Rachel he nọ nọ̀ République dominicaine todin dọ dọ, “Whẹndo he nọ sẹ̀n Jehovah de mẹ wẹ n’yin jiji te. E blawu dọ, whenue n’do owhe ṣinawe, baba ṣie doalọtena gbẹdido hẹ omẹ Jehovah tọn lẹ bosọ jẹagọdo nugbo lọ sinsinyẹn. E hẹn ẹn vẹawuna mi taun nado sẹ̀n Jehovah. Di apajlẹ, e nọ tẹnpọn nado ze nudelẹ donukọnna mi taidi, alokan, gbejizọnlin sọyi aihundatẹn Disneyland tọn kavi etlẹ yin kalti nuhihọ tọn etọn, nado diọlinlẹn na mi ma nado sẹ̀n Jehovah! Whedelẹnu e nọ hò mi taun, na ‘Jehovah sinsẹ̀n nido tlọ́n awọntin mẹ na mi.’ E nọ dọ dọ eyin n’ma gán dọho kavi zinzọnlin ba, opli lẹ yìyì na glo mi. Amọ́, enẹ ma hẹnalọdotena mi. N’ko magbe nado nọ yì opli lẹ.

 “Baba ṣie ma nọ doalọ go e gbede eyin Iya ṣie to finẹ. E dọna mi dọ emi na gbleawuna iya ṣie sinsinyẹn eyin n’dọna ẹn dọ emi nọ hò mi. E nọ dín whẹjijọ dọ avùnhiho he emi to pinplọn mi lọ wẹ zọ́n bọ apà do to go e.

 “Na n’gbẹ́ pò to ovu bosọ nọ dibuna baba ṣie wutu, n’ma nọ dọ nuhe to jijọ na Iya ṣie. Enẹwutu, n’gbọ bo nọ dọna Jehovah. ‘N’nọ zinzọnlin biọ zungbo de mẹ to owhé mítọn godo to Maryland, to États-Unis. To zungbo enẹ mẹ, oaki-tin dagbedagbe de tin to finẹ bọ n’nọ hẹ alà he lodo etọn ganji de ji bo nọ dọho hẹ Jehovah. N’nọ hodẹ̀ gando numọtolanmẹ ṣie lẹ po nuhe n’na wà na ẹn po go, eyin e gọalọna mi nado jugbọn nuhe pehẹ n’te lẹ mẹ bo whẹ́n mẹho. N’sọ nọ dọhona ẹn gando nuhe n’na wà to aihọn yọyọ lọ mẹ lẹ go, whẹndo he n’na doai, gọna jijọho po ayajẹ po he n’na duvivi etọn matin awufiẹsa po obu po.

 “Whedepopenu he baba ṣie tẹnpọn nado yí nunina lẹ do klọ mi kavi hò mi na ma do jo Jiwheyẹwhe sinsẹ̀n do, n’nọ mọ homẹmiọnnamẹ po huhlọn po yí sọn Jehovah dè janwẹ. Jiwheyẹwhe gọalọna mi nado yin nugbonọ bosọ hẹn mi lodo.

 “N’yí baptẹm whenue n’do owhe ao, bosọ jẹ gbehosọnalitọ basi ji to owhe awe godo. To tintan whenu, baba ṣie ma yọ́n nudepope gando onú enẹlẹ go. Whenue e wá yọnẹn, e linú mi bọ aglànká sie sẹ̀.

 “Mẹdelẹ na mi ayinamẹ nado jo azọ́n gbehosọnalitọ tọn do, na n’gbẹ́ yin yọpọvu wutu bosọ nọ hanú dọ n’ma mọnukunnujẹ nujọnu-yinyin nudide he n’basi tọn mẹ. Dile ojlẹ to yìyì, n’mọ bọ Kunnudetọ jọja susu to lẹdo ṣie mẹ masọ ylọ nugbo lọ dọ nujọnu sọmọ ba. Yé nọ pò na agọ́dudu po gbẹdudu po. Nuhe wà yé te lẹ nọ taidi nuhe dọnmẹ! To whedelẹnu, e nọ jlo yẹnlọsu ga. N’nọ dọna dee dọ, ‘Be n’ma na gbọ bo doalọtena yẹwhehodidọ bo dugbẹ di hagbẹ ṣie lẹ wá?’ Amọ́, whedepopenu he n’do numọtolanmẹ enẹ, n’nọ dọhona Jehovah gandego.

 “Whenue n’do nudi owhe 15, azọ́nwhé aṣọ́dido tọn daho de ylọ mi. Yé dọ dọ emi na sú mi akuẹ susu eyin n’yigbe nado wazọ́n na yé to Milan, to Italie. E vivi na mi nado mọdọ n’gán nọ basi ajọjijla na yé bo tọ́n to linlinwe lẹ mẹ bosọ nọ do avọ̀ akuẹgegenu tọn lẹ nado zinzọnlin to aliho vonọtaun de mẹ gbọn mẹsusu nukọn. N’ko basi gbehosọnalitọ na nudi owhe atọ̀n, podọ n’lẹndọ, ‘Azọ́n ehe sọgan gọalọna mi to akuẹzinzan-liho, ehe na zọ́n bọ n’na zindonukọn to gbehosọnalitọ bibasi mẹ na ojlẹ dindẹn.’ Baba ṣie masọ topọ́ hẹ mí ba, enẹwutu n’lẹndọ akuẹ lọ sọgan gọalọna iya ṣie nado penukundo akuẹzinzan mítọn lẹ go.

 “N’hodẹ̀ gando whẹho lọ go. N’sọ dọhona iya ṣie, na e ko to gbehosọnalitọ basi na owhe susu, podọ n’dọhona mẹho agun tọn he n’yiwanna bosọ nọ na sisi de. Humọ, dile n’ko nọ wà do, n’sọ yì atin ṣie ji nado hodẹ̀ susu dogọ. Jehovah na gblọndo odẹ̀ ṣie lẹ tọn gbọn wefọ Biblu tọn de he mẹho lọ hia hẹ mi gblamẹ. Enẹ wẹ Yẹwhehodọtọ 5:4, he dọmọ: ‘Whedepopenu he a dopà hlan Jiwheyẹwhe, de e. De opà he a do.’ N’ko dopà nado sẹ̀n Jehovah to gigọ́ mẹ, podọ n’to budi dọ azọ́n ehe gán hẹn nuhahun wá na mi to gbigbọ-liho. Enẹwutu, n’de ma nado kẹalọyi azọ́n lọ.

 “Mahopọnna nuhe jọ lẹpo, n’wá whẹ́n mẹho! Todin, n’topọ́ hẹ asu ṣie Jaser, gọna visunnu mítọn Connor, he do owhe ṣinẹnẹ, podọ mí do ayajẹ. Mẹho agun tọn de wẹ Jaser yin bọ Connor yin wẹnlatọ he ma ko yí baptẹm. N’ko to sinsẹ̀nzọn whenu-gigọ́ mẹ na nudi owhe 27.

 “N’nọ saba flin hodọdopọ gaa he n’nọ do hẹ Jehovah to atin oaki tọn he to zungbo de mẹ to ohọ̀ mítọn godo lọ ji. N’vẹ̀ Jehovah dọ ni gọalọna mi, podọ e ko sọ wàmọ to aliho he jiawu de mẹ. E ko hẹn mi lodo, miọnhomẹna mi bosọ deanana mi. To gbẹzan ṣie blebu mẹ, Jehovah ko dohia mi whlasusu lehe ewọ yin otọ́ jiawu de do sọ. Homẹ ṣie hùn dọ n’de nado yí ahun ṣie lẹpo do sẹ̀n ẹn. Nudide nuyọnẹn tọn dagbe hugan he n’basi niyẹn.”