Clodean he yin dopo to Kunnudetọ Jehovah ton lẹ mẹ bo nọ nọ̀ Afrique du Sud yin ginglọndo dotowhé na mẹzizẹ tangan de wutu. Na azọ̀n he jẹ e te lẹ gẹdẹ taun wutu, e dona lẹnnupọndo nukunpedomẹgo dotowhé tọn voovo lẹ ji. Jẹnukọnna mẹzizẹ lọ podọ to godo etọn, onú nọ ṣikọna ẹn, e nọ mọ awufiẹsa bosọ nọ mọ apọ̀. Nudi osẹ ao to whenue e lẹkọwa whégbè godo, e ma penugo nado nọ sinai. Podọ na azọ̀n COVID-19 tọn wutu, mẹde ma gán nọ wá dla ẹ pọ́n.

 Na Clodean magbe ma nado nọ ze ayiha do ninọmẹ etọn ji wutu, e biọ Jiwheyẹwhe dọ ni na emi huhlọn nado nọ miọnhomẹna mẹdevo lẹ. Tlolo he e jẹ aisin ji, e dọho hẹ nọviyọnnu kọmẹnu etọn tọn de he ko plọn Biblu hẹ Kunnudetọ Jehovah tọn lẹ pọ́n, amọ́ bo wá doalọte. Clodean má linlẹn tulinamẹ tọn delẹ sọn Ohó Jiwheyẹwhe tọn mẹ hẹ viyọnnu lọ, ehe whàn ẹn nado gọ̀jẹ Biblu plọn ji. Clodean sọ basi zẹẹmẹ ale he opli Klistiani tọn lẹ yìyì nọ hẹnwa tọn, podọ to ojlẹ dopolọ mẹ e sọ hẹn ẹn diun dọ nuplọntọ etọn nọ kọnawudopọ hẹ agun lẹdo lọ tọn de gbọn hodọdopọ video ji tọn gblamẹ. Viyọnnu lọ hodo opli lọ bo tlẹ sọ na gblọndo to adà he bẹ kanbiọ po gblọndo po hẹn de whenu.

 Enẹgodo, Clodean dọho hẹ nọviyọnnu pẹvi nuplọntọ etọn tọn, bọ ewọ lọsu to jejeji nado plọn Biblu. E tlẹ sọ dọho hẹ Clodean gando mẹdevo he gán tindo ojlo lẹ go. Etẹwẹ yin kọdetọn lọ? Clodean bẹ Biblu pinplọn jẹeji hẹ yọnnu ẹnẹ devo lẹ. Amọ́ otàn etọn ma ko fó do finẹ!

 Na ojlo ahundopo tọn he Clodean do to mẹdevo lẹ mẹ wutu, e penugo nado bẹ Biblu pinplọn jẹeji hẹ yọnnu ao devo lẹ, ehe lẹpo wá aimẹ to azọ̀n bẹplamẹ lọ whenu, bọ lẹndopọ mẹhe e nọ plọnnu hẹ lẹpo tọn yin 16! Delẹ to yé mẹ nọ wá opli Klistiani tọn lẹ to gbesisọ mẹ gbọn hodọdopọ video ji tọn gblamẹ. Alọnu hinhẹn ján to aliho ehe mẹ ko gọalọna Clodean nado de ayiha sọn ninọmẹ etọn ji. E wá mọdọ na Jehovah, yèdọ “Jiwheyẹwhe homẹmimiọn lẹpo tọn” miọnhomẹna emi to whlepọn emitọn lẹ mẹ wutu, ewọ lọsu penugo nado miọnhomẹna mẹdevo lẹ.—2 Kọlintinu lẹ 1:3, 4.

 Numọtolanmẹ tẹwẹ nuplọntọ Clodean tọn lẹ tindo gando nuhe yé ko plọn lẹ go? Dopo to yé mẹ dọ dọ: “Aliho susu lẹ mẹ wẹ n’ko mọaleyi te. Ale daho he n’mọyi wẹ nado yọ́n yinkọ Jiwheyẹwhe tọn. Ehe ko gọalọna mi nado dọnsẹpọ Jehovah dogọ.” Na nuhe dù yọnnu tintan he Clodean dọho hẹ lọ, e ko to awuwle nado yí baptẹm to madẹnmẹ. Numimọ ehelẹ ko hẹn ayajẹ susu wá na Clodean. Podọ e ko mọ agbọ́ todin sọn nuhahun agbasamalo tọn etọn lẹ si.