Mẹmẹyọnnu de he nọ yin Yanmei bo nọ nọ̀ Asie biọ to nawe nukuntọ́nnọ de he nọ yin Mingjie si dọ emi ni dasá ali na ẹn. a Mingjie dọna ẹn dọmọ: “E na ṣẹ na we. Na Jiwheyẹwhe ni dona we!” To enẹgodo, Yanmei kanse Mingjie eyin e jlo dọ yé ni mọ yede nado dọhodo Biblu ji. To godo mẹ, Mingjie dọna ẹn dọ emi ko nọ hodẹ̀ egbesọegbesọ nado yin anadena yì agun nugbo Jiwheyẹwhe tọn mẹ. Naegbọn e do nọ hodẹ̀ mọnkọ?

 Mingjie basi zẹẹmẹ dọ to 2008, emi kẹalọyi oylọ-basinamẹ de sọn họntọn nukuntọ́nnọ emitọn de dè nado yì ṣọṣi he nọ gọalọna mẹhe do oblọ to agbasago lẹ de. To whenue Mingjie ko sè yẹwhehodidọ lọ godo, e kàn owe he mẹ yẹwhenọ lọ yihodọ sọn sè e. E dọna ẹn dọ Biblu mẹ wẹ, ehe yin Ohó nugbo Jiwheyẹwhe tọn. Mingjie tindo ojlo sinsinyẹn nado hia ẹ. Enẹwutu, e mọ Biblu de yí to Chine-gbè nukuntọ́nnọ lẹ tọn mẹ, podọ e hia bladopọ 32 lẹ to osun ṣidopo nkọ gblamẹ. Dile Mingjie to nukọnyi to Biblu hihia etọn mẹ, e wá mọdọ nuyise atọ̀n-to-dopo mẹ tọn, he ṣọṣi lọ nọ plọnmẹ, yin lalo podọ dọ Jiwheyẹwhe tindo oyín de he nọ yin Jehovah.

 To nukọn mẹ, nuyiwa mẹhe to ṣọṣi lọ mẹ lẹ tọn hẹn Mingjie jẹflumẹ. E doayi e go dọ yé ma nọ nọgbẹ̀ sọgbe hẹ nuhe ewọ nọ hia to Biblu mẹ lẹ. Di apajlẹ, núdùdù he yè ṣẹṣẹ dà lẹ wẹ yè nọ na mẹhe ma yin nukuntọ́nnọ lẹ bo ka nọ na núdùdù dupò nukuntọ́nnọ lẹ. Nuyiwa mawadodo tọn enẹlẹ hẹn Mingjie blawu taun, enẹwutu e jẹ ṣọṣi devo he to lẹdo lọ mẹ lẹ dín ji. Nuhe zọ́n niyẹn bọ Mingjie to dẹ̀ho nado mọ agun nugbo Klistiani tọn.

 Gbọn nuyiwa homẹdagbe Yanmei tọn dali, Mingjie yigbena nupinplọn gando Biblu go he yin zizedonukọnna ẹn lọ. To godo mẹ, Mingjie wá opli Kunnudetọ Jehovah tọn lẹ tọn whla tintan. Mingjie dọmọ: “N’ma gán wọn whla tintan he n’wá ’pli gbede. Mẹmẹsunnu po mẹmẹyọnnu lẹpo po yí zohunhun do dọnudo mi. E yinuwado ji e taun. Dile etlẹ yindọ n’yin nukuntọ́nnọ, n’mọ owanyi matin mẹnukuntahopọn to finẹ.”

 Mingjie yawu bayi nukọnyiyi to gbigbọ-liho taun bosọ jẹ opli yì ji to gbesisọ mẹ. E nọ yiwanna ohàn Ahọluduta lọ tọn lẹ jiji, amọ́ e ma bọawu na ẹn paali na ohàn-we lọ ma tin to nukinkan nukuntọ́nnọ lẹ tọn he e nọ hia mẹ. Enẹwutu, po alọgọ mẹhe to agun lọ mẹ lẹ tọn po, Mingjie wleawuna ohàn-we etọn titi. E yí gànhiho 22 to e si nado vọ́ ohàn 151 lẹpo kàn. To avril 2018, Mingjie jẹ mahẹ tindo ji to lizọnyizọn gbangba tọn mẹ podọ to ojlẹ vude godo e nọ yí nudi gànhiho 30 zan to osun dopodopo mẹ nado dọyẹwheho.

 Nado gọalọna Mingjie nado jẹ yanwle baptẹm tọn kọ̀n, Yanmei basi hoyidokanji kanbiọ po wefọ Biblu tọn lẹ tọn po he tin to owe lọ Mí Yin Tito-Basina Nado Wà Ojlo Jiwheyẹwhe Tọn mẹ lẹ na ẹn. To juillet 2018, Mingjie yí baptẹm. E dọmọ: “Owanyi he mẹmẹsunnu po mẹmẹyọnnu lẹ po dohia to plidopọ enẹ ji yinuwado ji e taun. Dasin ayajẹ tọn wayi do mi na n’wá penugo nado yin dopo to hagbẹ agun nugbo Jiwheyẹwhe tọn lẹ tọn mẹ.” (Johanu 13:34, 35) Mingjie magbe todin nado do owanyi dopolọ he e mọyi hia mẹdevo lẹ, bo to sinsẹ̀n taidi yẹwhehodọtọ whenu-gigọ́ tọn de.