N’yin jiji to tòdaho Calgary tọn mẹ, he tin to lẹdo Canada tọn he nọ yin Alberta mẹ. Whenue n’to ovu wẹ mẹjitọ ṣie lẹ gbẹ́ yede, bọ yẹn po onọ̀ ṣie po sẹtẹn jẹ owhé mẹjitọ etọn lẹ tọn gbè. Mẹjitọ daho ṣie ehelẹ yiwanna yẹn po onọ̀ ṣie po taun, bọ n’sọ do ayajẹ ganji to ovu whenu ṣie. Ojlẹ jijọho tọn enẹlẹ finflin nọ hẹn homẹ ṣie hùn taun.

 Dee n’do owhe ṣinawe, gbẹzan ṣie ylan pete to whenue onọ̀ ṣie vọ́ alọwle hẹ otọ́ ṣie bọ mí sẹtẹn jẹ tòdaho Saint Louis tọn mẹ, ehe tin to lẹdo Missouri tọn mẹ to États-Unis. E ma dẹn bọ n’doayi obá he mẹ otọ́ ṣie sọgan ylanhùn jẹ go. Di apajlẹ, azán tintan he gbè n’yì wehọmẹ yọyọ he n’yin didohlan bo lẹkọ, e doayi e go dọ wehọmẹvigbẹ́ delẹ vánnukundo ji e bo tafu mi bọ n’ma tẹ́ avùn do na yé. Adi ṣie do e taun sọmọ bọ e bọnúdona mi gli hú nue hagbẹ wehọmẹ tọn lọ lẹ zọ̀n do mi! Linlẹn avùnlọyiyina dee tọn he otọ́ ṣie do dó ahun ṣie mẹ enẹ sisẹ́ mi nado hoavùn whla tintan to whenue n’gbẹ́ to owhe ṣinawe poun tindo.

 Adánjijẹ otọ́ ṣie tọn nọ do homẹgble na onọ̀ ṣie, bọ yé omẹ awe lẹ nọ to jlẹ̀dọ whẹwhẹ po awhá po. N’jẹ amasin adínọ po ahàn sinsinyẹn po nù ji zẹjlẹgo whenue n’do owhe 11. Hùnyinylan ṣie jẹ sinsinyẹn ji dogọ bọ n’nọ saba hoavùn hẹ mẹlẹ to ali lẹ ji. To ojlẹ he mẹ n’fó wehọmẹ daho bo yí gbedewema ṣie, danuwiwa ko hẹn mi zun nudevo pete niyẹn.

 Whenue n’do owhe 18, n’ze yinkọ dai nado biọ Awhànpa Otọ̀ Ji Tọn États-Unis tọn mẹ. Azọ́nplọnmẹ he n’mọyi to finẹ vọ́ huhlọnna hùnyinylan ṣie dogọ, na yè plọn mi aliho azọ́nyinyọnẹn tọn delẹ nado hùmẹ. To owhe atọ́n godo, n’tlọ́n awhànzọ́n mẹ, bo jẹ nuplọn ji gando linlẹn po nuyiwa gbẹtọ tọn lẹ po go, na n’to linlẹn nado wá wazọ́n to Azọ́nwatẹn Agbegbe Tọn He Nọ Dindona Whẹho lẹ wutu. N’bẹ wepinplọn wehọmẹ alavọ tọn jẹeji to États-Unis, bo wá lẹkọyi Canada nado zindonukọn to dọ́n.

 To wehọmẹ alavọ tọn lọ, nue plọn n’te gando gbẹtọ lẹ gọna linlẹn po nuyiwa yetọn po go lẹ hẹn mi jẹflumẹ pete. E wá di na mi dọ gbẹtọ lẹ nọ yigo, dọ gbẹ̀mẹ ma vó nude podọ dọ nuhahun gbẹtọvi tọn lẹ ma do pọngbọ wẹ nkọ. N’masọ ze todido ṣie do gbẹtọ lẹ mẹ dọ yé gán hẹn ninọmẹ aihọn ehe tọn pọnte ba.

  Na n’mọdọ ogbẹ̀ ma do lẹndai de wutu, n’wá pò na ahànnumu, amasin adínọ ṣiṣizan, gọna wezundido to akuẹ godo po fẹnnuwiwa zanhẹmẹ tọn po. N’nọ to agọ́-ji agọ́-ji gbọn poun, bo nọ to gbẹdu hẹ yọnnu voovo lẹ. Awhàn-zọnwiwa hẹn mi zun gbẹtọ adántọ dogọ, bọ n’nọ to avùnho pé mapote. N’do linlẹn ṣie titi gando nue yọ́n po nue ylan po go bo nọ fónú hẹ mẹdepope he n’lẹndọ yé wanu jẹagọdo mẹdevo lẹ. Amọ́ nado dọ hójọhó, na n’ko lẹzun afanumẹ na danuwiwa pete wutu wẹ.

 To gbèdopo he yẹn po họntọn de po ko nù amasin adínọ bo to vẹjẹvẹjẹ to ohọ̀ doglọ tọn de mẹ to owhé ṣie gbè bosọ to wedé do aji he mí na sẹ̀ nado do agbàn amasin adínọ he mí jlo na sà tọn hlan go, wẹ họntọn ṣie lọ kanse mi eyin n’do yise to Jiwheyẹwhe mẹ. N’gblọn dọ, “Eyin Jiwheyẹwhe wẹ nọ hẹn yajiji wá ogbẹ̀ lọ mẹ, be n’ma tlẹ dín na yọ́n nudepope gando ewọ go!” To wunkẹngbe, enẹ wẹ azán tintan he gbè n’bẹ agbasazọ́n yọyọ de jẹeji, azọ́nwatọgbẹ́ de he yin dopo to Kunnudetọ Jehovah tọn lẹ mẹ kanse mi dọ, “Be a lẹndọ Jiwheyẹwhe wẹ mí na dowhẹ na yajiji he to aihọn lọ mẹ lẹ ya?” Kanbiọ etọn paṣa mi taun, na osọ tó fi wẹ yẹn po họntọn ṣie diẹ po dọhodo whẹho enẹ ji, enẹwutu n’do ojlo taun to nue e kanse mi mẹ. To osun ṣidopo he bọdego lẹ mẹ, mí tindo hodọdopọ susu, podọ e yí Biblu zan do na mi gblọndo na kanbiọ gbẹ̀mẹ tọn he ko nọ dotukla mi hugan delẹ.

 Asi-mọdo-aliji ṣie he po yẹn po nọ nọpọ́ to ojlẹ lọ mẹ ma nọ jlo dọ n’ma dọho hẹ emi do nue plọn n’te lẹ ji. To sẹgbe dopo, n’dọna ẹn dọ n’basi oylọna Kunnudetọ lẹ nado wá plọn Biblu hẹ mí to owhé mítọn gbè. To wunkẹngbe, whenue n’gọ̀ sọn azọ́nmẹ, n’wá ba ẹ pò to whégbè. E ko bẹ agbàn etọn lẹpo bo yì jo mi do. N’sọ tọ́n jẹ kọho bo viavi. N’hodẹ̀ hlan Jiwheyẹwhe bo vẹ̀ ẹ nado gọalọna mi. Gbenẹgbe wẹ whla tintan he n’zan yinkọ Jiwheyẹwhe tọn titi lọ Jehovah do hodẹ̀.—Salmu lẹ 83:18.

 To azán awe godo, asu po asi po de he yin Kunnudetọ lẹ wá bayi plọnmẹ Biblu na mi whla tintan. To yìyì yetọn godo, n’zindonukọn nado hia owe oplọn tọn lọ Hiẹ Sọgan Nọgbẹ̀ Kakadoi to Paladisi mẹ to Aigba Ji, podọ n’hia ẹ fó to ozán enẹ mẹ a. Nue n’plọn gando Jehovah Jiwheyẹwhe po Visunnu etọn Jesu Klisti po go yinuwado ji e sisosiso. N’plọn dọ Jehovah nọ vẹawumẹ podọ e nọ mọ awufiẹsa eyin mí to yaji. (Isaia 63:9) Nue sọ whàn mi hugan wẹ owanyi Jiwheyẹwhe tọn na mi gọna avọ́sinsan he Visunnu etọn basi do ota ṣie mẹ. (1 Johanu 4:10) E wá họnwun na mi dọ Jehovah ko fahomẹ hẹ mi taun, “na e ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) N’mọ to dee mẹ dọ Jehovah wẹ to dindọn mi nado wá yọ́n ewọ.—Johanu 6:44.

 N’jẹ opli agun tọn lẹ yì ji to osẹ enẹ mẹ hadopo. Oda gblẹlẹ wẹ to ota na mi, bọ n’sọ do tómẹnu lẹ, podọ awusọhia ṣie gán hẹnmẹjọsi, etomọṣo Kunnudetọ lẹ yí mi ganji di dọ hagbẹ whẹndo tọn yetọn he yé bapò e dẹn de wẹ n’yin nkọ. Yé yinuwa di Klistiani nugbo lẹ. Numọtolanmẹ ayajẹ tọn he n’do to mẹhe ṣẹnṣẹn n’te todin lẹ taidi dehe n’do whenue n’topọ hẹ mẹjitọ ṣie daho lẹ, bo tlẹ sọ yọ́n hú i.

 To ojlẹ vude godo, nue plọn n’te lẹ jẹ gbẹzan ṣie diọ ji. N’pà oda ṣie lẹ, dealọ sọn walọ fẹnnuwiwa zanhẹmẹ tọn lẹ mẹ, bosọ doalọtena amasin adínọ po ahàn sinsinyẹn po ṣiṣizan. (1 Kọlintinu lẹ 6:9, 10; 11:14) N’jlo na hẹn homẹhun Jehovah. Enẹwutu eyin n’plọn dọ ewọ gbẹwanna jijọ de he n’tindo, n’ma nọ dín whẹjijọ gbede nado zindonukọn to e mẹ. Kakatimọ, e nọ saba vẹna mi yì ahun mẹ. N’nọ dọna dee dọ, ‘N’ma nasọ wàmọ gbede ba.’ Podọ madọngbàn, n’nọ tẹnpọn nado vọ́ linlẹn po nuyiwa ṣie lẹ po jlado. Taidi kọdetọn de, e ma dẹn bọ n’jẹ mimọ ji dọ nulẹ wiwà dile Jehovah jlo do nọ hẹn ale wá. To 29 juillet 1989, enẹ wẹ osun ṣidopo to whenue plọnmẹ Biblu ṣie bẹjẹeji te godo, n’yí baptẹm bo lẹzun dopo to Kunnudetọ Jehovah tọn lẹ mẹ.

 Biblu gọalọna mi nado diọ jijọ he n’do dai lẹ. To dai, n’nọ saba dónusin eyin n’penú hẹ mẹhe yinuwa to aliho he ma jẹ mẹ de. Amọ́ todin, n’to vivẹnudo taun nado “nọ nọ̀ jijọho mẹ hẹ gbẹtọ lẹpo.” (Lomunu lẹ 12:18) N’yọnẹn dọ e ma yin huhlọn ṣie, Jehovah wẹ na dopẹna, dọ e yí huhlọn he Ohó po gbigbọ wiwe etọn po tindo zan do diọ mi.—Galatianu lẹ 5:22, 23; Heblu lẹ 4:12.

 Kakati nado to afanumẹ yin na amasin adínọ lẹ, danuwiwa, po ojlo fẹnnuwiwa tọn lẹ po, n’to vivẹnudo todin nado nọ hẹn homẹhun Jehovah Jiwheyẹwhe podọ nado yí gbẹzan ṣie zan na ẹn hugan. Ehe bẹ alọgigọna mẹdevo lẹ nado wá yọ́n ewọ hẹn. Owhe vude to baptẹm ṣie godo, n’sẹtẹn yì awà devo pete aigba tọn ji nado nọgodona azọ́n yẹwhehodidọ tọn to fie nuhudo wẹnlatọ tọn sù te lẹ. To owhe lẹ gblamẹ, homẹ ṣie hùn taun dọ yẹnlọsu ko gọalọna mẹsusu nado plọn Biblu bosọ mọ lehe Biblu ko hẹn gbẹzan yetọn pọnte do ga. Podọ ayajẹnu wẹ e yin na mi dọ onọ̀ ṣie lọsu lẹzun Kunnudetọ Jehovah tọn de—bọ dopo to nue whàn ẹn nado wàmọ lẹ mẹ wẹ diọdo he e doayi e go dọ n’bayi bo jo pọndohlan po jijọ ṣie dai tọn lẹ po do lẹ.

 To 1999, to Salvador, n’yí gbedewema to wehomẹ de he nọ yin yiylọ todin dọ Wehọmẹ Wẹndagbe-Jlatọ Ahọluduta lọ Tọn lẹ Tọn. Azọ́nplọnmẹ he n’mọyi to wehọmẹ enẹ gọalọna mi nado nọ ze apajlẹ dagbe dai to azọ́n wẹndagbe-jijla tọn lọ mẹ, nado plọnmẹ podọ nọ deanananu to agun mẹ. To ojlẹ de godo to owhe enẹ mẹ, n’wlealọ hẹ asi yiwanna ṣie Eugenia. To pọmẹ, mí sẹ̀n taidi wẹndagbe-jlatọ whenu-gigọ́ tọn lẹ to Guatemala.

 Todin, gbẹzan ṣie masọ gọ́ na flumẹjijẹ ba, kakatimọ n’do ayajẹ mayọnjlẹ. Nuplọnmẹ Biblu tọn lẹ yíyí-do-yizan mẹ ko hẹn mi penugo nado yí dee sọn fẹnnuwiwa zanhẹmẹ tọn po danuwiwa po si, podọ nado duvivi gbẹzan he gọ́ na owanyi po jijọho nujọnu tọn po tọn.