ basi tito na mi nado jẹ Biblu plọn ji. To owhe dopo godo, yèdọ to 3 septembre 2005, n’yí baptẹm bo lẹzun dopo to Kunnudetọ Jehovah tọn lẹ mẹ.

 To Janvier 2007, n’biọ sinsẹ̀nzọn whenu-gigọ́ tọn mẹ bo nọ yí gànhiho 70 zan to osun dopodopo mẹ nado plọn Biblu mẹdevo lẹ. To 2011, n’yí gbedewema Wehọmẹ Biblu Pinplọn Tọn Na Mẹmẹsunnu Tlẹnnọ Lẹ tọn (ehe nọ yin yiylọ todin dọ Wehọmẹ Wẹndagbe-Jlatọ Ahọluduta lọ tọn lẹ tọn). Wehọmẹ ehe gọalọna mi taun nado hẹn azọ́ndenamẹ ṣie lẹ di to agun mẹ.

 To 2013, n’wlealọ hẹ asi vivẹ́ ṣie, Pilar. E nọ yí fànfún do dọna mi dọ emi ma gán yí nuhe n’dọna ẹn gando gbẹzan he n’zan wayi go lẹ sè. N’ma lẹkọ do walọ ylankan he n’zan wayi lẹ kọ̀n gbede. Yẹn po asi ṣie po yise dọ gbẹtọ-yinyin ṣie dintọn dohia dọ Biblu dohuhlọn nado diọ gbẹzan mẹtọn nugbonugbo.—Lomunu lẹ 12:2.

 N’nọ mọdọ hogbe he Jesu yizan to Luku 19:10 mẹ lẹ gando go e tlọlọ. E dọ to finẹ dọ: “[Yẹn] wá nado dín podọ nado whlẹn mẹhe bu lẹ gán.” N’masọ nọ tindo numọtolanmẹ lọ dọ n’to alibu to gbẹ̀mẹ ba. Mọjanwẹ n’masọ nọ gbleawuna mẹlẹ ba do niyẹn. Biblu ko zọ́n bọ n’to vivi lẹndai dagbe de tọn dù to gbẹ̀mẹ, enẹ wẹ nado nọ jijọho mẹ hẹ mẹdevo lẹ, podọ hú popolẹpo nado tindo haṣinṣan dagbe de hẹ Mẹdatọ ṣie Jehovah.