Yé Do Awù He Do Ohia Agosu Atọ̀nnọ Sinmẹ Vẹẹ Flusọ́
Maud nọ nọ̀ France bo nọ wazọ́n to wehọ de mẹ fie e nọ gọalọna ovi he do oblọ to agbasa go lẹ te to whenue yé to nuplọn to klasi. To agọe, wehọmẹvi delẹ to nuplọn gando hùnsọndai po opá yasanamẹ Nazi tọn po go. Gàntọ he to opá lọ mẹ lẹ nọ do awù he tindo ohia sinmẹnọ de. Sinmẹ po lehe ohia lọ ṣí po nọ do nuhewutu mẹlọ do yin súsú do gànmẹ hia.
Mẹplọntọ he to nuplọn yé lọ dọho gando awù he do ohia agosu atọ̀nnọ sinmẹ vẹẹ flusọ́ he gàntọ delẹ nọ do go, bo dọmọ: “N’lẹndọ na sunnu yetọn lẹ nọ dohó hẹ sunnu bọ yọnnu yetọn lẹ nọ dohó hẹ yọnnu wẹ na ko zọ́n.” To whenue mẹplọntọ lọ ko fó nupinplọn hẹ wehọmẹvi lọ lẹ godo, Maud basi zẹẹmẹ na ẹn dọ Nazi lẹ yí awù he do ohia agosu atọ̀nnọ sinmẹ vẹẹ flusọ́ tọn zan nado nọ yọ́n Kunnudetọ Jehovah lẹ dovo. a E dọna ẹn dọ emi na hẹn nudọnamẹ delẹ wá na ẹn gando hosọ lọ go. Mẹplọntọ lọ yigbe bo tlẹ biọ to e si nado má nudọnamẹ lọ lẹ hẹ wehọmẹvi lẹ.
To whenue klasi devo to nuplọn gando hosọ dopolọ go, mẹplọntọ devo yí yẹdide lẹ zan nado basi zẹẹmẹ ohia voovo he nọ tin to awù he gàntọ lọ lẹ nọ do go. Yẹdide lọ dohia nugbo dọ awù he do ohia agosu atọ̀nnọ sinmẹ vẹẹ flusọ́ lọ nọ do gàntọ Kunnudetọ Jehovah tọn lẹ hia. To nupinplọn enẹ godo, Maud na nudọnamẹ delẹ mẹplọntọ ehe lọsu gando hosọ lọ go. Mẹplọntọ lọ kẹalọyi bo basi tito na Maud nido dọhodeji hẹ wehọmẹvi lẹ.
Mẹmẹyọnnu Maud hẹn zinjẹgbonu he e zan lẹ do alọmẹ
Maud wleawuna nuzedonukọnnamẹ nukunwhiwhe 15 tọn de na klasi tintan lọ, amọ́ to whenue ojlẹ lọ sọ̀, mẹplọntọ lọ dọna ẹn dọ: “A gán zan gànhiho dopo.” To bẹjẹeji, Maud do video he pìntàn lehe Nazi lẹ dohomẹkẹn Kunnudetọ Jehovah tọn lẹ do hia. To whenue video lọ jẹ fie e yin didọ te dọ Nazi lẹ hò ovi Kunnudetọ lẹ tọn 800 yí sọn mẹjitọ yetọn lẹ sí, Maud do video lọ te bo hia numimọ atọ̀n to ovi lọ lẹ mẹ tọn. To whenue Maud ko do video lọ hia fó godo, e dotana nuzedonukọnnamẹ etọn bo hia wekanhlanmẹ de he yin kinkan to 1940 gbọn Kunnudetọ owhe 19 mẹvi de he yin Australie-nu bo nọ yin Gerhard Steinacher dali, enẹ wẹ wekanhlanmẹ e yì whedenu tọn he e kàn hlan mẹjitọ etọn lẹ gànhiho kleun de whẹpo Nazi lẹ do hù i. b
Maud ze nudọnamẹ dopolọ donukọnna klasi awetọ. Mí dopẹ́ na adọgbigbo Maud tọn, enẹ zọ́n bọ todin mẹplọntọ awe lẹ nọ donù Kunnudetọ Jehovah tọn lẹ go whenue yé to nuplọn wehọmẹvi lẹ gando mẹhe jiya to opá yasanamẹ tọn Nazi tọn lẹ mẹ go.
a To wẹkẹ-whàn II whenu, Kunnudetọ Jehovah tọn lẹ to Allemagne, he sọ nọ yin yiylọdọ Bibelforscher (enẹ wẹ Biblu Plọntọ lẹ), yin wiwle sú na yé gbẹ́ nado nọgodona Nazi wutu.
b Yè dá kú-whẹ̀ na Gerhard Steinacher na e gbẹ́ nado biọ awhànpa Allemagne tọn mẹ wutu. To wekanhlanmẹ e yì whedenu tọn lọ mẹ, e dọmọ: “Yọpọvu de wẹ n’gbẹ́ yin. Eyin Oklunọ na mi huhlọn kẹdẹ wẹ n’gán hẹn tenọgligo, podọ nuhe biọ n’te niyẹn.” To wunkẹngbe afọnnu, yé hù Gerhard. Nuhe yè kàn do yọdò etọn ji wẹ: “E kú na e gbògbéna Jiwheyẹwhe wutu.”
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Etẹwẹ Jọ Do Kunnudetọ Jehovah Tọn lẹ Go to Nujijọ Mẹsusu Hùhù Dopọ Ji Tọn lọ Whenu?
Gblọndo lọ sọgan hẹn awuji we taun.
GBLỌNDO NA KANBIỌ SINAI DO BIBLU JI LẸ
Naegbọn Jiwheyẹwhe Dike bọ Yè Hù Mẹsusu Dopọ Ji?
E nọ paṣa mẹsusu nuhewutu Jiwheyẹwhe owanyinọ de na do na dotẹnmẹ yajiji sọmọ. A sọgan gblọndo he họnwun lẹ to Biblu mẹ!