To 2005, nawe de he nọ yin Sowbhagya bo nọ nọ̀ Inde hẹn asu vivẹ́ etọn bu to okú mẹ. Asu lọ ma nọ yí asi etọn po viyọnnu yetọn owhe atọ̀n mẹvi he nọ yin Meghana po do daihun paali. Amọ́ todin, Sowbhagya dona vánkan taun nado mọ akuẹ he e nado penukundo ede po viyọnnu etọn po go.

 Nuhe sọ ylan to whẹho Sowbhagya tọn mẹ wẹ yindọ mẹdevo lẹ ma nọ dokọ̀ de e go. Whẹndo etọn nọ pọ́n ewọ po viyọnnu etọn po hlan taidi nubiọdutọ lẹ podọ whlasusu wẹ yé ko dọna ẹn dọ agbàn wẹ ewọ po viyọnnu etọn po yin to kọ̀ji na emi. Na Sowbhagya to homẹmimiọn dín wutu, e jẹ ṣọṣi de yì ji to lẹdo lọ mẹ, amọ́ mẹlẹ ma nọ yí nukun nujọnu tọn do pọ́n ẹn na yé mọdọ hẹntọnọ de wẹ e yin wutu. Sowbhagya jẹ azọ́n dín ji na e nido penugo nado nọ penukundo nuhudo akuẹzinzan tọn yetọn go. Amọ́, mahopọnna vivẹnudido etọn lẹpo e ma penugo nado mọ azọ́n de.

 Sowbhagya dọmọ: “Na n’hẹn todido bu wutu, n’lẹn nado hù dee. Etomọṣo, n’nọ mọdọ oyà viyọnnu ṣie tọn na pọ̀, eyin n’wàmọ. Enẹwutu, n’gbọ bo de nado hù mí omẹ awe lẹ.” Na Sowbhagya nọ mọ ovọ́ mẹ na ede bọ mẹdevo lẹ ma yiwanna ẹn wutu, e tọ́n nado yì họ̀ nudido he e na yí do hù yé omẹ awe lẹ.

 Whenue Sowbhagya to pinpán mẹ lẹkọ ja whé, Elizabeth he yin dopo to Kunnudetọ Jehovah tọn lẹ mẹ dọnsẹpọ ẹ bo jẹ hodọna ẹn ji. Sowbhagya basi zẹẹmẹ na Elizabeth dọ emi ma do azọ́n, enẹwutu Elizabeth gbọn homẹdagbe dali dọna ẹn dọ emi na gọalọna ẹn nado mọ azọ́n de. Elizabeth sọ dọna ẹn dọ plọnmẹ Biblu de wẹ emi jlo na yì deanana. Ehe paṣa Sowbhagya taun, na dile etlẹ yindọ e ko yì ṣọṣi susu lẹ, e ma sè pọ́n dọ mẹlẹ nọ plọn Biblu. Elizabeth basi oylọna Sowbhagya nado wá dla ẹ pọ́n nado yọ́n lehe Biblu pinplọn nọ yì do to gigọ́ mẹ.

 Whenue Sowbhagya jẹ whégbè, e gbẹ́ to linlẹn nado hù ede. Amọ́, hẹnnumẹ etọn de plan Meghana tọ́n, enẹwutu Sowbhagya de nado nọte kakajẹ whenue viyọnnu etọn na lẹkọwa whẹpo e nido hù ede po viyọnnu etọn po.

 Whẹpo viyọnnu lọ nido lẹkọ, e yì dla Elizabeth pọ́n, bọ ewọ dokuavọna ẹn po zohunhun po. To dlapọn lọ whenu, Elizabeth do owe lọ Etẹwẹ Biblu Plọn Mí Taun? hia ẹ, bọ weta lọ “Fie Wẹ Oṣiọ lẹ Tin Te?” dọ̀n ayidonugo Sowbhagya tọn. Weta enẹ dọ̀n ayidonugo etọn na okú asu etọn tọn to agọe wutu. To azán enẹ dopolọ gbè, Sowbhagya kẹalọyi plọnmẹ Biblu de.

 Elizabeth basi oylọna Sowbhagya nado wá plidopọ daho de he na yin bibasi to osẹ he bọdego mẹ, bọ e yigbe. Tito-to-whinnu lọ whàn ẹn sọmọ bọ e jlo na lẹzun dopo to Kunnudetọ Jehovah tọn lẹ mẹ. Podọ e mọ azọ́n de whenue e lẹkọ sọn plidopọ daho lọ.

 Sowbhagya zindonukọn to Biblu pinplọn lọ mẹ. Todin, kakati dọ ni to linlẹn nado hù ede, gbẹzan etọn do lẹndai de. E yí baptẹm podọ to godo mẹ viyọnnu etọn Meghana lọsu yí baptẹm ga. To egbehe, yé omẹ awe lẹ to sinsẹ̀n taidi gbehosọnalitọ whepoponu tọn lẹ, podọ Meghana nọ gọalọna dopo to azọ́nwatẹn lẹdogbedevomẹ tọn he to Inde lẹ mẹ sọn olá.

 Lehe Sowbhagya po Meghana po gọna pẹdido do sọ dọ Elizabeth dọnsẹpọ Sowbhagya to pinpán mẹ bo do ojlo nujọnu tọn hia to ewọ mẹ bosọ dọhona ẹn gando nugbo lọ go! Yé sọ gọna pinpẹn-nutọn-yinyọnẹn nujọnu tọn na Jehovah. Meghana dọmọ: “Mí na ko yin dìdì hoho, eyin mí ma ko sèhó gando nugbo lọ go to gbenẹgbe. Todin, mí do ayajẹ taun. Yẹn po onọ̀ ṣie po yí jejejininọ do to nukọnpọnhlan whenue mí na gbò otọ́ ṣie fán whladopo dogọ, plọnnu in gando Jehovah go bosọ dọ lehe Jehovah whlẹn ogbẹ̀ mítọn do na ẹn.”